Read Medumba 1 Yohané 4 Bible Online

1 Yohané 4 - Medumba bible

1 Yohané 4

¹Fèt tshàm tse nkôni, kà bin bam njoṅ ywèt fa, là bin laṅte ywèle, njene, a be ze bo fe à Nsi là, nummbe ghatshob ntshob Nsi tse tatte yàm tum, nse' ntùm njù.

²Tshù, yen ni nsi ghù bin lèn Ywèt Nsi; njoṅ ywèt fa tse bo be mbam Yésu Kristô z'a se' ntùm wut mbàb wut là fe à Nsi,

³là njoṅ ywèt fa tse bo ke' bam yen Yésu là ke' fe à Nsi; tshen nà b'a ywèt ngakeban ze bin na' nju' ndù a tshwèt nse' là, ndonni a b'a ntùm njù.

⁴Bontsit bon tshàm, bin fe à Nsi, bin lo à tshùa yube, nummbe mèn z'a be num bin nà b'a mèn ndùb ntshùa mèn z'a be ntùm njù là.

⁵Mba bo là, bo b'a ba ntùm njù; a ndùlala bo num ntshob ntshob njù, njù nke nju' yube.

⁶Mba be là, be fe à Nsi; mèn z'a lèn Nsi là num nju' be; mèn z'a ke' fe à Nsi là, ke' be ju' be. A num ntshùa ndùlala, be lèn ywèt nenùne, mba ywèt tatte.

⁷Fèt tshàm tse nkôni, bag à bin ke nkôni be be, nummbe nkôni fe à Nsi; mba we lo z'a ghù nkôni là, Nsi bèn mbwe i, a lèn Nsi.

⁸Mèn z'a ke' ghù nkôni là, lo ke lèn Nsi, nummbe Nsi b'a nkôni.

⁹Tshù mba nkôni Nsi na' ntswite wul i num be li: Nsi lo tum nkwi Mén i ntshù' ntùm njù ndù be tshùa njam i, njôge.

¹⁰Nkôni b'a yen ni ndù: A ke b'a be na' mbèn nkô Nsi, tu wul i na' mbèn nkô be, a lo tum Mén i, ntshùa num i nko ndèn be num nukebwô.

¹¹Fèt tshàm tse nkôni, a be ze Nsi kô be ndùlala là, mb'a lo mbwô ndù mba be ke nkôni be be.

¹²Sàm mèn ke' to' yen Nsi; a be ze be num nkôni be be là, mba Nsi ghô num be, nkôni i bwô miagte num be.

¹³Ju z'a be ngù be lèn ndù be ghô num i, tu wul i ghô num be là, b'a ywèt ts'a fà be là.

¹⁴Mba bag là, bag lo yene, bag be nkwé nta ndù Tà lo tum Mén i, ngayôg njù.

¹⁵Mèn z'a bam ndù Yésu b'a Mén Nsi là, Nsi be ngô num i, a ghô num Nsi.

¹⁶Mba be là, be lo lène, mbam nkôni ze Nsi ghù num be là. Nsi b'a nkôni, mèn z'a ghô ntùm nkôni là, ghô num Nsi, Nsi ghô num i.

¹⁷Tshù, yen ni b'a mba nkôni ze Nsi ghù num bin bwô miagte là: Bag à bin tshwèt mbéb lé'njù netsho'te ntsha ntùm nenywinte, nummbe mb'a be là, a b'a mba be be ntùm yen njù li là.

¹⁸Nebwôg ke ntùm nkôni, là nkôni z'a bwô miagte là be nta' bwôg, nummbe bwôg ke nkwat'a nge', là mèn z'a be mbwôg là ke bwô miagte ntùm nkôni.

¹⁹Bag à bin ghù nkôni, nummbe a yi bèn mbwôgmbwe nkô be.

²⁰A be ze mèn tshob ndù: Me num nkô Nsi, là nke mbàn mfèl i là, mb'a b'a ngatatte. Nummbe mèn z'a ke' kô mfèl i z'a num njen nà, ke' ku'ni nekô Nsi z'a ke' be yen nà.

²¹Tshù ntshù' mi bag kwé yi li: A bwô ndù mèn z'a be nkô Nsi là kô mba mfèl i.