Read Medumba Ghasa'kame 3 Bible Online

Ghasa'kame 3 - Medumba bible

Ghasa'kame 3

¹Tshù ngô tse Tshùaben na' mfaṅ nelo' ndaṅte ba Israél tse bo na' mbe ke lèn ntsho Kanaan yi li.

²Yen nà na' mb'a nda' nelo' ntshagte zwiaṅ ben nswe yi num ntsho, nummbe bo lo ke lèn ntsho ts'a tôg mbwembwe netèt ba Israél là.

³A na' mb'a fenfen Filistia, njoṅ ba Kanaan fa, ba Sidon, ba Hévia tse bo ke ntswe num ba mbat Liban, neto' num mbat Baal-Hermon nèn nkum ntshu Hamat là.

⁴Tshen ngô li na' mb'a nelo' ndaṅte ba Israél yi, njen mbe ze bo nsi ze nkàn mi Tshùaben na' ntshùa njam Mosé nkite tà tshob là.

⁵Ndùlala ba Israél tswe netèt ba Kanaan, ba Hit, ba Amor, ba Férésia, ba Hévia boa ba Yébusia.

⁶Bo so ngonngon tshobe, mfà ko' tshob ngonngon nshumnshum tshobe, mbèn nke mfa' tshob nsi.

⁷Bon Israél ghù ju z'a ke' bwô là num miag Tshùaben. Bo lagte Tshùaben Nsi yub, nke mfa' Baal boa neto Ashéras.

⁸Yantù Tshùaben kam num Israél, a fà yub mum mbu Kushan. Rishéataim, mfen Mesôpôtamia, bo kuan tse num ngu'njù fome.

⁹Ba Israél kua' ntsiaṅ Tshùaben, a fà ta' ngatshu' yub bo num netshu' yube. Yen mèn nà na' mb'a Otniél, nshum Kenaz ntù'njam Kaléb.

¹⁰Ywèt Tshùaben tsho num Otniél, a be ngasa'kam ntùm ngô Israél, nto' ntsho. Tshùaben fà Kushan-Rishéataim mfen Mesôpôtamia z'a mfe tu là yi, a lab i ntsho.

¹¹Ngô ghù fite num ngu'njù ṅam nkuà. Yen nà be tshùa Otniél nshum Kenaz kwù.

¹²Ba Israél bèn ngù nukebwô num miag Tshùaben; Tshùaben so neta num Eglon, mfen Moab, nkam i nsi num bo, nummbe bo lo ghù kebwô num miag Tshùaben.

¹³Eglon ghun ba Ammon boa ba Amalék ntsho num ba Israél. Eglon tsho tshwèt ntsho num Israél, njab nge' num Israél, ndo' tusô ntene.

¹⁴Ba Israél be kuan Eglon mfen Moab num ngu'njù ntshob fom gham.

¹⁵Ba Israél kua' ntsiaṅ Tshùaben, a fà ta' ngatshu' yub bo. A mb'a Ehud, nkwéb, nshum Géra mèn Benjamin. Ba Israél tum i ndù a nèn mfà ju Eglon mfen Moab.

¹⁶Ehud lo tswe mo' bi tshùag njam bàa ndù a sag mba ta' kam bu là. A ke ndem i à bam nzwe num ntaṅkob i, bag fat se se zwim.

¹⁷A se' mfà ju Eglon mfen Moab; Eglon lo ghu' neshu.

¹⁸Ndùs'a miagte nefà là, a lo' ben tse bo ket ntshub là ntum yi;

¹⁹ndo' yub nèn yi tà nkum num fèt ndoṅ z'a ghebte Guilgal là, mbèn mbèn njam be kua' num nku mi; ntshob ndù: Me ghù ju netshob mfen. Mfen tshob ndù dù' zwime; ben tse bo be mbaṅ i là tum.

²⁰Ehud kù'te nse' mbaṅ mfen, ndù a tswe nsi ntùm ndà mfùag i num ngelaṅ z'a num ndum nà tù' i, ntshob ndù: Me ghù nkùn Nsi netswi mfen. Eglon lo num diaṅ se.

²¹Yen ngelaṅ nà Ehud lo' bu i ze kwéb ntsho' bi yi fal se se zwim, nso bam i.

²²Bi nèn bam i bo ngub i, nzit ko' mem ntshu i; nummb'a lo ke sô bi bam i. Yen nà be tshùa Ehud tôg njam ndà ntume.

²³A be tum tshùa bam ntshundà ndù a yà fùn ba nzendà to'ndà z'a be tù là.

²⁴Ndùse Ehud nèn nà, tshe' mfen yen ndù ba nzendà fa fùne. Bo tshob ndù: Mo' ndù mfen ke nyit'a nku mi ngua' a bu i ntùm to'ndà mfùag i ze ngelaṅ dum.

²⁵Bo béb neshu, kà mbot nebébe, nummbe ba nzendà lo b'a be nefùne. Ndùlala bo lo' ki ntsho' nzendà yi, ntèt mfen tàfa' yub ndù a nyit tètndà, ndù a kwù.

²⁶Ndùse bo ke mbéb là, Ehud kù, ntshùa Seira kà njà tôg fètndoṅ.

²⁷Ndùs'a yoṅ ṅwag là, a tô nta num mbat Efraim. Bon Israél swe' num mbat boa yi. A kwé mbwe, ntsin tu bo.

²⁸A tshob bo ndù: Bin yab njam àm, nummbe Tshùaben fà ba Moab ghakeban tsin bin. Bo swe' njam i, ndo' dù' ntse Yordan z'a be se Moab ndù a ke' tsho nsi là. Bo ke bam sàm mèn mba ntshù' tôg.

²⁹Bo zwite ba Moab yen ngelaṅ nà benntùn ntsha' gham, ben neta, ghangù', sàm mèn mba ntshù' ke tum ntshu bo.

³⁰Ngô Moab vù bu Israél sen lé'njù là. Ngô tswe fite num ngu'njù ṅam fome.

³¹Ehud be tôg ze, Shamgar nshum Anat bèn ndo ze, ndab ba Filistia ntu nkù ntôge, bo ta' kô nyàmna'. Mba yi b'a mo' ngatshu' Israél.