Read Medumba Apokalipse 1 Bible Online

Apokalipse 1 - Medumba bible

Apokalipse 1

¹Ju ze bo tswite Yésu Kristô là; Nsi lo fà i yi ndù a la'te tshu ts'a bwô ndù a se' là ghafa' tse, a lo tum Angél i ndù a la'te yen nà ngafa' i Yohané,

²z'a kwé nta ntshob Nsi mba kwénta Yésu Kristô, a kwé nta njoṅ tshu fa ts'a yen nà.

³Mènfen b'a mèn z'a siaṅe, ghafen bèn mbe ben tse bo ju' ntshob nu ghatshob ntshob Nsi, nke nze tshu tse bo kite ntùm bwe là: Nummbe ngelaṅ ghebte.

⁴Me Yohané, me kite yen ṅwa'ni li à ba ntse'te benkristô sammbàa ts'a Asia là. Kondèn mba fite be bin njam mèn z'a be, z'a na' mbe, z'a tshwèt nse' là, njam Ywèt sammbàa tse bo be mbwe ko'fen se là,

⁵mba njam Yésu Kristô, ngakwénta ze nenùne, tuswe mén netèt fe ben mba mfen fenfen num nsitsha' là. Ghamte be mèn z'a num nkô be, z'a lànte be num nukebwô be ntùm lem tse,

⁶ngù be tù' tun fen, ntù' ghale'te Nsi num Nsi i mba Tà, ghamte mba neta be yi ngu'ngu'. Amén.

⁷Tshù a tshwèt nse' boa ba ndot; mba sit lag lo nsi yen i, mba ben tse bo na' nsobt'é là; njoṅ nzwit fa num nsitsha' nsi làn num i, ṅ, amén.

⁸Tshùaben Nsi z'a be, z'a na' mbe, z'a tshwèt nse'e, ngatô njù, tshob ndù: Tu wul àm, me b'a Alfa mba Oméga.

⁹Me *gi*Yohané, mfèt zin, ze bag à bin tamte ntùm nge', ntùm nufen mba ntùm nefènte num Yésu là; me na' mb'a Patmôs, ngô tètntse, num nu ntshob Nsi mba num nu kwénta Yésu;

¹⁰me na' mb'a ntùm Ywèt mum lé'njù Tshùaben, nju' mo' nze neta njam àm, a be ndaṅndaṅ mba nze nta là,

¹¹a tshob ndù: Ju z'o tshwèt njen nà, kite ntùm ṅwa'ni, ntum ba ntse'te benkristô sammbàa, tse bo be: Efésô, Smirna, Pèrgamô, Sarda, Filadélfia, Laôdikia là.

¹²Me lo kaṅ wul àm nelôte nze z'a ke ntshob me là, ngelaṅ me kaṅ wul àm nà, me yen ndambo gol sammbàa,

¹³netèt men sammbàa là, me yen mo' mèn bwe, ndù a fute Mén mèn; a ket nesa nkum num i, ntaṅ kob gol num ndàntù i.

¹⁴Tu i mba nyiaṅtu tse fôg mba nyiaṅ njùmbwe fôgtab là, mba nywinmbaṅ nà, miag mi be mba ngwatmbwôg là;

¹⁵nku mi lo fute tùn se bo ton mbwôg là, nze i be mba ntshu' ntse ndùbndùb là;

¹⁶a lo tshùb nsa sammbàa ntùm bu i ze zwim, ṅwi netshùag bàa tum ntshu i, se i fute lagnyam ngelaṅ z'a tshwèt ntà kua' neta là.

¹⁷Me lo yen i ngwù num nku mi mba mèn nekwù là. A yab bu i ze zwim num àm, ntshob ndù: Kà bwôg! Tu wul àm, me b'a mbwe mèn mba miagt'é;

¹⁸me b'a ntùn; me lo kwù, tshù me b'a ntùn num ngu'ngu', me ghù fùn vù mba fùn ngô fe ben.

¹⁹Ndùlala, kite tshu ts'o yen nà, tshu ts'a be là, mba tshu ts'a nsi se' mànjam nà.

²⁰Tsham nsa sammbàa b'a Angél ntse'te benkristô sammbàa, ndambo sammbàa be ntse'te benkristô sammbàa.