Read Medumba Héber 9 Bible Online

Héber 9 - Medumba bible

Héber 9

¹Mbwe kàn lo ghù ntshù' num fa' mba dù' nelàn ze ntùm njù.

²Bo lo kut ntàb; nka' mba téblé bàn le'te Nsi lo be ntùm mbwe to' i, ze bo ke ntsiaṅ dù' nelàn nà;

³njam mbatte nzwe bàa, ntàb ze bo ke ntsiaṅ dù' nelàn ntshùate là lo be bwe,

⁴ndù a ghù tômbwôg gol num labinda mba Koṅ Kàn se bo se' i gol ndiaṅ mbum nà; kàb gol z'a ghù mana là, kôg Aron s'a bit nkaṅ nà, mba tafèt kàn lo be ntùm Koṅ Kàn;

⁵mba kérubim nkuni lo be num Koṅ, nke nkabte dù' kondèn netshaṅ yub, yen ni ke b'a ngelaṅ netote tshen tshu là.

⁶Yen ni b'a mba bo nabte njoṅ tshu fa là: Ghale'te Nsi num ntsho ntùm mbwe ntàb njoṅ ndù fa num nefa' fa' Nsi,

⁷là ntùm mbatt'é, ngale'te Nsi ze ndùb ke ntsho bwe tù' i, yoṅ ntshù' num ta' ngu'njù, a ke' be tag ke fà lem num ko' mi mfànnu mba mi benntùn.

⁸A ndùlala, Ywèt Nelàn num nda'te ndù manze dù' nelàn ntshùate ke' yoṅ nte nge, a be ze mbwe ntàb ke' là.

⁹A b'a tànkùt num yen ngelaṅ ni. Yen ntàb là b'a dù' ze bo ke mfà tshu neghamte Nsi mba tshu nele'te Nsi ts'a ke' ku'ni neghù ngafa' fa' Nsi bwô miagte ntùm nzentù i là,

¹⁰nummbe tshen tshujù là, tshen tshu nenu là, mba tshen kwéntse nzenze là b'a nda' ntshù' mbàb wut ts'a nsi tswe tà kum ngelaṅ netsiagte là.

¹¹Là, Kristô ngale'te Nsi ze ndùb num tshu mebwô ts'a nsi se' là, se'e, ntshùa netèt ntàb ze ndùb ntshùate mba ze mebwô ntshùate, ze mbu mènntùn ke' bèn nkut là, yen nà b'a ndù z'a ke' b'a ze ntùm njù là,

¹²a tsho ntùm dù' nelàn ntshùate yoṅ ntshù' num njoṅ yoṅ tse fa, ke tshùa njam lem mfot mbwe mba mfotmfô, là, a tshùa njam ko' tse lem, mfon netshu' z'a tswe yoṅ ntshù' là.

¹³Nummbe, a be ze lem mfot mbwe mba lem mfot mfô mba bwembwôg mfô tse bo fètte num ben tse bo sagte là lànte yub ndù mbàb wut yub làn nà,

¹⁴bag à bin lèn ndù lem Kristô z'a tshùa njam Ywèt ts'a tswe yoṅ ntshù', mfà tu wul i Nsi, kelo' là, nsi lànte nzentù be num mfa' nekwù ndù be fa' Nsi z'a be ntùn nà.

¹⁵A ndùlala, a b'a nganze kàn nswe, ze vù se tshu' mfànnu mi benntùn ghù ntùm mbwe kàn ndù ben tse Nsi tsho' yub là kwé ntsi' mi a tswe yoṅ ntshù' mi Nsi ka' bo là.

¹⁶Dù' ze ntag vù be là, a bwô nela'te ndù ngafà ntag vù kwù,

¹⁷nummbe ntag vù ke mbe ntag vù à ngelaṅ ng'é kwù là, a ke' ghù neta ngelaṅ ng'é ke' ntùn nà.

¹⁸A ndùlala bo lo be to' mba mbwe kàn, ke tag ke fètte lem.

¹⁹Nummbe ngelaṅ Mosé miagte netshob njoṅ ntag ntshù' fa benntùn nà, a lo' lem mfot mfô mba lem mfot mbwe boa ntse, nyiaṅ meba mba nzenyi, mfètte num ṅwa'ni Nsi mba num njoṅ benntùn fa,

²⁰ntshob ndù: Yen ni b'a lem kàn se Nsi wat bin à bo là.

²¹A fètte lem num ntàb mba num njoṅ nkab fa' le'te Nsi fa be ndaṅndaṅ.

²²Be bo tshob ndù bo ke ndo' à lem, ndànte njoṅ tshu fa yi, ndaṅndaṅ mb'a be ntùm ntshù' là; lem be ke fètte mba nelagte nukebwô ke be.

²³Ndùlala, a lo bwô ndù bo lo' tshu nele'te Nsi, ndànte mfuni tshu ts'a be mfe kamànyam nà yi, là, a lo bwô ndù bo lo' tshu nele'te Nsi ts'a bwô ntshùate là, ndànte tshu ts'a be mfe kamànyam nà yi.

²⁴Nummbe Kristô ke' tsho à ntùm dù' nelàn ze mbu benntùn bèn nkut, mfuni ko' dù' nelàn nà, là a tsho à kua' mfe kamànyam ndù a tsin mbwe Nsi num tu ben ndonni.

²⁵A ke tsho bwe à num nefà tu wul i yoṅ yàme, ndaṅndaṅ mba ngale'te Nsi ze ndùb be ntsho ntùm dù' nelàn mba zit ngu'njù lo bo lem ts'a ke' b'a tse là,

²⁶nummbe, mb'a lo bwô ndù a yen nge' yoṅ yàm fe ngelaṅ nenabte njù, là ndonni, ntùm miagte ngelaṅ, a tsin bwe yoṅ ntshù' ndù a tshùa njam jule'te Nsi i, ma' nukebwô njam.

²⁷Mb'a be ndù benntùn be nkwù yoṅ ntshù', ntù' ke mbéb à netsho'te ntsha là,

²⁸be ndaṅndaṅ Kristô z'a fà tu wul i yoṅ ntshù' num nebiagte nukebwô ben yàm nà kwù, a nsi bèn se' mbatte yoṅ bàa ndù a bagte nukebwô, num yôg ben tse bo tshwèt mbéb i là.