Read Medumba Héber 2 Bible Online

Héber 2 - Medumba bible

Héber 2

¹A ndùlala, a bwô ndù be lat num tshu tse be ju' là kua' mebwô, mbwôg ndù kà bo fiag be num bo.

²Nummbe a be ze ntshob mi nsi tshùa njam ba Angél, ntshob là tsin tù là, a be ze njoṅ mfànnu fa mba njoṅ nebe ke ju' ntshu fa kwé ntsho'fa' mi a ku'ni là,

³mba bag bin nsi kù, a be ze be wag lèn sen yôg li l'à ndùke? Sen yôg li, Tshùaben lo bwôgmbwe ntshob i, ben tse bo na' nju' i là te i mbwe bag ndaṅndaṅ,

⁴Nsi tshùa njam Ywèt Nelàn ts'a fi'i, mb'a kô là, nkwé nta mube.

⁵Nummbe Nsi ke' ma' njù z'a nsi se'e, njù ze bag tshwèt ntshob l'a tun nku ba Angél.

⁶Mo' mèn kwé nta mo' ndù: Mènntùn b'a ke, k'o nke nkwimt'é à? Mén mèn b'a ke, k'o nke ndôt'é à?

⁷O kôgt'é num mo' mén ngelaṅ mbwe ba Angél. O te nkuni mba ghamte num i,

⁸o ma' njoṅ tshu fa tun nku mi. A ma' njoṅ tshu fa tun nku mi, yen nà b'a ndù Nsi ke' faṅ sàm ju ke ma' tun nku mi. Là ndonni, bag à bin ke' yoṅ njen mba Nsi ma' njoṅ i fa tun nku mi là.

⁹Là bag à bin yen mèn ze Nsi kôgt'é num mo' mén ngelaṅ mbwe ba Angél là, z'a tshùa njam nge' vù z'a yene, Nsi te nkuni mba ghamte num i là; njam kondèn Nsi, a lo bwô ndù a kwù num tu njoṅ benntùn fa.

¹⁰Yi ze njoṅ tshu fa fe à yi, ze njoṅ tshu fa b'a num i là, lo kô nesoṅte bon yàm ntùm nkuni, njen ndù a bwô mfen yôg sob bwô miagte, ndùlala a yen nge' kà mbwô miagte.

¹¹Nummbe mèn z'a num ndànte là, mba ben tse bo lànte yub là, njoṅ yub fa tum à num ta' mèn; a ndùlala, a ke' ko tuswe netsiaṅ yub fèt tse,

¹²ngelaṅ z'a tshob ndù: Me nsi soṅ lén so fèt tshàm; me nsi nyàmt'o ntùm ntse'te là.

¹³Mba ndù: Me nsi nywinte num i; mba ndù: Tshù, me li mba bon tse Nsi fà me là.

¹⁴Ndùlala, mba njoṅ bon fa b'a tse lem mba mbàb là, tu wul i lo tù' ze be ndaṅndaṅ, ndùlala ndù a tshùa njam vù se mbiagte tà vù, yen nà b'a ndù: Satan,

¹⁵mba ndù a kwé njoṅ benntùn fa tse nebwôg vù na' ntshùb yub mba kuan ntùm njoṅ yôg sob fa là.

¹⁶Nummbe a lo ke lo' à ba Angél, là, a lo lo' à nzwit Abraham.

¹⁷A ndùlala, a bwô ndù a tù' ndaṅndaṅ mba fèt tse là num njoṅ tshu fa, ndùlala ndù a tù' ngakondèn mba ngale'te Nsi ze ndùb ze nenùne, num tshu ts'a be mbwe Nsi là ndù Nsi tshùa num i, nko ndèn nzwit mèn num nukebwô.

¹⁸Mba bo na' ndaṅte tu wul i ntùm nge' z'a na' njen nà, a ku'ni neywimte ben tse bo laṅte yub là.