Read Medumba 1 Pétro 4 Bible Online

1 Pétro 4 - Medumba bible

1 Pétro 4

¹Ndùlala, mba Kristô na' njen nge' ntùm mbàb wut là, mba bin zin ma' yen nkwate là num bin mba ju ntsho là: Mèn z'a na' njen nge' ntùm mbàb wut là mi bo nukebwô,

²ndù k'a bèn neyôg à num ghe'te benntùn, là num neghù ze nekô Nsi, ngelaṅ z'a ke' ntùm mbàb wut là.

³Nummbe, a lo be mbwe, bin nke ngù ze nekô ghakelèn Nsi, yen ngelaṅ nà ze bin na' nke nzin ntùm ngùa, ghe'te, nebum ndu', nejù yàme, nenu yàme, ṅu'u, neghamte nsi neto là, yen ngelaṅ nà ku'u!

⁴A ndùlala ghakelèn Nsi tshwèt ntshàm mba bin ke' nekù nde bin à bo ntùm yôg ngùa s'a bag ntshùate là, nke ntshabte zine.

⁵Mèn z'a tshwèt nse' tsho'te benntùn mba fe ben nà nsi bètte yub nu num yôg sobe.

⁶A num ndùlala ze bo tshob nkùn mebwô mba fe ben nà, ndùlala ndù ben tse bo na' ntsho'te yub num mat mènntùn ntùm mbàb wut là, yôg num mat Nsi ntùm Ywèle.

⁷Miagte ngelaṅ num njoṅ tshu fa ghebte. Ndùlala bin ze nu, nzi tshùalo, nde'te Nsi.

⁸Njôg mbe kà bin bot neghù nkôni netèt bin, nummbe nkôni be nkabte nukebwô yàme.

⁹Bin ke ndo' ghùn netèt bin ke tshobte tun ntô.

¹⁰Ndaṅndaṅ mba ghalé' nzenze kondèn Nsi là, bin fa' bin bin ndù mba we lo fà ju kondèn z'a kwé là.

¹¹A be ze mèn tshwèt ntshob là, a tshob ntshob Nsi; a be ze mèn tshwèt mfa' là, a fa' ntùm neta ze Nsi fà yi là, ndùlala ndù Nsi be neghamte ntùm njoṅ tshu fa njam Yésu Kristô, ze ghamte mba neta be yi ngu'ngu' là. Amén.

¹²Fèt tshàm tse nkôni, kà bin tshàm num ndum mbwôg z'a se' netèt bin num nelaṅte zin nà, kà bin lo' i mba nu nswe là.

¹³Là bin tsiaṅte mba bin tamte bin à Kristô ntùm nge' tse là, ndù bin bèn ntsiaṅte ntùm tsiaṅte ngelaṅ Kristô tswite nkuni mi là.

¹⁴Bin b'a ghafen, a be ze benntùn tshabte zin num lén Kristô là, nummbe Ywèt nkuni, Ywèt Nsi num ntswe num bin.

¹⁵Kà sàm mèn netèt bin yen nge' à mba ngazwi mèn, ke ntshô, ke ngaghù nukebwô, ke ngatsho ntùm nu benghua lo,

¹⁶là, a be z'a yen nge' à mba mènkristô là, k'a ko tuswe, là, a ghamte Nsi ntùm sen lén nà.

¹⁷Nummbe ngelaṅ ku' ze netsho'te ntsha nsi to' à ntùm Ndà Nsi là. A be z'a to't'a num be là, mb'a nsi miagt'a ndùke num ben tse bo ke' bam nkùn mebwô Nsi l'à?

¹⁸A be ze mèn netsin tum à ntshu vù là, mb'a nsi b'a ndùke num ghakeghamte Nsi mba mèn kebwô à?

¹⁹Ndùlala, a bwô ndù ben tse bo tshwèt njen nge' mba Nsi kô là fà ntù tshob Mbom mèn ze nenùne, ntùm neghù numebwô.