Read Medumba Apokalipse 14 Bible Online

Apokalipse 14 - Medumba bible

Apokalipse 14

¹Tshù, me yen mén njùmbwe ndù a tsin num mbat Sion boa ben ntsha' ntshob kuà bon kuà nkù, ndù bo kite lén se mba lén tàab num nkonse yub.

²Me ju' mo' nze tum mfe kamànyam mba nze ntse ndùb là, mba nze fambaṅ ndùb là; nze ze me ju' là be mba nze loṅ se ghabu' loṅ ke mbu' là.

³Bo yob kwi nswe mbwe ko'fen, mbwe tshu ntùn kuà mba mbwe ywèn benntùn; sàm mèn ke ku'ni nezi'te sen kwi là, k'a ke nda' ben ntsha' ntshob kuà bon kuà nkù tse bo na' ntshu' yub num nsitsha' là.

⁴Tshen ni b'a ben tse bo ke' sagte wut tshob boa bènnzwi là, nummbe bo ke' lèn mènnzwi; bo num ntam njam mén njùmbwe mba yà lo dù' z'a nèn nà; bo lo tshu' yub netèt benntùn mba mbwe ntàm tù là Nsi mba mén njùmbwe.

⁵Tatte ke' to' tum ntshu bo; bo b'a kelo'.

⁶Me yen mo' Angél netèt kamànyam ndù a ghù nkùn mebwô z'a tswe yoṅ ntshù' là, z'a nsi tshob ba ntùm njù, njoṅ ngô fa, njoṅ tunndà fa, njoṅ ntshob fa mba njoṅ nzwit fa là,

⁷a tshob nze neta ndù: Bin bwôg Nsi, mfà ghamte Nsi yi, nummbe ngelaṅ netsho'te ntsha i ku'u, bin ghamte mèn z'a na' nabte kamànyam, tsha'a, dibantse mba tumnsintse là.

⁸Mbatte Angél bàa tum njam i, ntshob ndù: A vù, Babilon ndùb vù, a lo' yantù mba kal i, ngù njoṅ ngô fa nu mba ndu' là.

⁹Mbatte Angél tat tum njam bo, ntshob nze neta ndù: A be ze mèn ghamte nyàm mba neto i, nkwé lèn num nkonse ke num bu i lo là,

¹⁰mb'a nsi nu ndu' yantù Nsi mi bo naṅ ntùm ntu' yantù i ke bwete là, bo ghùtni i ntùm mbwôg sôlfa mbwe ba Angél nelàn mba mbwe mén njùmbwe.

¹¹Nzembwôg ngùtni yub nsi tum ngu'ngu'; ben tse bo num ngamte nyàm mba neto i là ke' ghù fite mbwôgtshù mba tèttswe', mba mèn z'a kwé lén se là.

¹²Nefènte ben nelàn tse bo num nze ntshù' Nsi mba bamntù Yésu là b'a bwe.

¹³Me ju' mo' nze tshob mfe kamànyam ndù: Kite! Ghafen b'a fe ben tse bo kwù num Tshùaben fe ndonni là. Ywèt tshob ndù: Ṅ, bo nsi fite mum mfa' mube; nummbe mfa' mub tam njam bo.

¹⁴Tshù, me yen mo' ndot fôgtab; mo' mèn tswe num ndot là ndù a fute Mén mèn, ngù tshe' gol tu i, ngù ṅwi netsho' tshu ze netshùag bu i,

¹⁵mo' Angél tum Ndà Nsi, nkua' nze neta ntshob mèn z'a tswe num ndot là ndù: Tum ṅwi netsho' tshu o, tsho' tshu. Nummbe ngelaṅ netsho' tshu ku'u, nummbe tshu tswe num nsitsha'a.

¹⁶Mèn z'a tswe num ndot là ma' ṅwi netsho' tshu i num nsitsha'a; bo tsho' tshu num nsitsha'a.

¹⁷Mo' Angél tum ntùm Ndà Nsi z'a be mfe kamànyam nà, ndù mba yi ghù mo' ṅwi netsho' tshu ze netshùage.

¹⁸Mo' Angél tum ntùm tômbwôg le'te Nsi, ndù a ghù ngù' num mbwôge; a kua' nze neta, ntshob mèn z'a ghù ṅwi netsho' tshu ze netshùag là ndù: Tum ṅwi netsho' tshu o ze netshùage, kebte ba tsha tù ndu' nsitsha'a, nummbe ntàm ndu' tswe.

¹⁹Angél ma' ṅwi netsho' tshu i num nsitsha'a, nkebte tù ndu' nsitsha'a, ma' ntùm tshaṅ yantù Nsi se ndùb.

²⁰Bo nyu' ntshaṅ ntàm ndu' njam ngô, lem tum ntùm tshaṅ, nko' tà nkum num tùn ntshu ba nyàmdiaṅe, nsa num stade (ndaṅ mbu) ntshob ntôg ntsha' mbùm.