Read Medumba Héber 11 Bible Online

Héber 11 - Medumba bible

Héber 11

¹Bamntù b'a neta ntom tshu tse be num nywinte là, a num nda'te tshu tse be ke' be yen nà be.

²Ba mbwe lo tshùa num i, nkwé kwénta mebwô.

³Njam bamntù be lèn ndù ntshob Nsi bèn nabte njoṅ njù fa, a ndùlala ju ze be num njen nà ke' fe à tshu ts'a be bo tum num miag be là.

⁴Njam bamntù, Abél lo fà jule'te Nsi mebwô Nsi ntshùa Kain, a lo tshùa num bwe, nkwé kwénta ndù a b'a mèn netsine, Nsi lo kwé nta tshule'te Nsi tse, a tshùa à num i k'a nke' nke ntshobte, mba mb'a kwù là.

⁵Njam bamntù, bo lo ket Hénok ndù k'a yen vù, bo lo ke bèn njen i, nummbe Nsi lo kel i; nummbe bo lo kel i, a kwé kwénta ndù a bwô Nsi.

⁶Là bamntù be ke be, mèn ke ku'ni nebwô Nsi. Nummbe a bwô ndù mèn z'a tshwèt ngebte mbaṅ Nsi là bam ndù Nsi num bwe, mba ndù Nsi b'a mèn z'a tshwèt ngebte mbaṅ Nsi là bam ndù Nsi num bwe, mba ndù Nsi b'a mèn z'a num mfà ntsho'fa' ben tse bo num ndiag i là.

⁷Njam bamntù, Noa ze Nsi na' ntshob tshu tse bo ke' yoṅ njen nà yi là, lo kom kenu ntùm nebwôg Nsi ndù a yôg tunndà i; a lo tshùa num bwe, naṅ ntsha tu njù, ntù' njùndà nunetsin ze bo ke nkwé njam bamntù là.

⁸Njam bamntù, Abraham ze Nsi na' ntsiaṅ i là lo ju' ntshu i, nèn du' z'a nsi tù' ntsi' mi là, a nèn ke lèn du' z'a nèn nà.

⁹Njam bamntù, a lo be ngùn ntùm ngô nka'ni mb'a b'a ntùm ngô ba tum nà, ntswe ntùm ntàb, bo Isak mba Yakob, tse bo be jùndà nka'ni ntshù' là.

¹⁰Nummbe a lo ke mbéb ngô z'a ghù tseba' neta, ngô ze Nsi bèn mbe ngave mba ngakut ba' là.

¹¹Njam bamntù, mba Sara lo ku'ni neto'te nzwit, mba ngu'njù tse tôgte là, nummbe a lo lo' mèn z'a bù nka'ni l'a mba mèn nenùn nà.

¹²A ndùlala, ta' mèn lo bwe benntùn yàme, mba mb'a na' ntù' nekwù là, bo yàm mba nsa mfe kamànyam nà, njàm mba nkwa kaṅ dibantse là, mèn ke ku'ni nesiaṅte.

¹³Njoṅ yub fa lo kwù ntùm bamntù, ke kwé tshu tse Nsi na' nka' bo là, là bo lo yen yub ngùanesà, ntsha'te yube, mbam ndù bo b'a ghùn mba ghakatte num nsitsha'a.

¹⁴Ben tse bo tshwèt ntshob ndùlala là ke nda't'a ndù bo tshwèt ndiag mo' ngô.

¹⁵A na' mbe ndù nzi ngô ze bo tum bwe là lo ke nja yube, mba bo lo ghù ngelaṅ nebèn bwe.

¹⁶Là nzi ngô mebwô bèn nke nja yube, ngô kamànyam. A ndùlala Nsi ke' ko tuswe netsiaṅ tu wul i Nsi yub; nummbe a nabte mo' ngô bo.

¹⁷Njam bamntù, Abraham ze Nsi laṅt'é là, lo fà Isak num jule'te Nsi, a fà nkwi mén i ntshù', yi z'a na' nkwé nka'ni,

¹⁸yi ze Nsi na' ntshob yi ndù: Lén nzwil o nsi tum à num Isak là;

¹⁹a lo ke nkwate ndù Nsi ku'ni nebam fe ben num vù dù' z'a bèn nkwé mén i ntùm tànkùt là.

²⁰Njam bamntù, Isak lo naṅ mbotni num Yakob mba Esau num tshu ts'a nsi se' là.

²¹Njam bamntù, Yakob z'a tù' nekwù là, lo naṅ mbotni mba num zit mén Yosèf lo, nkwim ntunkekwi' mi nsi, nji'te tu kôg se.

²²Njam bamntù, Yosèf lo be miagte yôg se, nkwimte mba bon Israél nsi tum nà, ntshob ndù bo be tum ndo' mvôg mi.

²³Njam bamntù, tà Mosé mba màab lo lem i maṅwù tat, ngelaṅ bo bwe i là, nummbe bo lo yen ndù mén bwô, ke bwôg ntshù' mfen.

²⁴Njam bamntù, Mosé lo gha nebe mén ngon Faraon, ngelaṅ a ku' là,

²⁵nkô ndù bo ghùtni i bo nzwit Nsi ntshùa netsiaṅte ntùm nukebwô, tsiaṅte z'a nsi tôg là,

²⁶ndo' nge' Kristô mba ju ndùb z'a tshùa tshunkàb Egipto là, nummbe a lo ke ndôt'a ntsho'fa' mi mànjam.

²⁷Njam bamntù, a lo tum Egipto ke bwôg yantù mfen, ngù tànntù mba mèn z'a yen ju ze mèn ke' be yen nà.

²⁸Njam bamntù, a lo nabte Pasa, mfètte lem ndùlala ndù kà ngabagte mbwe bon kwag yube.

²⁹Njam bamntù, bo lo dut dibantse meba mba bo b'a num tsha' njum nà, là ba Egipto tse bo ke ndut njam bo là, ntse lo ket yube.

³⁰Njam bamntù, kàbngô Yériko lo vù nsi, ngelaṅ bo diaṅ i mbum num lé'njù sammbàa là.

³¹Njam bamntù, Rahab kattù mènnzwi lo ke bi boa ghakebam, nummbe a lo lo' ba ntom ntùm fite.

³²Me nsi bèn tshob à ndùke? Me lo nke ntshob nu num Gédéon, Barak, Samson, Yèfté, David, Samuél mba ghatshob ntshob Nsi, mba ngelaṅ nsi bwoṅ me,

³³njam bamntù, tshen ben ni lo tshùa ba nufen ntsho, ngù nunetsine, nkwé ba nka'ni, nen ntshu ba ngwayit,

³⁴mbiagte neta mbwôge, ntum ntùm ntshu ntshùag ṅwi, ntù' ben neta ntùm ngokèt, ntù' ben neta ntùm ntsho, nta' ntshu ntsho ba ghùn.

³⁵Bènnzwi lo kwé ben tshob tse bo kwù, mbèn ndo num vù là. Bo lo bwe'te tsemo'o, nummbe tshen ni gha ndù bo kag yube, ndùlala ndù bo kwé nelo num vù z'a bwô ntshùate là.

³⁶Bo lo tshabte tsemo'o, ndab yub nshua'a, nkut yube, ma' yub ndàtsha,

³⁷ntamte yub ndoṅ, ndaṅte yube, nkebte yube, bo kwù num ntshùag ṅwi, bo lo be ba tshakendà, nke nket ngub njùmbwe ke mbwe lo, ntù' bwoṅbwoṅ, njennge', njen ngùtni,

³⁸bo tse njù na' mbe ke lo' yub là lo ke ntsha num kônkwa, num mbale, ntùm ngabloṅ mba ntùm tô tsha'a.

³⁹Njoṅ tshen ben nà fa lo ke kwé kwénta mebwô num nu bamntù yube, là bo lo ke kwé ju ze Nsi na' mbù bo là,

⁴⁰ndùlala ndù kà bo bwô miagte ke be ndù bag à bin bo bèn mbe, nummbe Nsi lo yab ju z'a bwô ntshùate là be.