Read Medumba 2 Timôtio 4 Bible Online

2 Timôtio 4 - Medumba bible

2 Timôtio 4

¹Me lo' Nsi mba Kristô Yésu z'a nsi keb ntsha benntùn mba fe ben nà, mba nkwénta là, ntsiaṅ o num ze nese' mba nufen se ndù:

²Tshob ntshob Nsi, fà wul o num bwe ngelaṅ mebwô mba ngelaṅ kebwô, tagte, tshobte benntùn, tswe'te ntù ntùm njoṅ nefènte fa, mba njoṅ netswite fa.

³Nummbe ngelaṅ nsi se'e, ze benntùn ke nsi fènte netswite mebwô là, là ntoṅ mub nsi yôg yube, bo kwi'te ghatswite num ko' ghe'te yub,

⁴mem ntoṅ mub mbwe nunenùne, kù' ntoṅ num tshô banban.

⁵Là tu wul o, zete num njoṅ tshu fa, fènte nukebwô, fa' fa' ngatshob nkùn mebwô, ghù so fa' dune.

⁶Mba me là, bo à to' nefétt'àm, ngelaṅ nenèn ku' me.

⁷Me le' mbwô ntsho, me miagte nekù nde, me lé' bamntù.

⁸Ndonni, bo lé' tshe' ngu' nunetsin me, se Tshùaben, ngakeb ntsha ze netsin nsi fà me ntùm sen lé'njù là, ke b'a nda' me, là mba njoṅ benntùn fa tse bo kô ze nese' là.

⁹Nànte nese' mbaṅ àm kua' ndende.

¹⁰Nummbe Démas ghua' àm, nkô yen njù li. A nèn Tésalônikà. Krèscens nèn Galatia, Titô nèn Dalmatia.

¹¹Bag nda' Lukas bèn ntù'ù. Lo' Marko bin yi se'e, nummbe a nsi ywimt'àm num fa'.

¹²Me lo tum Tikikô Efésô.

¹³Be se' ndo' kummbaṅ se me na' mfaṅ Trôa la' Karpô là, mba ba ṅwa'ni, njôg mbe ba ṅwa'ni ngub.

¹⁴Aléksaṅdre, ngatswe lam ghù nukebwô me yàme. Tshùaben nsi fà yi be ndaṅndaṅ mum mfa' mi.

¹⁵Tu wul o, bam nà num i, nummbe a lo tshètte ntshob mag neshu.

¹⁶Mèn lo ke be njam àm ngelaṅ me na' nto' nekwé nta wut màm nà, là njoṅ yub fa lo ghua' àm. A ke' bwô nesiaṅte yen nu là num bo.

¹⁷Là Tshùaben lo be njam àm, ngù ntshob nkùn mebwô dun, ghakelèn Nsi ju'. A lo kwé àm ntshu ngwayit.

¹⁸Tshùaben nsi kwé àm bu fa' kebwô, yôg àm, ndù me tsho ntùm nufen se kamànyam. Ghamte be yi ngu'ngu'. Amén.

¹⁹Tsha'te Priska mba Akila, mba ndà Onésifôrô.

²⁰Erasta ghô Korintô. Me lo faṅ Trôfimô Milét ndù a tshwèt ngone.

²¹Nànte nse' kà ndùsàn se'e. Eubulô, Pudèns, Linô, Klaudia, mba njoṅ fètfèt fa tsha't'o.

²²Tshùaben be bo ywèt tsho. Kondèn be bin.