Read Medumba Yakobo 2 Bible Online

Yakobo 2 - Medumba bible

Yakobo 2

¹Fèt tshàm, bin ghù bamntù Tshùaben be ze nekuni Yésu Kristô, ke ke ndôte se sàm mèn.

²A be ze mo' mèn tsho ntùm ntse'te zin, ndù a so kwa gol, nket ṅwa'ṅwa' nzwe, mo' mbwoṅ bèn ntsho ze bwe ndù a ket ntsha nzwe là,

³a be ze bin lôte ngaket nzwe ṅwa'ṅwa' ntshob yi ndù: Tu wul o, tswe nsi nsen ni num dù' mebwô, là ntshob mbwoṅ ndù: Wù, tsin tù nsen nà, ke ndù: Tswe nsi tun ko' nku màm no là,

⁴mba bin ke ke netôte netèt bin ké, mba bin ke ke ndo' à nkwate kebwô ntsho'te yi ké?

⁵Fèt tshàm tse nkôni, bin ju'u! Nsi lo ke tsho' ben tse bo be bwoṅbwoṅ num miag njù là, ndù bo be ghankàb ntùm bamntù, njù ndà nufen Nsi z'a ka' ben tse bo num nkô i là ké?

⁶Là bin, bin num ngwag mbwoṅ. A ke b'a ghankàb bèn nke ngùtni zin ké? A ke b'a be bo bèn nke nsoṅ zin nte mbwe ndàntsha ké?

⁷A ke bèn mb'a bo bèn nke ntshabte mbwô lén se bo be ntsiaṅ zin yi là ké?

⁸Ndùlala a be ze bin ze ntshù' mfen, mb'a be ntùm ṅwa'ni Nsi là: Ke nkô mèn z'a ghebte mbaṅ o là mb'o num nkô tu wul o là, mba bin ghù a bwô.

⁹Là, a be ze bin num ndôte se mèn nà, mba bin ghù nukebwô, ntshù' naṅ ntsha tu bin mba ghafànnu là.

¹⁰Nummbe mèn z'a ze njoṅ ntshù' fa, là mfàn mo' ta' i là, mb'a tù' ngavù ntsha num njoṅ i fa.

¹¹Nummbe mèn z'a tshob ndù: Kà ghù màndà là, bèn ntshob mba ndù: Kà zwi mèn. A be z'o ke' ghù màndà, là nzwi mèn nà, mb'o tù' ngafàn ntshù'.

¹²Bin tshobe, mbèn ngù ndaṅndaṅ mba ben tse bo nsi tsho'te yub ntùm ntshù' netum kuan nà.

¹³Netsho'te ntsha ke' ghù kondèn num mèn z'a ke' ghù kondèn nà. Kondèn be nta' nsoṅ mbwe netsho'te ntsha.

¹⁴Fèt tshàm, a ywimte ke, mb'a be mèn tshob ndù a ghù bamntù, ke be ndù a ghù mfa' l'à? Bamntù ku'ni neyôg i ké?

¹⁵A be ze ta' mfèt ze mandum ke ze mènnzwi lo be tunntôg, nke mbwoṅ jujù ta' lé'njù là,

¹⁶là, a be ze mo' mèn netèt bin tshob bo ndù: bin nèn ntùm fite, bin tshètte mfùag num bin, bin ywèle, là ke fà tshu tse wut tshwèt mbètte là bo là, mb'a ywimte ke?

¹⁷A be ndaṅndaṅ num bamntù: a be z'a ke' ghù mfa' là, mb'a kwù ntùm bwe.

¹⁸Mèn ghù netshob ndù: Wù, o ghù bamntù, tu wul àm, me ghù mfa'; la'te bamntù o me ke mfa', tu wul àm me nsi la'te bamntù àm wù njam mfa'.

¹⁹Tu wul o, o num mbam ndù ta' Nsi num bwe ntshù'. A bwô! Mba ba ywètkebwô num mbame, nke mvètte.

²⁰Mèn banban, o kô nezi'te, ndèn ndù bamntù ke mfa' ke' ghù ntun mi ké?

²¹Abraham tà be lo ke tù' mèn netsin njam mfa', mb'a na' mfà mén i Isak num tômbwôg nele'te Nsi là ké?

²²O yen ndù bamntù lo ke mfa' bo mfa', bamntù ke mbwô miagt'a njam mfa'.

²³Ndùlala ju ze ṅwa'ni Nsi tshob là bumte ndù: Abraham lo bam Nsi, bo siaṅte yen nà yi mba nunetsin nà, bo lo tsiaṅ i nshun Nsi.

²⁴Bin yen ndù mèn ke ntù' mèn netsin à njam mfa', ke b'a nda' njam bamntù.

²⁵Be ndaṅndaṅ mba Rahab kattù mènnzwi lo ke tù' mèn netsin à njam mfa', ngelaṅ z'a lo' ghantum, ngù bo tshùa manze ghua, nèn nà ké?

²⁶Ndaṅndaṅ mba wut z'a ke' ghù zwiag b'a fe i là, be ndaṅndaṅ mba bamntù z'a ke' ghù mfa' là kwù.