Read Medumba 2 Pétro 1 Bible Online

2 Pétro 1 - Medumba bible

2 Pétro 1

¹Me Simon Pétro, nkuan mba ngantum Yésu Kristô. Me kite yen ṅwa'ni li à ben tse bo kwé bamntù tanjoṅ ndaṅndaṅ mba bag là, njam nunetsin Nsi be mba ngayôg be Yésu Kristô là.

²Kondèn mba fite be bin yàm yàme, njam nelèn Nsi mba Yésu Tshùaben be.

³Neta i z'a be ze Nsi là lo fà njoṅ tshu fa ts'a ku'ni num yôg mba num neghamte Nsi là be, ngù be lèn mèn z'a tsiaṅ be njam ko' nkuni mi mba fa' se se mebwô là;

⁴a lo tshùa njam bwe, mfà nka'ni tanjoṅ, nka'ni ndùbndùb be, ndù bin tshùa njam bo, nkù nebagte ze ghe'te kag ntùm njù là, nèn ntamte num ze nebe Nsi.

⁵A ndùlala, bin kagtùn ntùm njoṅ zin neta fa, njab fa' mebwô ntùm bamntù zine, njab nelèn ntùm fa' mebwô,

⁶njab nebe mèn ntùm nelène, njab nefènte ntùm nebe mèn, njam neghamte Nsi ntùm fènte,

⁷njab nekô fètfèt ntùm neghamte Nsi, njab nkôni ntùm nekô fètfèle.

⁸Nummbe, a be ze tshen tshu là be num bin, njam nà, mba bo ke nsi ghù bin tswe banban, ke yam ntàme, num nelèn Tshùaben Yésu Kristô.

⁹Là mèn ze tshen tshu là ke' be num i là, b'a mfùmiag, a ke' be yen ngùanesà, a lagte ndù bo lo lànte njwèn nukebwô tse.

¹⁰Fèt tshàm, a ndùlala, bin nànte kua' neshu, mfà tànntù netsiaṅ zin mba netsho' zin. Nummbe bin ghù ndùlala mba bin ke nsi vù sàm lé'njù.

¹¹Ndùlala, bo nsi te nzendà nufen z'a tswe yoṅ ntshù' là nge mba bin, nufen Tshùaben be, mba ngayôg be Yésu Kristô.

¹²A ndùlala, m'a' ke nkwimte tshen tshu là bin, mba mba bin à lène, mba mba bin à ghù tànntù ntùm nenùn z'a bwe là.

¹³Me lo' yen ni mba njo là nekam zin num miaglo ntùm ntag màm, njoṅ ngelaṅ fa ze me ke' ntùm yen ntàb li là.

¹⁴Nummbe me lèn ndù a tù' mén nda'nda' me tum ntùm ntàb àm, ndaṅndaṅ mba Tshùaben be Yésu Kristô na' nda'te me là.

¹⁵Me nsi ke kagtùn ndù bin ke nkwimte tshen tshu là njoṅ ndù fa mba me nsi nèn nà.

¹⁶Nummbe bag lo ke zin à njam nkùt zenu tatte kà ngù bin ndèn neta Tshùaben be Yésu Kristô mba ngelaṅ z'a nsi se' ntùm nkuni mi là, là miag mag lo yen neghu' i ze ndùb.

¹⁷Nummbe a lo kwé ghamte mba nkuni Nsi Tà, ngelaṅ nze mèn na' ntshob yi ntùm nkuni ndùb ndù: Yen ni b'a Mén àm ze me num nkô i, mbèn njab ntù àm fa num i là.

¹⁸Bag lo ju' nze mèn z'a na' nswe' kamànyam, ngelaṅ bag à bo na' mbe num mbat nelàn nà.

¹⁹Bag à bin ghù ntshob ghatshob ntshob Nsi mi a ta là, bin ghù a bwô mba bin nèn mbaṅ bwe là, a b'a lambo s'a tshwèt nké' ntùm dù' nesènte tà nkum ngelaṅ lé'njù nsi se'e, nsa nkebnjù tum ntùm ntù tsin nà.

²⁰Bin bwôgmbwe ndèn yen ni ndù ntshob Nsi mi a ntùm ṅwa'ni Nsi là ke' b'a ju ze be mènntùn tote ze tu là.

²¹Nummbe ntshob Nsi ke' to' se' ntùm ze nekô mènntùn, là Ywèt Nelàn na' mbèn ntènte benntùn kà bo ntshob nu num ze tu Nsi.