Read Medumba Ghasa'kame 18 Bible Online

Ghasa'kame 18 - Medumba bible

Ghasa'kame 18

¹Mfen lo ke be ntùm ngô Israél yen ngelaṅ nà. Ze tunndà Dan lo ke ndiag dù' ze bo nsi te bwe là, nummbe tô lo ke fà tshob tsha' netèt tse tunndà bon Israél fa.

²Bon Dan nèn netèt tshob tunndà ndo' neta bandum bwe tàn ntum yub Tsoréa bo Eshtaol ndù bo nèn ntom dù', ntsha' ngô kua' mebwô. Bo tshob bo ndù: Bin nèn ndôte ngô. Bo nèn nkum num mbat Efraim tà ntùm ndà Mika, nzi bwe.

³Ndùse bo be mbaṅ ba' Mika là bo ju' nze mèn Lévi, nkù'te nèn mbaṅ i ntshob yi ndù: We z'a lo' o nse' yi nsen ni à? Ke z'o tshwèt mfa' nsen ni à? O be nsen ni à ndùke?

⁴A bùnte bo ndù: Mika be ngù yen ni bo yen nà num àm. A be mfà nkàbfa' me, me nke mfa' yi mba ze ngale'te là.

⁵Bo tshob yi ndù: Bètte Nsi bag lèn a be ze yag nkatte nsi be mebwô num bag là.

⁶Ngale'te bùnte bo ndù: Bin nèn ntùm fite. Nkatte ze bin tshwèt nèn nà b'a num miag Tshùaben. A tshwèt njene.

⁷Tshen bandum tàn nà nèn nkum Laïs. Bo tèt ba ntùm ngô, ndù bo tswe tshob fite, nke njôg num ze mat ba Sidon, mbe mebwô, ke ke mbwôge; sàm mèn lo ke be ntùm ngô z'a tute yub mba metsil i là, ke bèn nke ntô yube. Bo na' mb'a ngùanesà num ba Sidon, ke bèn nke ntamte num tsemo' benntùn.

⁸Bo bèn njam mbaṅ fèt tshob Tsoréa bo Eshtaol, fèt tshob tshob bo ndù: Tshô ze bin se' yi là b'a zil à?

⁹Bo bùnte ndù: Bin se' be ko' nkam yub ntsho. Bag yen ngô, ndù a bwô neshu. A ndùke? Bin tswe ntshu mi' à ndùke? Kà bin lô, be ko' ma' yub ntsho, ndo' ngô à tù' ze be.

¹⁰Ndùse bin nsi tsho bwe là, bin nsi tèt ta' ngô z'a tswe ntùm fite là. Ngô zi neshu, Nsi fà i mum mbu mine. A dù' ndù sàm ju ke' bwoṅ bwe num njoṅ tshu fa ts'a num nsitsha' là.

¹¹Benntùn ntu nkù ntôg lo Tsoréa bo Eshtaol nène, ndù bo ket tshob tshu ntsho.

¹²Bo ko' nte mbàn Kiriat-Yearim mà Yuda; a ndùlala ze bo be ntsiaṅ yen dù' là z'a be njam Kiriat-Yearim nà ndù Mahané-Dan tà nkum mba sènni là.

¹³Bo lo nsen nà ntshùa num mbat Efraim, nzin nkum ndà Mika.

¹⁴Benntùn tàn tse bo na' nèn tsha' ngô Laïs là tshob fèt tshob ndù: Bin lèn ndù ta' éfod bo térafim, neto nekom ntùm mo' ba' netèt tshen nà ké? Ndonni tshù ju z'a bwô ndù bin ghù li.

¹⁵Bo kù'te nèn bwe, ntsho ndà mèn Lévi, ntùm ndà Mika, mbètt'é mb'a lo' ntswe yi là.

¹⁶Benntùn ntu nkù ntôg netèt bon Dan tse bo tshùb tshu ntsho là tsinte nzendà.

¹⁷Benntùn ntu tàn tse bo na' nèn ntsha' ngô là ko' ntsho ndà. Bo lo' neto, éfod boa térafim, mbe be ndùlala ngale'te b'a nzendà boa benntùn ntu nkù ntôg tse bo tshùb tshu ntsho là.

¹⁸Ndùse bo tsho ndà Mika ndo' neto, éfod boa térafim nà, ngale'te tshob bo ndù: Bin ghù a ke ndùlal'à?

¹⁹Bo bùnte yi ndù: Mi ntswe! Kab ntshu o. Se' bag bin nène, o nsi be tà yag, be yag ngale'te. Mebwô be wù à nebe ngale'te num ta' ndà ké ke nebe ngale'te ta' nzwit ke ta' tunndà lo ntùm ngô Israél à?

²⁰Ngale'te ghù tsiaṅte ntùm ntù i, ndo' éfod térafim mba neto, ntsho netèt ba soyé.

²¹Bo tam manze, ntshag bènnzwi boa bon, nyàm boa tshu tshob mbwe.

²²Ngelaṅ ze bo nèn tà ntù' b'a ngùanesà num ba' Mika là, ben tse bo ke ntswe ntùm mba' mi a be mbaṅ ze Mika là boa tse bo be ndà Mika là tse'te njab njam bon Dan.

²³Bo tsiaṅ bon Dan, bo kaṅ wut, ntshob Mika ndù: A ke z'a tsho tu o k'o nkamte benntùn à?

²⁴A bùnte ndù: Bin lo' nsi tshàm tse me na' nabte là bo ngale'te, ndo nke nèn tsine. Z'a bèn ntù' me là b'a ke? Bin bèn nke mbètt'àm ju z'a tsho tu àm nà.

²⁵Bon Dan bùnte ndù: Kà bèn nga' ntshu o mbwe bag, ntag ndùlala mb'a be ghayantù tsho' ngwù num o nsen nà o bi yôg so, bo se tunndà o.

²⁶Dan bèn ngwù manze nke nène, Mika be yen mba yub neta tshùa yub là, mbèn njam la' i.

²⁷A ndùlala bon Dan lo' ju ze Mika nabte là bo ngale'te z'a ke mfa' yi là, nèn nkam Laïs ntsho. A na' mb'a nzwit fite benntùn, mbe ndù bo tswe mebwô. Bo watte yube, nton ngô.

²⁸Mèn ke tshu' Laïs nummb'a na' mb'a ngùanesà mbaṅ Sidon, ba la' tse ke be tsho tsemo' benntùn shune. Laïs na' mb'a tômbo' s'a be ntèn nèn Bét-Rehob là. Bon Dan bèn nkut tusô, ntswe bwe.

²⁹Bo yab lén ngô ndù Dan, num lén tà yub Dan ze bo na' mbwe i Israél là; nda' ndù bo na' ke ntsiaṅ ngô là mbwe à ndù Laïs.

³⁰Bon Dan te neto tù, Yonatan nshum Guershom, nshum Manasé boa bon tse be ghale'te ntùm ze nzwit bon Dan tà nkum ndùse ngô nèn ndà kuan nà.

³¹Bo te neto là tù num yub tu num njoṅ ngelaṅ fa ze ndà Nsi na' nke' Silo là.