Read Medumba Ghasa'kame 19 Bible Online

Ghasa'kame 19 - Medumba bible

Ghasa'kame 19

¹A lo be yen ngelaṅ ze mfen be ke be Israél là, mo' mèn Lévi nèn nte la' tôg mbat Efraim. A so mo' mènnzwi bwe, ngon Bétléhém mà Yuda.

²Ntanta tum netèt bo, mènnzwi tum mbèn la' tàab, Bétléhém mà Yuda, ntswe bwe maṅwù kuà.

³Ndu i nèn ntèl i bwe, mfite ntù i ndo' i bèn yi la' i. Mandum nà lo ghù ngafa' i boa kekwèn bàa. Mènnzwi lo' i ntsho yi ndà tàab. Tà mènnzwi là be yen i, ndo' i kua' mebwô, ntùm tsiaṅte.

⁴Ntse i, tà mènnzwi tshùb i, a tswe la' i lé'njù tat. Bo jù, nu, nzi bwe.

⁵Njù làn num nkebnjù mbatte lé'njù kuà, bo lo nabte wut nenène, tà mènnzwi tshob ntse i ndù: Jù meju bàn ndo' ntshùb ku o yi kà njôg nène.

⁶A tswe nsi, bo yi ntu bàa jù mbèn nu ku ntshù'. Tà mènnzwi tshob ndungon i ndù: Bam nezi nsen ni, nzi ntswe'te ntù o, ṅwate.

⁷Mba ntse ndu mènnzwi li saṅlaṅ bwe là, mandum nà bam, mbèn nzi bwe yen tèttswe' là.

⁸A be mbatte lé'njù tàn, a lo nsi nkebnjù num nenène. Ndùlala ntse i tshob yi ndù: Me le't'o ndù o tswe'te ntù o, ntswe nsen ni tà nèn nkum mbotnjù. Bo jù jujù ntu tshob bàa.

⁹Ndu mènnzwi lo nke nèn bo nzwi i mba ngafa' i; là, ntse i, tà nzwi i tshob yi ndù: Tshù njù là z'a ke nsèn nà, bin zi nsen ni, tswe'te ntù o, ṅwate. A nsi be ndamnjù bin lo bam nkebnjù ntam nze nèn ntùm ntàb o.

¹⁰Mandum nà ke bam nezi, ndo nsi nène. A zin nkum mbwe Yébus z'a be Yérusalém nà boa kekwèn bàa ndù bo taṅ diaṅ mvèn bo mba nzwi i.

¹¹Bo lo be kum ntshu Yébus ndù njù kabte yàme. Ndùlala ngafa' tshob tàfa' i ndù: Be nèn nze tusô ba Yébusia li nzi bwe.

¹²Tàfa' i bùnte yi ndù: Nga, be ke nsi tsho ntùm tusô ba tum, dù' ze bon Israél ke bwe là. Be nsi nèn kum Guibéa.

¹³A bèn ntshob ngafa' i ndù: Be nèn nkum ntùm mo' dù' netèt tshen din, Guibéa ke Rama lo, nzi bwe.

¹⁴Bo bèn ntam manze, lagnyam be bi ndù bo kum mbaṅ Guibéa z'a b'a tse tsha' Benjamin nà.

¹⁵Bo nèn yen bag là num nenèn nzi Guibéa. Mèn Lévi là tsho, ntsin num nsém tusô. Sàm mèn ke lo' yub ndà i ndù bo zi bwe.

¹⁶Tshù, mo' njwèn mèn nke mfe tshwèt fa' mfetnjù. Yen mèn nà ke mb'a num mbat Efraim, nke ntswe Guibéa. Ben Benjamin na'

¹⁷mbèn mbe yen dù' là. A bù' miag mi njen ngakatte num nsém tusô. Njwèn mèn nà bètt'é ndù: O nèn à yà? Nke mfe à yà?

¹⁸A bùnte yi ndù: Bag nèn à Bétléhém mà Yuda, tà kum tôg mbat Efraim ze me be mén bwe là. Me lo nèn Bétléhém mà Yuda, ndonni me ke mbèn njam à ntùm ndà Tshùaben, sàm mèn ke be z'a ghù nelo' àm ndà i là.

¹⁹Mba ndùlala, bag ghù nenà nekém kekwèn tshag yi; bag ghù bàn num yag tu, ngù bàn mba num mônke' ghafa' tsho. Sàm ju ke tshwèt mbwoṅ bag.

²⁰Njwèn mèn nà tshob ndù: A bwô ndù fite be wù. Me bam neywimte num njoṅ tshu fa ts'a bwoṅ wù là. B'o ke zi num yen dù' li.

²¹A lo' yub nèn yi ndà i, mfà nenà kekwèn tshobe; ghakatte sôg nku mube, njù mbèn nu.

²²Ndùse bo ke ntsiaṅte ntùm ndà là, ba la' tse bo tusô, mbe ben kebwô là se' ndam ba' mbume, nke'te nzendà, ntshob njwèn mèn z'a be ngandà là ndù: Ghù mandum z'a tsho ndà o là tum njù bag nô i.

²³Tàndà tum nèn mbwe bo ntshob bo ndù: Nga me fèt tshàm, me le'te zin ndù kà bin ghù nukebwô. Mba yen mandum nà tsho ndà àm nà, kà bin ghù yen tshùaya'nu là.

²⁴Tu wul àm ghù ménngon ze bo ke' yoṅ ntabt'é là; yen mandum nà bèn ngù ta' mènnzwi. M'a' lo' yub ntum yi njù mfà bin, bin ghù num bo mb'a ko' ntù bin nà. Nda' ndù kà bin ghù lèn yen tshùaya'nu là num yen mandum nà.

²⁵Tshen ben nà ke kô neju' ju z'a tshob là. Ndùlala mandum nà lo' nzwi i ntum mfà bo njù. Bo lo' i, nzi njab nge' num i njoṅ tèttswe' fa kà nkum nkebnjù. Njù be ké'te bo ta' i a nèn.

²⁶A be bam nkebnjù mènnzwi là nèn ngwù nzendà mandum nà ze ndu i be bwe là, ntswe bwe kà njù làn ntèl i.

²⁷Njù làn mandum nà lo netam nze nène, ngab nzendà, là, ntèt nzwi i ndù a nyit nzendà, mbu mi yab num nkù'ndà.

²⁸A tshob nzwi i ndù: Lo nsi be tum nsen ni. A ke bùnte. Ndùlala ndu i yab i num ta' kekwèn nèn bo yi la' i.

²⁹Ndùs'a kum la' i là, a lo' bi nkebte nzwi i yi nkam nkam, a tum nkam ntshob bàa gham, a tumte ntùm njoṅ ngô Israél fa.

³⁰Njoṅ benntùn fa tse bo yen yen nu là là tshob ndù: Mèn ke' to' yoṅ njen lèn yen nu li fe mba bon Israél ko' mà Egipto là tà nse' nkum sènni. Bin lôte yen nu là kua' mebwô, njen nu bwe bin bin, ntshob nu mfà num bwe.