Read Medumba 1 Timôtio 5 Bible Online

1 Timôtio 5 - Medumba bible

1 Timôtio 5

¹Kà sobte ntù njwèn mèn, là tagt'é mba tà là; tagte bonnshum mba fètfèt là.

²Tagte ywèn bènnzwi mba mà tsho là; tagte ngonngon mba fètfèt tse bènnzwi là, ntùm njoṅ nelàn fa.

³Ku'ni fôg bènnzwi, tshen nà tse bo b'a kua' fôg bènnzwi là.

⁴A be ze mfôg mènnzwi ghù bon ke bon bon tse lo là, bo bwôgmbwe nzi'te neku'ni ko' yub ndà, mfà yub njo tà tshob mba mà tshobe. Nummbe yen nà bwô mbwe Nsi.

⁵Là kua' mfôg mènnzwi z'a be tù' i là num nywinte num Nsi, nke nkagtùn ntùm nebu' mbu mba nele'te Nsi, tèttswe' mba mbwôgtshù.

⁶Là yen nà z'a be njôg ntùm ngùa là b'a mèn nekwù, mba mb'a ke' ntùn nà.

⁷Tshob yen nà ndù bo be ke lo'.

⁸A be ze mèn ke' kwate tse ben, njôg mbe b'a tunndà i là, mb'a ghua' bamntù, a b'a mèn kebwô ntshùa mèn z'a ke' bam nà.

⁹A bwô ndù bo be kite lén mfôg mènnzwi ndù a ghù ngu'njù ṅam ntôge, mbe mfôg ta' mandum ntshù',

¹⁰a bwô a ghù kwénta ntùm mfa' mebwô, netshagte bon, nelo' ghùn, nesôg nku ben nelàne, neywimte ghayennge', neze njoṅ nzenze mfa' mebwô fa.

¹¹Kà kite ndèn fôg bènnzwi tse bo ke' ywèn nà. Nummbe yôg ngùa num mfagte yub num Kristô, bo kô nenandà.

¹²Ndùlala ntù' ghavù ntsha, nummbe bo ghua' ju ze bo bwôgmbwe mbam nà.

¹³A num ntshùa ndùlala bo ke ghù ju nefa'a; nto' nekat nzendà nzendà, ke b'a nda' mba bo ke' ghù ju nefa' là, là bo b'a ghantshobe, ghazwi'te benntùn, bo num ntshob tshu ts'a ke' bwô netshob là.

¹⁴Ndùlala, me kô ndù fôg bènnzwi tse bo ke' ywèn nà nandà, mbwe bon, nabte ndà yub, ke fà dù' ze ghakeban yi'te bwe tshabte yub là.

¹⁵Tsemo' netèt bo à tam manze netsin mvèn yub, ntam njam Satan.

¹⁶A be ze ngabamntù ze mènnzwi ghù fôg bènnzwi là, a ywimte yube, ndù kà ntse'te benkristô ket lèt, ndùlala ndù benkristô ywimte kua' fôg bènnzwi.

¹⁷Ghakwé mbwe tse bo tshùb sob fa' mebwô là, ku'ni nekwé ghamte yoṅ bàa, njôg mbe ben tse bo num ndab wut tshob ntùm netshob ntshob Nsi mba netswite là.

¹⁸Nummbe ṅwa'ni Nsi tshob ndù: Kà kut ntshu nyàmna' z'a tshwèt ntsham nsa là, mba ndù: Ngafa' ku'ni nekwé ntsho'fa' mi.

¹⁹Kà bam ndù mèn bote ghakwé mbwe, ke be ndù a ghù ghakwénta bàa ke tat lo.

²⁰Tshobte ben tse bo fàn nà mbwe njoṅ benntùn fa, ndùlala ndù bwôg tsho num tsemo' ben.

²¹Me lo' Nsi, Kristô Yésu mba ba Angél tse bo tsho' yub là, mba ghakwénta là, mbètt'o ndù o ze tshen tshu là, ke tsho ntùm tôte, ke yi'te num tsemo' ben ntshùa tsemo'o!

²²Kà yab mbu num sàm mèn ndende, kà tsho num nukebwô mo' mèn. Ghô nelàne.

²³Kà nenu be nda' ntse, là nu ndu' metsili num tshag so mba num wul o z'a num ngùtni o là.

²⁴Mfànnu tsemo' ben num ntum kà bo ntsho'te ntsha, là mfànnu tsemo' ben se' à ngelaṅ bo tsho'te ntsha là.

²⁵Be ndaṅndaṅ mfa' mebwô num ntum ndende, mi a ke' b'a lèn men ni là ke' ku' neleme.