Read Medumba Ghasa'kame 8 Bible Online

Ghasa'kame 8 - Medumba bible

Ghasa'kame 8

¹Ben Efraim tshob Gédéon ndù: A ke lèn neghù li z'o ghù num bag ndù à? O na' mbe ke tsiaṅ yag ndùs'o ke nèn ma' Madian ntsho là numke? Mo' tonkèt ntanta be netèt bo.

²Là Gédéon bùnte bo ndù: Ke ze me ghù ntshùa zin à? Ntsha' ngefet ze Efraim lagte bén nà ke' tanjoṅ ntshùa ngefet ze Abiézer tsho' bén nà ké?

³Nsi fà fenfen Madian, Oréb bo Zéeb à mum mbu mine. A be ndùlala mba ze me ghù ntshùa zin yi là b'a ke? Ndùs'a na' ntshob ndùlili là, ntù yub z'a ke nja num i là fite.

⁴Gédéon kum Yordan, ndut boa ben nkù tat tse boa bo be là, nke nta' ba Madian mba mba bo na' mbot neshu là.

⁵A tshob ba Sukkot ndù: Me le'te zine, bin fà bàn me num ben tse bag à bo be là. Tshù, bo bot, me bèn nke nta' à Zébak bo Tsalmunna, fenfen Madian.

⁶Fenfen Sukkot bùnte ndù: Bu Zébak bo ze Tsalmunna yà be bu i ké, kà bag nke mfà bàn soyé tsho à?

⁷Gédéon tshob ndù: Mb'a bwô! Me nsi lo' njô ts'a kônkwa là boa nshua' kwékwénàndô lo' lab zin yi ndùse Tshùaben nsi fà Zébak bo Tsalmunna mum mbu màm nà.

⁸A lo bwe nko' nèn Penuél, mbètte babwe be ju ntshù'. Bo bùnte yi be ndaṅndaṅ mba ba Sukkot na' mbùnte là.

⁹A bèn ntshob ba Penuél yub ndù: Me nsi sate yen nesà ba' li ndùse me nsi tshùa ntsho, ke bèn njam nà.

¹⁰Zébak bo Tsalmunna na' mb'a Karkor boa soyé tshobe. Bo na' mb'a benntùn nguan ntsha' ntshob tàn gham, mbe ben tse bo tù' num ntshu ntsho njoṅ bon ntumnyam fa là. Nummbe benntùn ntsha' bon bàa nkù lo kwù netèt ba soyé.

¹¹Gédéon ko' num nze ghatswe ntùm ntàb, num bag Nobak bo Yogbeha z'a bentumnyam nà, ndab ntshu ntsho z'a be bwe, nke nkwate mb'a tum ntshu vùkob là.

¹²Zébak bo Tsalmunna kù, Gédéon ta' yube, ngom tshen fenfen Madian bàa là, Zébak bo Tsalmunna, mbiagte soyé tshobe.

¹³Gédéon nshum Yoas be fe ntsho nko' bag Hérès.

¹⁴A tshùb mo' ménnshum netèt ba Sukkot, mbètt'é nu, a kite ndèn fenfen boa kamkam Sukkot mfà yi. Bo be ben ntu ṅam sammbàa.

¹⁵Ndùlala, a nèn mbaṅ ba Sukkot ntshob ndù: Tshù Zébak bo Tsalmunna tse bin na' ntshùa num tu bo ntshabt'àm ni. Bin lo bètt'àm mbe bu Zébak bo ze Tsalmunna b'a bu àm ké, kà bin nke mfà bàn soyé tshàm tse bo bot di!

¹⁶A ghom kamkame ntùm tusô, ndo' njô ts'a kônkwa là boa kwékwénàndô ndo' ndab ba Sukkot yi.

¹⁷A sate mba nesà ba' z'a Penuél là, nzwite benntùn tse bo be bwe là.

¹⁸Gédéon bètte Zébak bo Tsalmunna ndù: Tshen ben tse bin na' nzwite yub Tabor là na' nke ntshù à ndùke? Bo bùnte ndù: Bo na' nke ntshù a mba wù là, mba zit lo ghù ntshù mén mfen.

¹⁹A tshob bo ndù: Bo na' mb'a fèt tshàm, mbe bon màa. Tshùaben z'a be ntùn nà lène, bin na' mbe ke zwite yub mba mba me ke nsi zwi zine.

²⁰A tshob Yeter tuswe i ndù: Lo tù nzwi yube. Là, ménnshum ke tsho' ṅwi, mbwôge, nummb'a na' nke' à mônke'.

²¹Zébak bo Tsalmunna tshob ndù: Lo tù tu wul o nzwi yage, nummbe mba we lo b'a mba neta i be yi là. Ndùlala Gédéon lo tù nzwi Zébak bo Tsalmunna. Yen nà be tôg a sô kwa s'a be tô kamél tshob là.

²²Ba Israél tshob Gédéon ndù: Sa' yage, wù, nshum o mba mén nshum o, nummb'o kwé yag mum mbu ba Madian.

²³Gédéon tshob bo ndù: Me ke nsi sa' zine, bon tshàm ke bèn nsa' zine. A b'a Tshùaben nsi bèn sa' zine.

²⁴Gédéon tshob bo ndù: Me ghù ta' ju ze me tshwèt mbètte zin yi là. Mba we lo fà nkwa mi bin lo' ntsha' yi là me. Ghakeban tshob lo ghù nkwa gol, nummbe bo na' mb'a ben Ismaél.

²⁵Bo bùnte yi ndù: Bag nsi fà wù kua' ntù ntshù'. Ndùlala bo nyitte ta' kummbaṅ nsi, mba we lo ma' nkwa mi a lo' ntsha' yi là bwe.

²⁶Nkwa gol mi Gédéon bètte là lo lèt tà nkum ndô nkàb gol ntshob sammbàa ntsha' mbùm, ke tùn nkwa mi ṅu' ke diaṅ mbume, mba' ntoṅ, boa nzwe meba tse fenfen Madian ke nket là, ke tùn mba nkwa mi a be tô kamél tshob là.

²⁷Gédéon lo' nabte ta' éfod yi nte ntùm se tusô Ofra, dù' z'a ntù' tunu kat njoṅ ba Israél fa là; a be ywi' Gédéon mba ze tunndà.

²⁸Bo kôg Madian mbwe bon Israél, k'a ke bèn mbù' tu i nsi. Ngô tswe fite num ngu'njù ṅam nkuà, num ngelaṅ ze Gédéon ke' ntùn nà.

²⁹Yérubbaal, nshum Yoas bèn ntùm ndà i.

³⁰Gédéon lo ghù bonnshum ṅam sammbàa, ts'a tum zwe' i là, nummb'a lo ghù bènnzwi yàme.

³¹Màndà i z'a be Sikém nà lo bwe mba ta' mén mandum yi, a tswi lén se ndù Abimélék.

³²Gédéon nshum Yoas ywèn kua' mebwô kà nkwù; bo tshoṅ i ntùm fi tàab Yoas, Ofra z'a na' mb'a tsha' Abiézer là.

³³Ndùse Gédéon kwù là, bon Israél bèn nto' nekat boa Baal, ndo' Baal-Bérit ngù yub nsi yi.

³⁴Bon Israél ke kwimte Tshùaben, Nsi yub, z'a na' ntshu' yub mum mbu njoṅ ghakeban fa tse bo diaṅ yub mbum nà.

³⁵Bo ke la'te sàm kwénta num tunndà Yérubbaal, Gédéon num njoṅ mebwô fa z'a ghù bo là.