Read Medumba Ghasa'kame 9 Bible Online

Ghasa'kame 9 - Medumba bible

Ghasa'kame 9

¹Abimélék nshum Yérubbaal nèn Sikém mbaṅ fèt màab, ntshob bo mba njoṅ tunndà tà màab fa ndù:

²Me le'te zin ndù bin ma' men ntshob li toṅ njoṅ ba Sikém fa. Mebwô be bin mb'a be benntùn ntu ṅam sammbàa, bon Yérubbaal tô zin nà ké, ke mb'a be ta' mèn ntshù' be mfen zin n'à? Bin bèn nekwimte mba ndù me b'a lem tsine, mbe kua' mbàb ntshù' bag à bin.

³Fèt màab tshob nu ba Sikém num ze njam. Bo soṅ yub njoṅ nu fa ts'a nsi là, ndùlala ba Sikém so ntù num Abimélék, nummbe bo lo ke ntshob ndù a b'a mfèt yub.

⁴Bo lo' nkàb ntùm ndà Baal-Bérit ṅam sammbàa mfà Abimélék, a lo' njun ben banban boa ghadiag ntsha njab njam i.

⁵A lo nèn ndà tàab, Ofra, ngwatte fèt tse, bon Yérubbaal num ta' loṅ ntshù'. Bo na' mb'a ntu ṅam sammbàa. Nda' Yotam, metshab mén netèt bon Yérubbaal bèn njôg, nummb'a lo leme.

⁶Ndùlala njoṅ ba Sikém fa tamte boa ghatswe tusô nèn tun tshalon se loṅla' be bwe là, ndo' Abimélék ngù mfen yi. Yen dù' là na' mb'a Sikém.

⁷Bo soṅ Yotam yen nu là. A nèn num tu mbat Garizim, ntshag nz'é tù nkua' ntshob ndù: Ba Sikém, bin ju' àm, Nsi bèn nju' zine!

⁸Ntù nèn neyo' ta' mfen z'a nsi tô yub là, ntshob ten olivia ndù: Tô yage.

⁹Là ten olivia bùnte ndù: M'a' gha mfèt màm mi bo be ndo' ngamte ba nsi boa benntùn yi là num nenèn nke ntô memo' ntù ké?

¹⁰Ntù tshob tshom ndù: Se' nke ntô yage.

¹¹Là, tshom bùnte ndù: M'a' gha ntàm màm mi a be mbotte là, ndamte là num nenèn nke ntô memo' ntù ké?

¹²Ntù tshob nkùa tù ndu' ndù: Se' nke ntô yage.

¹³Là nkùa tù ndu' bùnte ndù: M'a' gha ndu' màm mi a be ngù ba nsi boa benntùn nke ntsiaṅte num nenèn nke ntô memo' ntù ké?

¹⁴Ndùlala ntù tshob tswe'nka' ndù: Se' nke ntô yage.

¹⁵Là tswe'nka' bùnte ntù ndù: A be z'a b'a kua' nenùn mbe bin tsho' àm neke ntô zin nà, mb'a bwô bin se' ntswe bam netshaṅ àm. Ntag ndùlala mba mbwôg nsi tum ntùm tswe'nka' kù sédra mi a be Liban nà.

¹⁶Ndonni, bin lo' à ntù mebwô bo nenùn kà ntsho' Abimélék mba mfen nà ké? Bin ghù kua' ntù mebwô num Yérubbaal bo tunndà i ké? Bin be ghù num i ndùlala nkwimte mfa' mi a na' mfa' num bin nà ké?

¹⁷Tshù, tàa lo ma' ntsho num tu bin, nswèn yôg se vùkob, nkwé zin mum mbu ba Madian.

¹⁸Là, bin kam num tunndà tàa, nzwite bon tse ntu ṅam sammbàa num ta' loṅ ntshù', ndo' Abimélék nshum ngafa' i ze mènnzwi ngù mfen ba Sikém yi, nummb'a b'a mfèt zin.

¹⁹A be ze bin lo' à ntù mebwô bo ntù nenùn ngù yi ndùlala sènni num Yérubbaal bo tunndà i là, mb'a bwô! Mb'a bwô ndù Abimélék fà tsiaṅte bin, bin bèn mfà tsiaṅte yi ze.

²⁰Ntag ndùlala ta' mbwôg tum num Abimélék nkù ba Sikém bo tunndà Millo, mo' mbwôg bèn ntum num ba Sikém bo tunndà Millo nkù Abimélék.

²¹Yotam tshob ndùlala ndo nkù; a nèn Béer, ntswe ngùanesà num miag mfèl i Abimélék.

²²Abimélék lo tô Israél ngu'njù tat.

²³Ndùlala Nsi kag ywèt kebwô netèt Abimélék boa ba Sikém, bo to' neke nta tu Abimélék,

²⁴ndùlala ndù nefètte lem z'a tôg num bon Yérubbaal ntu ṅam sammbàa là ghù yagte mba' i, lem tshob nèn tu Abimélék mfèt yub z'a na' nzwite yub là, nèn tu ba Sikém tse bo na' njwimt'é nezwite fèt tse là.

²⁵Ba Sikém ṅu' ku num i, ndem benntùn num ntshùa mbale, tshen ben ni nke nkwé tshu ben tse bo tshwèt ntshùa mbaṅ bo num manze là. Bo soṅ Abimélék yen nu là.

²⁶Yaal, nshum Ebéd se' ntshùa Sikém boa fèt tse. Ba Sikém yab ntù num i.

²⁷Bo tum naṅ tshwèt, nkàb ntàm tù ndu', ngwù tshob ntùm tsiaṅte; bo tsho ntùm ndà nsi yub, njù, nu, nto' neso ndon tu Abimélék.

²⁸Yaal nshum Ebéd nke ntshob ndù: Abimélék b'a we, Sikém be ke, kà bag nke mfa' Abimélék à? A ke' b'a nshum Yérubbaal ké? Zébul ke b'a tàndà ntsho i ké? Bin fa' ben Hamor, tà Sikém. Mba bag là, be bag fa' Sikém à numke?

²⁹Tshù, me lo mbe tà yen ngô li mba m'a ma' Abimélék nsi, ntshob yi ndù: Tse'te tsho soyé nèn tshwèt ntsho.

³⁰Zébul, ngomna tusô ya ntù ndùs'a ju' nu tse Yaal nshum Ebéd ke ntshob là.

³¹A tôg njamnjam ntshob Abimélék ndù: Yaal nshum Ebéd se' Sikém boa fèt tse. A tshwèt nkam ngô ndù bo lo nsi num o.

³²Lo tù tèttswe' bin a soyé ts'o ghù là nèn ndem tshwèt.

³³Njù ndàn o tsho ntùm tusô; a be ze Yaal tum boa tse soyé nke nse' num o là, o ghù num i njoṅ z'a fà bu wù là.

³⁴Abimélék nèn boa ben tse tèttswe' ndem mbaṅ Sikém, tse tse num tse benntùn kuà.

³⁵Mba ndùlala Yaal nshum Ebéd se' nte ze mbàn ntshu nsém. Ndùlala boa ben tse tum dù' bo lem nà,

³⁶Yaal be yen yen bwoṅ benntùn nà ntshob Zébul ndù: Tshù benntùn nà tse bo tshwèt nswe' mfe num kônga là. Là Zébul gha, bùnte yi ndù: A b'a netshaṅ nkônga là ts'o tshwèt ndo' ngù benntùn yi là.

³⁷Yaal bèn ntshob ndù: A b'a kua' bwoṅ soyé bèn nke nswe' mfe num dù' ṅaṅa. Tshù tsemo' là bo tshwèt nko' mfe manze mbwe' ba nsi nke nse' là.

³⁸Zébul zwi tse, ntshob ndù: Kà nta'nku mi a na' nke ntshob mbe Abimélék b'a ke kà be nke mfa' yi di ke l'à? Tshù ngô z'o na' nke ngwag là. Tshù ngelaṅ nenèn ma' yub ntsho li.

³⁹Yaal tum nkwé mbwe, ba Sikém tam njam i boa bo le' Abimélék ntsho.

⁴⁰Abimélék fét Yaal k'a kù; benntùn yàm tse bo ket mfaṅ tshwèt ntsho là vùte nsi ke yoṅ nkum ntshu nsém.

⁴¹Abimélék tsin Aruma. Zébul ta' Yaal boa fèt tse, bo ke te nkàn Sikém.

⁴²Njù be làn ngô tum tshwèt. Bo soṅ Abimélék yen nu là.

⁴³A lo' ze ntshu ntsho ngabte nze tse tat, ndemte yub tshwèt. Ndùs'a yen ndù ngô tum tusô là, a vù num bo, ndab yube.

⁴⁴A lo' ze tse benntùn ndo' ntshu tusô yi, tsemo' tse benntùn bàa vù num benntùn tse bo be tshwèt là nzwite yube.

⁴⁵Abimélék vù ntùm tusô nse ka bwe, ndo' dù'. A zwite njoṅ benntùn fa tusô, mbagte tusô, mbwe ngwa bwe.

⁴⁶Ba la' be ju' yen tshô là, nkù nèn ntùm nesà ba' Sikém, nèn ntùm nta nsi Bérit.

⁴⁷Bo soṅ Abimélék ndù njoṅ ba Sikém fa lem ntùm nesà ba';

⁴⁸ndùlal'a lo' ze ntshu ntsho nko' nèn num mbat Tsalmon boa bo. A lo' njàm nkeb ta' kaṅtù, njab nkembe' i, ntshob ben tse ndù: Bin yen ju ze me ghù, mba we lo nànte ngù ze mba me là.

⁴⁹Mba we lo keb se kaṅtù, njab njam Abimélék. Bo yé'te yen ntshwèn nà ndo' ndiaṅ nta yi mbume, nte mbwôg bwe, a kù i boa ben tse bo be bwe là. Tshù mba ben bo be ntùm nesà ba' Sikém kwù là. Bo lo be nguan benntùn ntsha', bandum boa bènnzwi.

⁵⁰Yen ni be tshùa Abimélék le' Tébets ntsho, ndo' i a ndù wat.

⁵¹Mo' nesà ba' lo be netèt sen tusô là, njoṅ ba la' fa, bandum boa bènnzwi nke ndem à bwe. Bo fùn wut tshob ntùm bwe, nko' nèn num tuba' dù' ze bo bom nsaṅ nà.

⁵²Abimélék ko' num nesà ba', nkum nzendà num nete mbwôg bwe.

⁵³Num yen ngelaṅ nà, mo' mènnzwi lo' mo' ke' tsha' ba' nto tu Abimélék yi.

⁵⁴A tsiaṅ mônke' i z'a ke ntshùb tshu tse là ntshob yi ndù: Tsho' ṅwi o ndo' miagt'àm yi, kà bo tshob ndù mènnzwi bèn nzwi àm. Mônke' i là sob i a kwù.

⁵⁵Ndùse ba Israél yen ndù Abimélék kwù là, mba we lo bèn njam ntùm ndà i.

⁵⁶Ndùlala Nsi ghù nukebwô ze Abimélék ghù num tàab là tsho tu i. Nukebwô là b'a mb'a na' nzwite fèt tse ntu ṅam sammbàa là.

⁵⁷Nsi ghù nukebwô ze ba Sikém na' ngù là tsho tu bo. A tshùa ndùlala ndon Yotam nshum Yérubbaal bumte num bo.