Read Medumba Ghasa'kame 21 Bible Online

Ghasa'kame 21 - Medumba bible

Ghasa'kame 21

¹Ba Israél lo nu ngu Mitspa ntshob ndù: Sàm mèn netèt ben ke nsi fà ngon i mén Benjamin.

²Ngô nèn Bétél, ntswe mbwe Nsi tà nkum mfetnjù. Bo tshag nze yub tù, mfètte ntsenyà yàme, ntshob ndù:

³Tshùaben Nsi yag, Nsi Israél, a ghù à ndùke kà ta' nzwit ntsi sènni netèt tse nzwit Israél à?

⁴Njù làn, ngô lo nsi, nkut ta' tômbwôg bwe, nton ba nyàm, mfà tshule'te tse nema' mbu.

⁵Bon Israél tshob ndù: We z'a ke' ko' netèt tse nzwit Israél fa nèn ntùm mbumte mbwe Tshùaben à? Nummbe bo lo nu ngu njoṅ yub fa ntshob ndù mèn z'a gha ke nèn mbaṅ Tshùaben Mitspa là, mba bo a' zwi i.

⁶Ndùlala nu tse bag bon Israél num nu mfèt yub Benjamin, bo nke ntshob ndù: Sènni ta' nzwit ke' bèn mbe netèt Israél.

⁷Bo nke ntshob bo bo ndù: Be nsi ghù à ndùke kà fon bènnzwi ben bo yôg ntsho l'à? Tshù, be lo nu ngu mbwe Tshùaben ndù be ke nsi fà tse be ngonngon bo.

⁸Ndùlala bo tshob ndù: Mo' ta' nzwit bwe netèt tse nzwit Israél z'a na' mbe ke nèn mbaṅ Tshùaben Mitspa là ké? Sàm mèn lo ke tum Yabès Galad nse' ntùm mbumte.

⁹Bo siaṅte benntùn njen ndù sàm ze Yabès Galad lo ke be bwe.

¹⁰Ndùlala mbumte tum soyé ntsha' ntshob bàa gham num Yabès Galad, ntshob bo ndù: Bin nèn ngwatte bandum boa bènnzwi mba bon bwe fa.

¹¹Tshù mba bin nsi ghù li: Bin nsi tam ntshù' num mba zit mandum no bo mba zit mènnzwi lo z'a lèn kunndà mandum nà.

¹²Bo fon ngonngon tse bo ke' tabte wut yub là netèt ba Yabès Galad ntu nkù kuà, ndo' yub nèn yi ntùm mbàn Silo z'a be ntùm ngô Kanaan nà.

¹³Njoṅ mbumte fa tum ba ntum ndù bo nèn ntshob bon Benjamin tse bo be num gho Rimmon nà ndù fite num netèt bo boa bo.

¹⁴Bon Benjamin bèn njam num yen ngelaṅ nà, bo fà bènnzwi tse bo be ke zwite yub netèt zwi Yabès Galad là bo. Là, tshen bènnzwi là ke ku' num njoṅ yub fa.

¹⁵Nu bag ngô neshu num nu Benjamin, nummbe Tshùaben lo yab nu num tse nzwit Israél.

¹⁶Ghakwé mbwe ntùm mbumte tshob ndù: Be nsi ghù à ndùke kà yen bènnzwi fà ben bo tù' à? Tshù, be lo biagte tse zwi ben Benjamin fa.

¹⁷Bo bèn ntshob ndù: A bwô ndù ben bo yôg netèt ze nzwit Benjamin nà lé' mub ntsi'i, ndù a tshùa ndùlala njoṅ tse nzwit Israél fa ke' tù.

¹⁸Là, be be ke fà tse be ngonngon bo, nummbe bon Israél lo nu ngu ntshob ndù: Ndon tu mèn z'a fà ngon i mén Benjamin nà.

¹⁹Ndùlala bo tshob ndù: Tshù, be be ngù jùa Silo mba zit ngu'njù lo. Silo b'a bag Bétél z'a tu là, mbe num bag nze z'a be ntumnyam, nke nko' nèn Bétél, Sikém nà. A b'a num bag Lébona z'a ntèn nà.

²⁰Ndùlala bo tagte bon Benjamin ntshob ndù: Bin nèn ndemte ntùm ba nkùa.

²¹Bin ke ndôte ndùse ngonngon Silo nsi tum ke nyiaṅ nà, mba we lo netèt bin tum ntùm nkùa ngom ze mènnzwi netèt bo, bin kù ndo' yub nèn yi ntùm ngô Benjamin.

²²A be ze tà tshob ke fèt tshob lo se' nsoṅ yag là, mba bag nsi tshob bo ndù: Bin fà yub bag, nummbe bag lo ke lo' bènnzwi njoṅ z'a ku' mb'a be mba we lo ghù ze là tshwèt ntsho. Bin ke bèn mfà yub bo. Ndùlala be bin ke be ghafànnu.

²³Bon Benjamin ghù ndùlala. Bo ghom bènnzwi num njoṅ bandum tse bo tù' là netèt ngonngon tse bo ke nyiaṅ nà, ndo' nèn yi ntùm yub ngô. Bo bèn nkut ntusô, ntswe ntùm bwe.

²⁴Be num yen ngelaṅ nà bon Israél bèn njam, mba we lo ntùm ze nzwit bo ze tunndà. Mba we lo bèn num tse tsha'a.

²⁵Mfen lo ke be Israél num yen ngelaṅ nà. Mba we lo na' nke ngù a mb'a bwô i là.