Read Medumba Ghasa'kame 10 Bible Online

Ghasa'kame 10 - Medumba bible

Ghasa'kame 10

¹Ndùse Abimélék tôg ze là, Tola nshum Pua, nshum Dodo, mèn Isakar, lo nsi ntshu' Israél. A na' nke ntswe à Shamir, num mbat Efraim.

²A lo be ngasa'kam Israél num ngu'njù ntshob tat ṅam mbàa; a kwù bo tshoṅ i Shamir.

³Tola be tôge, Yaïr ze Galad lo nsi, mbe ngasa'kam ntùm ngô Israél num ngu'njù ntshob bàa ṅam mbàa.

⁴Yaïr lo ghù nshumnshum ṅam ntat, bo nke nko' num nkekwèn ṅam ntat, ngù ntusô ṅam ntat, bo ke nke' ntsiaṅ men ntusô l'a ndù ntaṅla' Yaïr.

⁵Yaïr kwù bo tshoṅ i Kamon.

⁶Bon Israél bèn ngù nu z'a bag là num miag Tshùaben. Bo fa' Baal boa Astarté ts'a be nsi ba Siria, ba Sidon, ba Moab, nsi bon Ammon, nsi ba Filistia là, ngua' Tshùaben ke bèn nefa' yi.

⁷Yantù Tshùaben kam num Israél, a swèn yub mum mbu ba Filistia boa bon Ammon.

⁸Bo ma'ni yube, nzwite bon Israél yen ngu'njù là neshu, ngù ndùlala num ngu'njù ntshob fom gham num bon Israél tse bo be mba mo' yoṅ Yordan ntùm ngô ba Amor tse bo be Galad là.

⁹Bon Ammon dut Yordan nèn nde' mba Yuda, Benjamin bo tunndà Efraim ntsho. Israél na' mb'a ntùm nge' ndùb yen ngelaṅ nà.

¹⁰Bon Israél kua' ntsiaṅ Tshùaben ntshob ndù: Bag lo ghù nukebwô wù, nummbe bag lo ghua' o, wù Nsi yag, mfa' Baal.

¹¹Tshùaben tshob bon Israél ndù: Me lo ke tshu' zin bu ba Egipto, ba Amor, bon Ammon, mba ba Filistia ké?

¹²Ndùse ba Sidon, Amalék bo Maon ke ma'ni zin bin kua' me là, me lo ke tshu' zin mum mbu mub ké?

¹³Là, tu wut tsin lo ghua' àm, nke mfa' tsemo' nsi ghua. A ndùlala me ke nsi bèn tshu' zine.

¹⁴Bin nèn tsiaṅ nsi tse bin tsho' là, bo yôg zin num ngelaṅ nge' zin.

¹⁵Bon Israél tshob Tshùaben ndù: Bag ghù nukebwô, ghù num bag mb'o lèn nà. Nda' ndù a bwô o ko ndèn ntshu' yag sènni.

¹⁶Bo sô nsi ba tum ts'a be netèt bo là, mfa' Tshùaben, yen nu là kwag ntù Tshùaben num nge' Israél.

¹⁷Bon Ammon tse'te, nte mbàn Galad, bon Israél tse'te nte mbàn Mitspa.

¹⁸Ngô boa fenfen Galad tshob bo bo ndù: A zit mèn bèn to' bon Ammon ntsho à? Mba ng'é nsi be mfen njoṅ ba Galad fa.