Read Medumba Héber 10 Bible Online

Héber 10 - Medumba bible

Héber 10

¹Nummbe ntshù' ghù netshaṅ tshu ts'a nsi se' là, a ke' ghù ko' mfuni tshen tshu là, a lo ke to' ku'ni neghù ben tse bo ke ngebte là bwô miagte njam tshule'te Nsi tse bo ke mfà ngu'ngu' ke tag là.

²A lo mbe ndù a ku'ni, mba bo ke' tsin nefà tshule'te Nsi ké? A lo mbe ndù bo lànte tshen ghafa' fa' Nsi là, mb'a be nzentù yub bèn ntshob bo ndù bo ghù nukebwô ké?

³Là tshen tshule'te Nsi là tse bo ke mfà mba zit ngu'njù lo là ke nda't'a ndù nukebwô ke' mi.

⁴Nummbe lem mfot mfô mba lem mfot mbwe ke' ku'ni nebiagte nukebwô.

⁵A ndùlala, a lo be tsho ntùm njù, ntshob ndù: O lo ke kô jule'te Nsi mba ju neghamte Nsi, là, o lo nabte wul àm,

⁶o ke' yab ntù num tshu neton ngamt'o yi mba tshu nele'te Nsi num nukebwô.

⁷Me tshob ndù: Bo tshob num àm ntùm ṅwa'ni ndù: Nsi àm, tshù, me se' num neghù yu nekô.

⁸Ṅwa'ni Nsi bwôgmbwe ntshob ndù: O ke' kô, ke yab ntù num tshule'te Nsi, tshu neghamte Nsi, tshu neton ngamte Nsi yi mba tshu nele'te Nsi num nukebwô, là bo num mfà tshem tshu là, mb'a be ntùm ntshù' là,

⁹a bèn ntshob ndù: Tshù, me se' num neghù yu nekô. Ndùlala, a biagte mbwe nu, nte mbatt'é.

¹⁰Ndùlala, ntùm yen nekô là, be tù' ben nelàn njam wut Yésu Kristô, z'a be ju neghamte Nsi yoṅ ntshù' num njoṅ yoṅ tse fa là.

¹¹Mba zit ngale'te Nsi lo num tsin tù mba sit lé'njù lo, mfa' fa' Nsi, mfà be tshule'te Nsi ntshù' yoṅ yàme, ts'a ke' ku'ni nebiagte nukebwô là.

¹²Là Kristô lo fà ta' jule'te Nsi num nukebwô ntshù', ntswe num bag bu Nsi ze zwim yoṅ ntshù',

¹³fe ndonni a tshwèt mbébe, tà kum ngelaṅ ze Nsi ma' ghakeban tse mba ko' nku tun nku mi là.

¹⁴Nummbe a tshùa njam ta' ju neghamte Nsi ntshù', ngù ben tse bo lànte yub là bwô miagte yoṅ ntshù',

¹⁵mba Ywèt Nelàn kwé nta yen nu là be. Nummbe a lo bèn ntshob ndù:

¹⁶Tshùaben tshob ndù: Yen nà b'a kàn se me nsi wat bag à bo ngelaṅ tshen lé'njù li nsi tôg là; mba ndù: Me nsi ghù ntshù' màm tsho ntùm ntù tshobe, me nsi kit'é ntùm zenu yube.

¹⁷Me ke nsi bèn kwimte nukebwô tshob mba mfànnu mube.

¹⁸Dù' ze nelagte nukebwô be là, nefà ju nele'te Nsi ke' bèn mbe.

¹⁹Fèt tshàm, ndùlala, bag à bin ku'ni netsho ntùm dù' nelàn njam lem Yésu,

²⁰num manze nswe, manze ntùn z'a nabte be netèt nzwe ndà Nsi, yen nà b'a ndù mbàb wul i là.

²¹Bag à bin ghù ngale'te Nsi ze ndùb ze bo yab i num ndà Nsi là.

²²Ndùlala, bag à bin ghebte, ngù ntù nenùn ntùm nedun bamntù, be tse bo lànte ntù be num nze ntù ze kebwô, nsôg wut be ntse nelàn nà.

²³Bag à bin tshùb bamntù be, ntshob i ntùm nenywinte, ke nyi'te, nummbe mèn z'a bù nka'ni là, b'a mèn nenùne.

²⁴Bag à bin zi tshùalo num be, be be, ndù bag à bin nànte num nkôni mba mfa' mebwô,

²⁵kà bag à bin ghua' ko' ntse'te be, mb'a be matnu tsemo' benntùn nà, bag à bin tagte wut be, be be; bin ghù ndùlala, mba bin yen ndù lé'njù tshwèt ngebte là.

²⁶Nummbe, a be ze be tse be kwé nelàn nenùn be ghù nukebwô, nke ndèn nà, mba mo' jule'te Nsi num nukebwô ke' bèn mbe,

²⁷là, ntùm nebwôge, a bwô nebéb netsho'te ntsha mba ngwatmbwôg z'a nsi kù ghatatu là.

²⁸Mèn z'a ma' ntshù' Mosé njam nà num nkwù ngelaṅ ze ben bàa ke tat lo kwé nta là, bo ke ko ndèn mi.

²⁹Bin ke' kwate ndù nevù ntsha z'a tshùate là nsi vù num mèn z'a nyiaṅte Mén Nsi nku, ndo' lem kàn ts'a lànt'é là mba ju nesagte là, ntshabte Ywèt kondèn nà ké?

³⁰Nummbe bag à bin lèn mèn z'a tshob ndù: Neyagte mba' b'a yàm nu, me nsi bèn keb ntsha; mba ndù: Tshùaben nsi tsho'te nzwil i là.

³¹A bwô nebwôg nevù ntùm mbu Nsi z'a be ntùn nà!

³²Bin kwimte mbwe lé'njù tse bin na' nde' ntsho ntùm bwe, mfènte nge' yàme, ngelaṅ bo lànte miag min nà;

³³ntùm mo' bag i, bin lo tù' tshu zwi tse bo tshabte, mbèn ngùtni yub là; ntùm mo' bag i, bin lo tù' shun ben tse bo yen be lèn nge' mbit là.

³⁴Bin lo tamte bin à ghandàtsha ntùm nge' yub; bin lo bam ntùm tsiaṅte ndù bo sate tshu tsine, mba bin lèn ndù bin ghù ju tanjoṅ z'a tswe yoṅ ntshù' là.

³⁵Ndùlala kà bin ghua' nenywinte zin ze ntsho'fa' mi ndùb be ntùm bwe là.

³⁶Nummbe a bwô bin fèn ntù, ndùlala ndù bin ghù ze nekô Nsi, nkwé ju z'a ka' bin nà.

³⁷Nummbe, a tù' à metsili, metsit ngelaṅ, mèn z'a se' là nsi se'e, a ke nsi ghubte.

³⁸Mèn netsin àm nsi yôg à njam bamntù, là, a be z'a tum ntsin njam nà, mba ntù àm ke nsi kô i.

³⁹Là, mba be là, be ke' b'a ghatum ntsin njam num nebi, là be b'a ghabamntù num nekwé yôg.