Read Medumba Titô 1 Bible Online

Titô 1 - Medumba bible

Titô 1

¹Me Paulo, ngafa' Nsi, là ngantum Yésu Kristô num netswe'te bamntù ben tse Nsi tsho' yub là, ndù bo lèn nunenùn ndaṅndaṅ mb'a be ntùm neghamte Nsi là,

²ntùm nenywinte yôg matmat se Nsi z'a ke' be tatte, na' nka' tà fe ndùke lo là;

³ko' ze ngelaṅ lo ku'u, a la'te ntshob mi ntùm netshob nkùn mebwô z'a na' mfà me ndaṅndaṅ mba Nsi ngayôg ben tshob là.

⁴Me kite yen ṅwa'ni li à Titô, ko' mén àm ntùm bamntù z'a tamte yag là. Kondèn mba fite se' njam Nsi Tà mba njam Kristô Yésu, ngayôg be.

⁵Tshù, me lo faṅ o Krèta ndù o miagte fa' s'a na' ntù' là, mba ndù o yab ghakwé mbwe mba ntùm zit ngô lo, ndaṅndaṅ mba me tshob wù là.

⁶Nda' ndù a bwô ngakwé mbwe be kelo', ndu ta' mènnzwi ntshù', bon tse be ghabamntù, tse sàm mèn ke' bote yub num yôg kebwô là, tse bo ke' be ta tu là.

⁷Nummbe a bwô ndù ngalôte be kelo', yi z'a be ngalé' tshu Nsi là, k'a be ngaghamte wul i, ngayantù, ke be mbum ndu', ke be nzwe zwe', k'a jù nkàb banban,

⁸là, a bwô ndù a be nshun ghùn, ngakô numebwô, nzenu, mèn netsine, mèn nelàne, ngatshùb wul i,

⁹a bwô ndù a lat num ntshob nenùn ndaṅndaṅ mb'a be ntùm netswite ze mebwô là, mba ndù a ku'ni netshobte ghatshabte.

¹⁰Nummbe ben yàm b'a ghatatu, ghantshob banban, ghatatte, njôg mbe tshen ben ni tum à netèt ben tse bo si ket là;

¹¹a bwô nekut ntshu yube. Bo num nkag tshu'tu ntùm njoṅ tunndà fa, nke ntswite nu ts'a ke' bwô netswite là, nke nkô nejù nkàb banban.

¹²Mo' mèn netèt bo, ko' yub ngatshob ntshob Nsi lo tshob ndù: Ba Krèta b'a ghatatte njoṅ ngelaṅ fa, tshùagkèt nyàm, mbam ndô.

¹³Yen kwénta là b'a nenùne; ndùlala, tshobte yub kua' kebwô, ndù bo ntswe mebwô ntùm bamntù,

¹⁴ke fà wut tshob num nkùt ba Yuda mba num ntshù' ben tse bo tam nunenùn mvèn yub là.

¹⁵Njoṅ tshu fa làn num ben tse bo làn nà. Sàm ju ke' làn num ben nesagte mba num ghakeghù bamntù, zenu yub mba nzentù yub sagte.

¹⁶Bo num ntshob ndù bo lèn Nsi, là bo num nga i ntùm mfa' mube, mbe ben nesagte, ghakeju' ntshu, ghakeku'ni nefa' sàm fa' mebwô.