Read Medumba Ghasa'kame 5 Bible Online

Ghasa'kame 5 - Medumba bible

Ghasa'kame 5

¹Num sen lé'njù là, Débora bo Barak nshum Abinoam yob sen kwi li ndù:

²Fenfen lo nsi ntshùb tu ntùm ngô Israél. Ngô lo nsi ku ntshù' num nema' ntsho. A bwô ndù bin ghamte Tshùaben num bwe.

³Fenfen ju', kamkam kù' ntoṅ! Me nsi yobe, ṅ, me nsi yob kwi fà Tshùaben, me nsi yob kwi fà Tshùaben Nsi Israél.

⁴Wù Tshùaben, ndùs'o na' ntum Seir, ndùs'o na' ntsho ntùm nà Edom nà, tsha' na' nyi'te, kamànyam na' yage, ndot yag nkaṅ ntù' ntse.

⁵Ba mbat lo vètte mbwe Tshùaben, yen Sinaï là z'a be mbwe Tshùaben Nsi Israél là.

⁶A be num ze ngelaṅ Shamgar nshum Anat bo ze ngelaṅ Yaél, bo ghua' njoṅ manze fa; ben tse bo ke nkatte là nke ntshùa num manze ts'a ṅamte là.

⁷Fenfen lo ke ghù neta Israél, neta ke be bo ndùse me Débora ke ndo yàm nsi là, ndùse me Débora ke ndo yàm nsi mba ta' mà ntùm ngô Israél là.

⁸Israél lo tsho' à tsemo' nsi nswe; ndùlala ntsho se' kà ntsho nsém, mèn ke bèn njen tshètntsho ke kô lo ndà sàm mèn netèt ba Israél tse bo be nguan ntsha' ṅam nkuà ntùm ngô là.

⁹Me so ntù àm num fenfen Israél, nso ntù àm num ben tse bo tum netèt ngô mfùag wut nele' ntsho là. A bwô ndù bin ghamte Tshùaben.

¹⁰Bin tse bin be nko' num nkekwèn fôgtab, bin tse bin tswete num mata nkam nzwe, mba bin tse bin be nzin num manze là, a bwô ndù bin yob kwi mfà Tshùaben.

¹¹A bwô ndù nze ghama' két tsin netèt ntôntse nyàmte tshu mebwô tse Tshùaben ghù là, tshu mebwô tse ngatshagt'é ghù ngô Israél là! A tshùa ndùlala ze nzwit mèn Tshùaben swe' nèn mà nsém.

¹²Débora, bame, bame, bam me Débora, bam njob ta' kwi. Barak nshum Abinoam, lo nsi ndo' kuan ntsho nèn yi.

¹³Ndùlala metshé' nzwit mèn tshùa ben neta, Tshùaben ghù me yob ngu' num ba sa'nde'e.

¹⁴Ben bo ke ntswe Amalék là fe Efraim nse'e. Benjamin tsho netèt soyé ntam njam fenfen fe Makir nse'e. Ba tàndà ntsho fe Zabulon nse'e.

¹⁵Tse kamkam Isakar be boa Débora, Isakar tam njam Barak, nzin num nku mi nèn mà tômbo'o; netshàm nu lo b'a ze ndùb mbaṅ mi bon nta'ntse Rubèn.

¹⁶Ke na' bèn ngù bin ngô ntùm kin mbwe neke nju' mba ghabéb mbwe tshwèt ntsiaṅ bwoṅ mbwe tshob l'à? Netshàm nu lo be mbaṅ ben Rubèn mb'a ze ndùb.

¹⁷Galad lo ke lo ze dù'ntswe yoṅ Yordan. Dan na' ntsin num nsitima à numke? Aser lo tswe nsi nkaṅ dibantse, nke mfite num mi nkaṅntse.

¹⁸Là Zabulon b'a ngô ndù a lo bam vùkob. A lo be num Néftali à be ndaṅndaṅ mfe num dù' ṅaṅa.

¹⁹Fenfen lo se' nele' ntsho, ndùlala fenfen Kanaan le' yub ntsho Tanak mba ntse Megiddo; bo lo ke lo' ntsha' ntum yi, ke lo' nkàb ntum yi.

²⁰Bo tswe kamànyam nde' ntsho, nsa tsin num ntshagnze mub nde' Sisera ntsho.

²¹Fub Kison lo ket yub nèn yi, njwèn fube, fub Kison. Ntù àm ṅwate; nyiaṅte ba sa'nde' nku me ntù àm!

²²Tun nku nyàmdiaṅ lo lab nsi, ndùse bo ke nkù là, ndùse ghako' nyàm ke nànte nkù là.

²³Bin so ndon tu Meroz, Angél Tshùaben bèn ntshobe, bin so ndon, bin so ndon tu ba la' tse, nummbe bo lo ke se' ywimte Tshùaben, bo lo ke ywimte Tshùaben netèt ben neta.

²⁴Mbotni be Yaél nzwi Héber ze Kén, netèt bènnzwi. Mbotni be yi netèt bènnzwi tse bo be ntswe bam ntàb là.

²⁵Sisera lo bètte ntse, Yaél fà mbùn yi a nu; a lo fà mbùn mi a kut là yi ntùm ntu' nku'ni.

²⁶Yaél lo lo' mo' bu i ntshùb saṅ yi, ndo' bu i ze zwim ntshùb hama ghafa' yi. A lo lab Sisera, ntsit tu i, nya'te tu i, ntote mbaṅ tu i.

²⁷A vù num nku Yaél, a lo kôg ngwù nsi, a lo tsho' ntam nsi, a lo nyit nsi. A lo kôg ngwù num nku mi, a lo tsho' ntam nsi, a lo nyit nsi. Dù' z'a kôg ngwù bwe là, a lo tsho' ntam bwe, yôg ke bèn mbe num i.

²⁸Mà Sisera lo tsin tôndà, nke ndôte njam ghab tôndà z'a tote là, nkua' ntshob ndù: Numke kalig se nsèn nese' à? Numke nkalig mi nke nsoṅ nku nsi ndù à?

²⁹Kum bènnzwi tse bo be netèt zwi tse là bùnte yi, a bèn ntshob kua' ze tu wut ndù:

³⁰Bo ke' yen ntsha' ntsho ké? Bo ke' ghabte ké? Ta' ménngon ke bonngon bàa lo ke' be num ta' mandum ké? Bo ke' yen ntsha' z'a b'a nzwe ṅwa'ṅwa' là num Sisera ké? Nzwe ṅwa'ṅwa', tse bo vèn nà, ta' nzwe ṅwa'ṅwa', nzwe nevèn bàa, num nema' tô ntshùantsho.

³¹Tshùaben, a bwô ndù ghakeban tsho bi yub à be ndùlala! Ben tse bo be nkô o là b'a mba lagnyam, ndùs'a be ntum bo njoṅ ze neta fa là. Ngô lo tswe fite ndùse yen nà tôg là ngu'njù ṅam nkuà.