Read Medumba Apokalipse 19 Bible Online

Apokalipse 19 - Medumba bible

Apokalipse 19

¹Tshen nà lo be tshùa, me ju' mo' nze ndùb mba tshu'te bwoṅ benntùn yàm nà mfe kamànyam, a tshob ndù: Aléluya! Yôg, nkuni mba neta b'a tse Nsi yag,

²nummbe tse netsho'te ntsha b'a nenùne, mbe netsine. Nummbe a keb ntsha kattù mènnzwi ze ndùb z'a ke mbagte njù ntùm kal i là; Nsi yagte lem ghafa' tse, lem tse bu kattù mènnzwi fètte là.

³Bo bèn ntshob mbatte yoṅ bàa ndù: Aléluya! Nzembwôg mi ko' ngu'ngu'.

⁴Ywèn benntùn ntshob kuà ṅam mbàa mba tshu ntùn kuà vù nsi, ngamte Nsi z'a tswe num ko'fen nà, ntshob ndù: Amén, aléluya!

⁵Mo' nze tum ntùm ko'fen, ntshob ndù: Bin ghamte Nsi yag, bin njoṅ ghafa' tse fa, bin tse bin num mbwôg i là, bin bônke' mba bin dùbdùb.

⁶Me ju' mo' nze mba tshu'te bwoṅ benntùn nà, mba tshu'te ntse ndùb là, mba tshu'te mfambaṅ neta là, a tshob ndù: Aléluya, nummbe Tshùaben Nsi yag, ngatô njù, lo à be mfen.

⁷Be tsiaṅte, ṅwate, mfà ghamte yi, nummbe nandà mén njùmbwe se'e, nzwi i nabte wul i;

⁸bo lo fà ngù' neket nzwe mebwô, nzwe ṅwa'ṅwa', nzwe nelàn yi, nummbe nzwe mebwô b'a mfa' ben nelàn mi netsine.

⁹Angél tshob me ndù: Kite! Ghafen b'a ben tse bo tsiaṅ yub num tsiaṅte nandà mén njùmbwe là. A tshob me ndù: Men ni b'a ntshob Nsi mi nenùne.

¹⁰Me vù nsi num nku mi, num neghamt'é, a tshob me ndù: Bàm nà, me b'a nshun fa' o, mba ze fèt tsho tse bo ghù kwénta Yésu là; ghamte Nsi. Nummbe kwénta b'a Ywèt ntshob ghatshob ntshob Nsi.

¹¹Me yen kamànyam gha' nte nge, tshù, mo' nyàmdiaṅ fôgtab tum bwe; bo tsiaṅ mèn z'a ko' num i là ndù mèn nenùne, ngatshob nenùne; a tshwèt ntsho'te, nke nde' ntsho ntùm nunetsine.

¹²Miag mi be mba ngwatmbwôg là, ndot fen yàm be num tu i; bo kite mo' lén se sàm mèn ke' lèn, k'a ke nda' tu wul i là,

¹³a lo ket kum se bo nyu' ntùm lem nà; bo lo tswi lén se ndù ntshob Nsi.

¹⁴Ba ntshu ntsho ts'a kamànyam nà tam njam i ndù bo ko' num ba nyàmdiaṅ fôgtab, nket nzwe mebwô fôgtab ze nelàne.

¹⁵Mo' ṅwi' netshùag tum ntshu i, ṅwi z'a nsi lab ghakelèn Nsi yi là; tu wul i nsi lo' kôg tùn tshagte yub yi; tu wul i nsi nyu' tshaṅ ntàm ndu' zwentù yantù Nsi, ngatô njù.

¹⁶Bo kite mo' lén num kum se mba num tammbwe i: Mfen fenfen ba Tshùaben.

¹⁷Me yen mo' Angél tsin ntùm lagnyam, nkua' nze neta, ntshob nsaṅ fa mi bo tshwèt mfùtte netèt kamànyam nà ndù: Bin se'e, bin kùmte dù' ntshù' num tsiaṅte ndùb,

¹⁸ndù bin fèt mbàb wut fenfen, mbàb wut tàndà ntsho, mbàb wut ben neta, mbàb wut nyàmdiaṅe, mba ze ben tse bo tswe num bo là, mbàb wut njoṅ bonla' fa mba ze kuan, mbàb wut bônke' mba ze dùbdùb.

¹⁹Me yen nyàm, fenfen nsitsha' boa tshu ntsho, ndù bo kùmte dù' ntshù' num nema' mèn z'a ko' num nyàmdiaṅ nà boa ntshu ntsho i, ntsho.

²⁰Bo ghom nyàm bo ngatshob ntshob Nsi i ze tatte z'a ke ngù tshu netshàm mbwe i, ntshùa njam tshen tshu netshàm nà, ntatte ben tse bo kwé nyàm, ngamte neto i là. Bo ma' njoṅ yub fa ntùm lagmbwôg zin z'a ke nkù là.

²¹Bo zwite ben tse bo tù' là ṅwi z'a tum ntshu mèn z'a tswe num nyàmdiaṅ nà; njoṅ nsaṅ fa fèt mbàb wut yub, njwèle.