Read Medumba 1 Pétro 2 Bible Online

1 Pétro 2 - Medumba bible

1 Pétro 2

¹Ndùlala bin ghua' njoṅ nukebwô fa, njoṅ nkùnkù fa, mfùm, ghe'te, mba njoṅ tshabte fa.

²Bin kù ntù num ko' mbùn ntshobe, mba bonfi là, ndù a ghù bin ku'u, nkwé yôg,

³a be ze bin zwi'te nju' mba Tshùaben bwô là.

⁴Bin ghebte mbaṅ i, yi loṅ ntùn se benntùn na' ngua'a, a be se netsho' mba se tanjoṅ mbwe Nsi là.

⁵Mba tu wut tsin tse bin be mba ndoṅ ntùn nà, bin tamte nkut ba' Ywèle, ntù' ntshufa' le'te Nsi ze nelàne, ndù bin fà tshule'te Nsi tse Ywèt ts'a bwô Nsi njam Yésu Kristô là.

⁶Nummbe a ntùm ṅwa'ni Nsi ndù: Tshù, me yab loṅ tôgba' se netsho' mba se tanjoṅ mà Sion; mèn z'a bam i là, tuswe ke nsi ko i.

⁷Ndùlala, a b'a ghamte bin tse bin bam nà, là loṅ se ghabomndà ghua' là kaṅ ntù' loṅ tôgndà,

⁸loṅ nefa'te, loṅ ywi' num ben tse bo ke' bam nà. Bo ke mfa'te bwe à nummbe bo gha neju' ntshobe, Nsi lo yab yub num yen dù' là.

⁹Là bin b'a nzwit ze Nsi tsho' là, ntshufa' le'te Nsi mfen, ngô nelàne, nzwit ben tse Nsi tse'te là, ndù bin tshob mfa' mebwô mèn z'a tsiaṅ zin ntùm njame, num nka'ni i ze neghamte là.

¹⁰A lo be mbwe, bin ke b'a nzwit Nsi, là ndonni bin b'a nzwit Nsi; Nsi lo ke ko ndèn mine, là ndonni a ko ndèn mine.

¹¹Fèt tshàm tse nkôni, me tsiaṅ zin tse bin b'a ghùn mba ghakatte là ndù bin kù ghe'te mbàb wut ts'a num ma' mèn ntsho là.

¹²Bin ghù yôg mebwô netèt ghakelèn Nsi tse bo num ntshabte zine, nke ndo' zin mba ben kebwô là, ndù mfa' min mi mebwô gha' miag mube, bo ghamte Nsi ntùm lé'njù nelôte.

¹³Bin fà wut nsi mbwe ntenu benntùn, num Tshùaben, k'a b'a mbwe mfen mba

¹⁴ba ngomna lo, k'a b'a mbwe kam ts'a tum yub ndù bo naṅ ntsha tu ghaghù nukebwô, nyàmte ghaghù numebwô là lo.

¹⁵Nummbe yen nà b'a ze nekô Nsi ndù bin ghù numebwô, mem ntshu kagni tse bo ke' lèn nà.

¹⁶Bin ghù njoṅ i fa mba ben tse bo tum kuan nà, ke lo' netum kuan nkabte nukebwô yi, là bin ghù mba kuan Nsi là.

¹⁷Bin ku'ni njoṅ benntùn fa, nkô njoṅ fètfèt fa; bin bwôg Nsi, nku'ni mfen.

¹⁸Ghafa', bin fà wut nsi mbwe tà tsin ntùm njoṅ nebwôg fa, ke b'a nda' mbwe tse mebwô mba tse nefite, là mba mbwe tse netshùage.

¹⁹Nummbe yen nà b'a kondèn Nsi mb'a be mèn fènte nge' z'a yen ke ntun mi, mb'a lèn Nsi là.

²⁰Ghamte b'a yà, a be ze bin fènte nshua' à num mfànnu min n'à? Là, a be ze bin fènte nge' à nummbe bin ghù numebwô là, mb'a b'a kondèn mbwe Nsi.

²¹Yen nà b'a ju ze bo na' ntsiaṅ zin num bwe là, nummbe mba Kristô lo yen nge' num tu bin, mfaṅ mfi' bin, ndùlala ndù bin zin num ze manze, ntam njam i,

²²yi z'a ke' ghù nukebwô, yi ze nkùnkù ke' tum ntshu i,

²³yi ze bo so ndon tu i, a ke so ndon tu mèn; yi z'a yen nge' ke tshètte, là mfà njoṅ i fa mèn z'a num ntsho'te ntùm netsin nà;

²⁴yi z'a ket nukebwô ntùm wul i num fanta'tù ndù a fagte be num nukebwô, ngù be yôg num nunetsine, yi ze ntshu mfaṅ tse ghù bin yate là.

²⁵Nummbe bin lo be mba njùmbwe tse bo fàn manze là, là ndonni bin bèn njam mbaṅ ngabéb mbwe mba ngalôte ntù tsine.