Read Medumba Apokalipse 18 Bible Online

Apokalipse 18 - Medumba bible

Apokalipse 18

¹Tshen nà lo be tshùa, me yen mo' Angél swe' mfe kamànyam, ndù a ghù ngù' ndùb, nkuni mi ke' num nsitsha'a.

²A kua' nze neta, ntshob ndù: A vù, a vù, Babilon ze ndùb vù; a tù' dù'ntswe ba ywètkebwô, ntù' nta njoṅ ywètkebwô fa, nta njoṅ nsaṅ kebwô fa mi nebàn yube.

³Nummbe njoṅ ngôngô fa nu ndu' yantù kal i, fenfen nsitsha' nke nkat bo à bo, ghatantàn nsitsha' tù' ghankàb njam neta yôg ngùa se.

⁴Me ju' mo' nze tum mfe kamànyam ntshob ndù: Nzwil àm, bin tum ntùm bwe, ndù kà bin tamte num nukebwô tse, mba ndù kà nge' tse tsho num bin.

⁵Nummbe nukebwô tse kùmte kà nko' nkum kamànyam, Nsi kwimte nuketsin tse.

⁶Bin ghù yi ndaṅndaṅ mb'a na' ngù là. Bin ghù yi yoṅ bàa ndaṅndaṅ mba mfa' mi be là. Bin so yi yoṅ bàa ntùm ntu' z'a na' nso bwe là.

⁷Ndaṅndaṅ mb'a na' nkuni wul i, ngua' wul i ntùm yôg ngùa là, be ndaṅndaṅ bin fà ngùtni mba ntsenyà yi, nummbe a num ntshob ntùm ntù i ndù: Me tswe nsi mba màmfen nà, me ke b'a mfôge, me ke nsi tswe ntsenyà.

⁸A num ndùlala, ntùm ta' lé'njù ntshù', nge' nsi se' num i, vù, ntsenyà mba nziku'u, bo ton i ntùm mbwôge; nummbe Tshùaben Nsi z'a tsho't'é là b'a mèn neta.

⁹Fenfen nsitsha' tse bo ke nkat bo à bo, ngua' wut tshob ntùm yôg ngùa bo à bo là, nsi kua'a, làne, ngelaṅ bo nsi yen nzembwôg mbwôg z'a tshwèt nkù i là;

¹⁰bo nsi tsin ngùanesà, bwôg ngùtni i, tshob ndù: Babilon ngô ze ndùb, ngô neta, nge', nge' num wù, nummbe yu nevù ntsha se' nda' num ta' nyam ntshù'!

¹¹Ghatantàn nsitsha' nsi kua'a, làn num i, nummbe sàm mèn ke nsi bèn jun tshuntàn tshobe,

¹²tshuntàn gol, silba, ndoṅ tanjoṅ, ntôgntse, nzwe mebwô, nzwe tanjoṅ, nzwe silik, nzwe meba, nkam tù nelamte, nzenze tshu nsô nsennyàm, nzenze tshu tùne, nzenze tshu marmo,

¹³kinamo, mfèt mebwô, labinda, mire, libano, ndu', mfèt, mbàb, bàn, ngefele, nyàmna', mbwe, nyàmdiaṅe, kalige, wut mba ntù benntùn.

¹⁴Ntàm mi ntù o ke nge'te là nèn ngùanesà mbaṅ o, njoṅ tshu mebwô mba tshu tanjoṅ fa bi, o ke nsi bèn yen yube,

¹⁵ghata tshen tshu là tse bo tù' ghankàb njam i là, nsi tsin ngùanesà bwôg ngùtni i; bo nsi kua'a, làne;

¹⁶tshob ndù: Ngô ze ndùb, wù z'o num nket nzwe mebwô, ze tanjoṅ, mba ze meba, wù z'o taṅ gol, ndoṅ tanjoṅ mba ntôgntse là, nge', nge' num wù,

¹⁷nummbe bo lagte njoṅ tshunkàb tsho fa nda' num ta' nyam ntshù'. Njoṅ ghatshagte kenu fa, njoṅ benntùn fa tse bo num nèn ntùm yen dù' là là, njoṅ ghafa' fa ntùm kenu, njoṅ benntùn fa tse bo num mfa' num dibantse là, tsin ngùanesà,

¹⁸ mbe yen nzembwôg mbwôg z'a ke nkù i là, kua' ntshob ndù: Zit ngô z'a na' mfute ngô ndùb à?

¹⁹Bo nke naṅ mbab num tu tshobe, nkua'a, ndàne, nkua' nze neta, ntshob ndù: Ngô ze ndùb: Tshu tsho tse tanjoṅ ghù njoṅ benntùn fa tse bo ghù sitima num dibantse là tù' ghankàb, nge', nge' num wù, nummbe bo lagt'o nda' num ta' nyam ntshù'.

²⁰Kamànyam, tsiaṅte num i, bin ben nelàne, ghantum mba ghatshob ntshob Nsi, bin tsiaṅte, nummbe Nsi naṅ ntsha tu i, ngù nunetsin bin.

²¹Mo' Angél neta lo' mo' loṅ bàn se ndùb là, ma' i ntùm dibantse ntshob ndù: Be ndaṅndaṅ, bo nsi tèn Babilon ngô ze ndùb, ma' i, bo ke nsi bèn fon i.

²²Bo ke nsi bèn ju' kwi ghabu' loṅe, ghayobkwi, ghatôndô mba ghatônta netèl o; bo ke nsi bèn yen sàm ngave ntùm mba ke lèn fa' lo netèl o,

²³nka' lambo ke nsi bèn ké' netèl o; nummbe ghatantàn tsho na' mb'a ben ndùbndùb nsitsha'a, nummbe ka so lo tatte njoṅ ngôngô fa;

²⁴bo lo yen lem ghatshob ntshob Nsi mba ben nelàne, mba lem njoṅ benntùn fa tse bo sete tô tshob num nsitsha' là, netèl i.