Read Medumba 2 Timôtio 3 Bible Online

2 Timôtio 3 - Medumba bible

2 Timôtio 3

¹Là lèn ndù ngelaṅ kebwô nsi se' ntùm ba miagte lé'njù.

²Nummbe benntùn nsi be ghaghe'e, ghakô nkàb, ghata'nsoṅe, ghako'tewut, ghatshabte, ghatatu, mbwe tà tshob mba mà tshobe, ghakelèn numebwô, ghawag Nsi,

³ghakeghù nkôni, ghakelé' kàn, ghakag fagte ghakeghom wut tshobe, tshùagkèt benntùn, ghakekô numebwô,

⁴ghaghù ndàm, ghavôgte, ben tse ko'tewut ma' fù miag bo là, ghakô ngùa ntshùa Nsi,

⁵bo ghù mfuni neghamte Nsi, là nke nga neta z'a be ntùm bwe là.

⁶Tam yub mvèn o; nummbe ghatsha' nzendà benntùn num netèt bo, bo num nzwiaṅte bènnzwi tse bo fùag là, nukebwô tshùa yube, ghe'te nzenze nke nsoṅ yube,

⁷bo nke nzi'te njoṅ ngelaṅ fa, ke ku'ni nezin nkume, ndèn nunenùn nà,

⁸ndaṅndaṅ mba Yannès mba Yambrès tshètte Mosé là be ndaṅndaṅ mba tshen ben nà tshwèt ntshètte nunenùn nà, bo b'a benntùn tse zenu yub bagte là, benntùn tse bamntù yub vù laṅte là.

⁹Là bo ke nsi bèn nèn mbwe ntùm manze là, nummbe bà yub nsi la'te wul i njoṅ benntùn fa, ndaṅndaṅ mb'a na' mbe num tsemo' là.

¹⁰Là tu wul o lo tam njam àm, ntùm yàm netswite, ntùm nzin màm, ntùm nkwatenu màm, ntùm bamntù àm, ntùm yàm nefènntù, ntùm yàm nkôni, ntùm yàm neju' ntshu,

¹¹ntùm netsho' nku kebàn, ntùm neyen nge'. Tshen nu là na' ntsho num àm à Antiôkia, Ikônia, Listra, mi' me lo fènte netsho' nku kebàn! Ntùm njoṅ i fa, Tshùaben lo ke nkwé àm.

¹²Ndùlala njoṅ benntùn fa tse bo kô neyôg mba ghaghamte Nsi num Kristô Yésu là, bo nsi tsho' nku mub kebàn.

¹³Là ben kebwô mba ghatatte nsi nèn mbwe ntùm nukebwô, ke fùte benntùn, bo ke mfùte yube.

¹⁴Là tu wul o, ghô ntùm ju z'o zi'te, mbam kua' mebwô là, o lèn ben tse bo tswit'o là.

¹⁵Nummbe o lèn ṅwa'ni nelàn fe ménfi, a ku'ni nefà zenu wù num yôg njam bamntù z'a be num Kristô Yésu là.

¹⁶Njoṅ ṅwa'ni Nsi fa fe à Ywèt Nsi, nke njwimte num netswite, num netshagte, num nebù'te, num neke ntsho'te ntùm netsine,

¹⁷ndùlala ndù mèn Nsi ze bo nabt'é num njoṅ mfa' mebwô fa là bwô miagte.