Read Medumba Ghasa'kame 15 Bible Online

Ghasa'kame 15 - Medumba bible

Ghasa'kame 15

¹A lo be ghubte, num ngelaṅ netsho' ngefele, Samson nèn lôte nzwi i, njab mén mbwe yi. Samson tshob ndù: Me kô nenèn mbaṅ nzwi àm ntùm ze to'ndà. Là, ntse i ke bam ndù a tsho bwe.

²Ntshob yi ndù: Me lo kwate mb'o ghù nkembàn num i, mfà i nshun o. Metshab ntù'njam i ke' bwô ntshùa i ké? A bwô ndù o lo' i num ze tu.

³Samson tshob bo ndù: A be ze me ghù kebwô ba Filistia yen yoṅ i li là, mba yen nà ke' lôt'àm.

⁴Samson lo nène. A ghom mbù tshwèt nkù tat, ntamte nkun tshob nkut dù' ntshù', ndo' tswe'nka' njab netèt tshen nkun bàa là.

⁵A te mbwôg num tshen nka' là nkag tshen mbù tshwèt là ntùm nà nsa ba Filistia, nton tse nsa tse bo kùmte là boa ts'a ke' tù bo ke yoṅ nkeb là. A ghù ndùlala tà nèn nkum mba nà ntshom.

⁶Ba Filistia tshob ndù: We z'a ghù ndùlili à? Bo bùnte ndù: A b'a Samson ntse ze Timna nummb'a lo kwé nzwi i mfà nshun i. Ba Filistia ko' nèn nton i bo tàab.

⁷Samson tshob bo ndù: A mba bin ke ngù zin ni ké? M'a' be tsin ndù me yagte mba' njoṅ zin fa.

⁸A tsham yub kua' kebwô, ntsham yub ke ju' nze; yen nà be tôg a swe' nèn ndem ngabloṅ z'a ntùm gho mà Etam nà.

⁹Ndùlala ba Filistia ko' nte mbàn Yuda, nja' tà nkum Léshi.

¹⁰Ba Yuda tshob ndù: Numke bin nko' nse' kam yag à? Ba Filistia bùnte ndù: Bag se' ghom à Samson ba' ju z'a ghù bag là yi.

¹¹Ba Yuda ntu ntsha' tat swe' nèn ngabloṅ z'a ntùm gho mà Etam nà, ntshob Samson ndù: O ke' lèn ndù ba Filistia bèn nke ntô be ké? Ke z'o ghù num bag ndù à? Samson bùnte ndù: Me lo ba' ju ze tu wut tshob ghù me là bo.

¹²Ba Yuda bèn ntshob ndù: Bag swe' nse' à nekul o nèn mfà ba Filistia. Samson tshob ndù: Bin nu ngu me ndù bin ke nsi zwi àm.

¹³Bo bùnte ndù: Nga, bag nsi kul o nda' nekut fà bo; bag ke nsi zwi o. Ndùlala bo lo' mvèt nswe bàa nkul i yi, ngù a tum ngabloṅ.

¹⁴Ndùs'a kum Léshi là, ba Filistia lo' i à ntùm tshu'te bo tsiaṅte. Là Ywèt Tshùaben ghom i. Mvèt bàa ts'a ke nkinte mbu mi là tswe mba ndeb nzwe z'a kù mbwôg là, ntum mum mbu mi ngwùte nsi.

¹⁵Samson fon ta' ngagntshu kekwèn z'a ke' mfite là, ndo' ndab benntùn ntsha' mbùm yi.

¹⁶Nkua' ntshob ndù: Me lo' ngagntshu kekwèn njab nu yi, tshù mo' tse i li, tshù mbatt'é din. Me lo' ngagntshu kekwèn nzwi benntùn ntsha' mbùm yi.

¹⁷Yen nà be tôg a ma' ngagntshu nyàm nà ngùanesà ntswi lén dù' là ndù Ramat-Léshi.

¹⁸Mba ntù i kù neshu là, a tsiaṅ Tshùaben ntshob ndù: A b'a wù bèn mfà yen netshùa ntsho ndùb li ngafa' o. O bam ndonni ndù me kwù nzi ntse, ngwù ntùm mbu ba kesiket ké?

¹⁹Ndùlala Nsi bèt gho netshu s'a be Léshi là, ntse tum bwe. Samson nu ntse, neta bèn nse' yi, ngù a bèn nta. A ndùlala bo be ntsiaṅ sen lagntse là ndù: En-Hakkoré. Sen lagntse là ke' mba kua' sènni Léshi.

²⁰Samson lo be ngasa'kam Israél num ngu'njù ṅam mbàa, ndùse ba Filistia ke ntô yub là.