Read Medumba Yoshua 9 Bible Online

Yoshua 9 - Medumba bible

Yoshua 9

¹Fenfen tse bo be yoṅ Yordan nà, tse num mbale, tse tômbo'o, tse bo be nkaṅ dibantse ndùb, tà nèn nkum Liban nà, ba Hit, ba Amor, ba Kanaan, ba Férésia,

²ba Hévia boa ba Yébusia, lo be ju' tshen tshô là, ntamte njoṅ yub fa nele' Yoshua boa ba Israél ntsho.

³Ba Gabaon ju' mba Yoshua na' ngù num Yériko bo Aï là.

⁴Ndùlala bo tù' lo' yub mfù kà nzin yi. Bo lo' jujù nze, ntam manze, ndo' nke'mbàm boa njwèn ntu' ngub ts'a fagte kà bo nkwitte là, njabte num kekwène tshobe.

⁵Bo so njwèn nketo' mi bo kwitte là nku bo, ma' ntsha nzwe num bo; njoṅ bàn fa ze bo ghù, a be jujù nze là jumte, mbe mfémfé.

⁶Bo nèn mbaṅ Yoshua ntùm mbàn Guilgal, ntshob yi boa njoṅ ba Israél fa ndù: Bag fe à tà mo' ngô là, ngùanesà. A bwô ndù bag bin wat kàn.

⁷Ba Israél bùnte tshen ba Hévia là ndù: Be mo' ndù bin nke ntswe à mbaṅ bag; a be ndùlala mba bag bin ghù newat kàn à ndùke?

⁸Là bo tshob Yoshua ndù: Bag b'a ghafa' tsho. Yoshua tshob ndù: Bin b'a ba we, bin fe à yà?

⁹Bo bùnte yi ndù: Ghafa' tsho fe à mo' ngô là ndù a sag neshu, mb'a num lén Tshùaben Nsi o; bag lo ju' bo nke ntshob nu num i, mfà num ju z'a ghù Egipto là,

¹⁰mba nu z'a ghù num fenfen Amor bàa yoṅ Yordan nà: Sion mfen Hesbon bo Og mfen Basan z'a na' mbe Ashtarot là.

¹¹A ndùlala, tshag ghakwé mbwe boa ba ntùm ngô, yag ngô tshob bag ndù bag lo' jujù nze, nse' ntèt zine, ntshob bin ndù bag b'a ghafa' tsine. A ndùlala, a bwô ndù bag à bin wat kàn.

¹²Bin lôte bàn yag njene. Bag lo be lo' a nke nke' ntone, lé'njù se bag tum yi ndà bag là. Tshù i li z'a jume, nke ntù' b'a mfémfé là.

¹³Tshen ntu' ngub li, bag lo be naṅ ndu' bwe a b'a tse nswe, a fagte ndonni fa; nzwe tshag boa nketo' ghô nze mfagte fa, nummbe nze sage.

¹⁴Ba Israél bam tshujù tse bo se' yi là ke yôg bètte tshob Tshùaben.

¹⁵Yoshua bam ndù boa bo tswe fite, ngwat kàn boa bo, yen nu là kabte yube; ghakwé mbwe ntùm Israél nu ngu num yen nu là, mbame.

¹⁶A be tshùa lé'njù tat mba bo wat kàn nà, ba Israél ju' ndù tshen ben nà b'a ba ndùla' bo, mbe ndù bo ke ntswe à netèt bo.

¹⁷Ba Israél lo ntam manze, a be kum lé'njù tat bo kum ntùm ntusô mube. Men ntusô là na' mb'a Gabaon, Kéfira, Bérot bo Kirjat-Jearim.

¹⁸Bo kam yube, nummbe ghakwé mbwe netèt ngô lo lo' lén Tshùaben Nsi Israél nu ngu yi. Là, ngô to' neke ntam mfèt num kamkame.

¹⁹Kamkam tshob bo ndù: Bag lo lo' lén Tshùaben Nsi Israél nu ngu yi bo. A ndùlala ze be be ke kwag yub là.

²⁰Tshù mba be nsi ghù num bo li: Be nsi faṅ yub ntùn, ndùlala ndù kà be soṅ yantù Nsi nso num be num nu ngu ze be nu là.

²¹Ndùlala kamkam tshob ndù: A bwô ndù bo yôge, mbe ntùn. Nda' ndù a b'a kekônkô bo ndù bo ke nkeb ntshwèn, mbèn nke ntu' ntse njoṅ benntùn fa. A ju ze kamkam tshob bo là.

²²Ndùlala Yoshua tsiaṅ ba Gabaon, ntshob bo ndù: Bin ze bin jù b'a zit mba bin na' ntatte yag mba bin fe à tà ngùanesà, tà ntùm ngô z'a sag l'à? Bin ke ne ntswe à be netèt bag.

²³Ndonni ndon nà tu bin, nu ghù zine. A b'a kekônkô bin neke nkeb ntshwèn mbèn nke ntu' ntse ntùm Ndà Nsi àm.

²⁴Bo bùnte Yoshua ndù: A b'a nummbe ghafa' tsho lo ju' mbe Tshùaben Nsi o lo tshob ngafa' i Mosé ndù a fà yen ngô li fa wù, mbe fà ndùlala ndù a zwite njoṅ benntùn fa tse bo ntùm bwe là mbwe o. Bwôg ndùb lo ngom yag ndùs'o lo nke ngebte là kà bag mbe bwôg yôg sag ntàmte yen nu là.

²⁵Bag b'a mum mbu mu ndonni. Ghù num bag mb'o yen ndù a bwô, ntsin nà.

²⁶A b'a kua' ju ze Yoshua ghù là. Yoshua yôg yub mum mbu ba Israél, kà bo ke zwite yube;

²⁷fe sen lé'njù là, a lo' yub ngù ghakeb ntshwèn boa ghatu' ntse benntùn yi, mba tse tômbwôg Tshùaben, kua' num dù' ze Tshùaben na' mbèn ntsho' là. Bo be nke' mfa' men mfa' là mba kua' sènni.