Read Medumba 2 Pétro 2 Bible Online

2 Pétro 2 - Medumba bible

2 Pétro 2

¹Là ghatshob ntshob Nsi tse tatte lo be ntùm ngô, be ndaṅndaṅ ghatswite tse tatte nsi tum netèt bin; bo nsi se' boa netswite nzenze, ts'a nsi ghù benntùn bi là, bo gha tàndà z'a na' ntshu' yub là, nsoṅte nebagte ma' num tu wut tshob ndende.

²Benntùn yàm nsi tam njam bo ntùm yôg sob se ngùa; a nsi tshùa num bo, benntùn tshabte manze nunenùne.

³Ntùm ze'te bo nsi tshùa njam ntshob tatte lo' zin ta ntàn yi; netsho'te ntsha z'a nsi vù num bo là tshwèt nse'e, yub nebi ke' zi miaglo.

⁴Nummbe, a be ze Nsi na' mbe ke ko ndèn ba Angél tse bo ghù nukebwô, là ma' yub ntùm gheme, ntùm nkù njame, ndù bo béb netsho'te ntsha bwe là,

⁵a be ze Nsi na' mbe ke ko ndèn njwèn njù là, là ndem Noa, ngatshob nunetsine; mo' mèn netèt ben fome, ngelaṅ z'a kag dibambaṅ num njù ghakeghamt'é là.

⁶A be ze Nsi na' ngù ngô Sodom mba ngô Gomora tù' mbwembwôg ngwù ntùm nebagte, ndù bo be mfi' ghakeghamt'é tse bo nsi se' là,

⁷a be ze Nsi na' nkwé Lot mèn netsine, ze yôg ngùa ben kebwô ke ngùtni là,

⁸nummbe yi mèn netsine, z'a ke njôg netèt bo là lo ke njen nge' ntùm ntù i ze netsin njoṅ lé'njù fa, ngelaṅ z'a ke njen mbèn nju' mfa' mub mi kebwô là.

⁹Ndùlala Tshùaben lèn nekwé ghaghamt'é ntùm laṅte, là ndèn nelé' ben ketsin mum lé'njù netsho'te ntsha z'a nsi naṅ ntsha tu bo là,

¹⁰njôg mbe ben tse bo num nzin ntùm ghe'te ṅu' njam mbàb wut, nke ngwag Tshùaben nà. Bo b'a ghata'nku, ghako'tewut, ke be bwôg netshabte ba nkuni,

¹¹mba mba ba Angél tse bo tshùa yub ntùm neta ke' be bote tshen nkuni là ntùm tshabte mbwe Tshùaben nà.

¹²Là bo b'a mba ba nyàm tse bo ke' ghù zenu, tse bo ke njôg nda' num yôg mbàb wut, nke mbéb ndù bo ghom yub, mbagte yub là; tshen ben nà num ntshabte tshu tse bo ke' lèn nà; ntùm yub nebagte, bo nsi bagte yub be ndaṅndaṅ.

¹³Bo kwé nuketsin mba ntsho'fa' là ntùm nuketsin yub, yôg sob b'a neke ntsiaṅte neghù nukebwô njoṅ lé'njù fa, bo b'a ghaṅu'u, ghaghù lo', bo num ntsiaṅte netatte zine, ngelaṅ bin à bo tshwèt njù mbèn nke nu là;

¹⁴miag mub dun nu màndà, bo ke' be bot neghù nukebwô, bo num nsoṅte ben tse bo ke' ghù tànntù là; bo ghù ntù z'a zi'te neze'te là, bo b'a bon ndon.

¹⁵Bo kag manze netsine, mbi, bo b'a num manze Balaam mén Béor, z'a na' nkô ntsho'fa' nuketsin,

¹⁶là bo tshobt'é num mfànnu mi là: Nyàm z'a ke' be tshob là lo tshob num nze mènntùn, ntshèt ngatshob ntshob Nsi ntùm zwiaṅt'é.

¹⁷Bo b'a ntôntse ke ntse, bo b'a ndot tse fetmbaṅ tshwèt ntèn yub là, bo lé' njam nesènte bo.

¹⁸Ntùm ko'tewut, bo num ntshob ntshob banban, nke nsoṅte ben tse bo lo nekù ghafàn manze là njam ghe'te mbàb wut z'a be ntùm yôg ngùa là;

¹⁹bo num mbù netum kuan bo, mba mba tu wut tshob b'a kuan nebagte là; nummbe mba we lo b'a nkuan mèn z'a num ntô i là.

²⁰Nummbe a be ze ben tse bo na' nkù ṅu' njù ntùm nelèn Tshùaben mba ngayôg be Yésu Kristô bèn ntsho bwe, mfaṅ bo tô yub là, mba yub miagte nebe nsi bag ntshùa mbwe i.

²¹A lo bwô bo ndù kà bo lèn manze nunetsine, ntshùa nelène, mbèn ntam ntshù' nelàn ze bo fà bo là mvèn yub.

²²Ju ze nkùt nenùn ke ntshob là tum bo: Mbù bèn njam num ju z'a ywi' là; ngùnyàm ze bo sôg i là tsho ntùm tô netob.