Read Medumba Héber 12 Bible Online

Héber 12 - Medumba bible

Héber 12

¹Ndùlala, mba njoṅ tshen ghakwénta li diaṅ be mbum mba ndot là, be ghua' njoṅ lèt fa mba nukebwô z'a lat num be là, nkù nde ntùm fènntù, nkum dù' ze bo la'te be là,

²nte miag num Yésu z'a be neto'te mba nemiagte bamntù là, yi z'a na' nga tsiaṅte ze be la'te yi, njen nge' fanta'tù, ngwag tuswe, ntswe nsi num bag ko'fen Nsi ze zwim nà.

³Bin lôt'é, yi z'a fènte lèn yen tshabte li bu ghaghù nukebwô là, ndùlala ndù kà bin bot ntùm ntù tsine, ngua' fènntù.

⁴Bin ke' yoṅ ntsin mbwe lem ntùm ntsho ze bin à nukebwô tshwèt ma' là.

⁵Bin lagte ntag mi bo tshob bin mba bon nà: Mén àm, kà wag mbu mi Tshùaben lab o yi là, ke ghua' fènntù ngelaṅ z'a tshobt'o là,

⁶nummbe Tshùaben num ndab mèn z'a num nkô i là, a num ndab ben ts'a lo' yub mba bon tse là nshua'a.

⁷Bin fènte mbu mi Tshùaben lab zin yi là, nummbe Nsi ke ngù bin à mba bon tse là. A zit mén ze tà ke' be lab i à ?

⁸A be ze bin tum ntshu mbu mi bo num ndab njoṅ yub fa yi là, mba bin b'a bon ghàne, ke b'a ko' bon.

⁹Ba tà be tse mbàb wut lo lab be mbu, be nyàmte yube; a ke' lo mbwô ndù be fà wut nsi ntshùate mbwe Tà ba ywèt, nkwé yôg ké ?

¹⁰Nummbe bo lo ke ndab be mbu mba bo yen ndù a bwô là, num yôg tsemo' bon lé'njù, là tu wul i num ndab be num nu z'a ywimte be là, ndù be kwé ze be bag i ntùm nelàn i.

¹¹Njoṅ nelab fa ke ke mb'a tsiaṅte, là nenywine, num ngelaṅ mbile, là, a num mfà tàm fite z'a be nunetsin nà ben tse bo zi't'é là ngelaṅ mànjam.

¹²Ndùlala, bin so neta ntùm bu min mi a bot là, mba ntunkekwi' min mi a yub là,

¹³bin nabte manze netsin nku mine, ndù kà z'a be nke'ket là miagte mbagte, là ndù a yate.

¹⁴Bin diag neyôg ntùm fite bin à njoṅ benntùn fa, bin diag nelàne, z'a tag mèn, mb'a ke nsi yen Tshùaben nà.

¹⁵Bin zi tshùalo ndù kà sàm mèn bwoṅ kondèn Nsi, ndù kà sàm nga nezwe bit nkaṅe, ke kag tshu'tu, ndùlala ndù benntùn yàm tshùa njam i, ngone.

¹⁶Bin zi tshùalo, ndù kà sàm kattù, sàm mèn banban mba Esau z'a swèn nu ntshùambwe num ta' ka jujù là be netèt bin.

¹⁷Bin lèn ndù a lo be mànjam, ngelaṅ z'a ke nkô nekwé ntsi' mbotni là, bo ghua' i, nummbe a lo ke fon nekaṅ ntù, mb'a na' ndiag i ntùm ntsenyà là.

¹⁸Bin ke' ghebt'a mbaṅ ju z'a be mèn kwag là: Mbwôg nekù, ndot, nesène, njame, fetmbaṅ,

¹⁹ntô nta, tshu'te ntshobe, ben tse bo ju' i là lo bètte ndù kà mèn bèn ntshob sàm nu bo;

²⁰bo lo ke ku'ni nefènte men ntshob là: A be ze mba nyàm kwag mbat là, mba bo nsi tamt'é ndoṅ;

²¹ju ze bo ke njen nà lo kag bwôg kà Mosé tshob ndù: Me tshwèt mbwôge, kà nke mvètte.

²²Là bin ghebt'a mbaṅ mbat Sion, ngô Nsi z'a be ntùn nà, Yérusalém z'a kamànyam nà, bwoṅ Angél, ntse'te tsiaṅte,

²³ntse'te mbwe bon tse bo kite ndèn mub ntùm kamànyam nà, Nsi ngatsho'te ntsha njoṅ benntùn fa, ba ywèt ben netsin tse bo bwô miagte là,

²⁴Yésu nganze kàn nswe, lem nelànte ts'a be ntshob mebwô ntshùa tse Abél là.

²⁵Bin bàm nà, kà bin gha mèn z'a tshwèt tshob là; nummbe a be ze tshen ben nà tse bo na' nga mèn z'a tshob ntshù' Nsi bo num tsha' ke' tum ntshu Nsi, a be ze be tam mèn z'a tshwèt ntshob mfe kamànyam nà mvèn be là.

²⁶Mèn ze nz'é na' nyi'te tsha' fe mbwe là mfà nka'ni ndonni, ntshob ndù: Tu wul àm, me nsi bèn nyi'te dù' mo' yoṅ i, ke b'a nda' tsha'a, là mba kamànyam.

²⁷Men ntshob li ndù: Mo' yoṅ i ke nda't'a ndù tshu ts'a nyi'te yub là, Nsi bate, nummbe bo b'a tshu nenabte, ndùlala tshu ts'a ke' nyi'te yub là tswe yoṅ ntshù'.

²⁸Ndùlala, mba be kwé nufen z'a ke' be nyi'te là, bag à bin tshùb yen kondèn nà, mfa' fa' Nsi ntùm nebwôg i mba ntùm nku'ni, mb'a bwô i là.

²⁹Nummbe Nsi be b'a mbwôg nekù.