Read Medumba Apokalipse 21 Bible Online

Apokalipse 21 - Medumba bible

Apokalipse 21

¹Me yen mo' kamànyam nswe mba mo' tsha' nswe. Nummbe mbwe kamànyam mba mbwe tsha' lo tôge, dibantse ke bèn mbe.

²Me yen ngô nelàne, Yérusalém nswe swe' mfe kamànyam mbaṅ Nsi, ndù bo nabt'é mba ngon ze bo tsiagt'é num ndu i là.

³Me ju' mo' nze neta tum num ko'fen, ntshob ndù: Tshù ntàb Nsi là boa benntùn; a nsi tswe bo à bo tu wut tshob be ben tse, tu wut Nsi be bo à bo.

⁴A nsi tshwétte njoṅ ntsenyà fa miag bo; vù ke nsi bèn be, ntsenyà ke nekua' ke ya lo ke nsi bèn be, nummbe ba mbwe tshu tôg.

⁵Mèn z'a tswe num ko'fen nà tshob ndù: Tshù, me ghù njoṅ tshu fa tù' tse nswe. A tshob ndù: Kite, nummbe men ntshob li b'a nenùne, mbe ndaṅndaṅ.

⁶A tshob me ndù: Tu wul àm, me b'a Alfa mba Oméga, neto'te mba nemiagte. Tu wul àm, me nsi fà ntse mi me lo' ntùm tumnsintse yôg là mèn ze ntù i kù là banban.

⁷Mèn z'a tshùa ntsho là nsi jù ntsi' tshen tshu là, me nsi be Nsi i, tu wul i be mén àm.

⁸Là mbe se' mba ba bwôgtun, ghakebam, ba ṅu'u, ghazwi benntùn, ba kattù, ghaka, ghaghamte nsi neto, mba njoṅ ghatatte fa là, yub bag i nsi b'a ntùm lagmbwôg mba zin z'a tshwèt nkù là. A b'a mbatte vù bàa.

⁹Mo' ta' i netèt ba Angél sammbàa tse bo tshùb ntu' sammbàa ts'a dun ba miagte nge' sammbàa là, se', ntshob me ndù: Se'e, me nsi la'te ngon wù, nzwi mén njùmbwe.

¹⁰A kel àm ntùm Ywèt nèn yi num mo' mbat ndùb ze nesage, a la'te ngô nelàn me, Yérusalém z'a swe' mfe kamànyam mbaṅ Nsi,

¹¹ndù a ghù nkuni Nsi là, ze neziagte fute mo' loṅ tanjoṅ, loṅ Yabsi s'a be mba Kristal là;

¹²a lo ghù kàb ndùb ze nesage, ngù nzendà ntshob bàa gham, Angél ntshob bàa gham tsinte num tshen nzendà là, ndù bo kite memo' ndèn bwe, men ndèn nà b'a mi tunndà bon Israél ntshob bàa gham.

¹³Nzendà tat be bag ntumnyam, nzendà tat be tu, nzendà tat be mà ntèn, nzendà tat be bag mbinyam.

¹⁴Kumba' ngô lo ghù tseba' ntshob bàa gham, ndèn ntshob bàa gham, ndèn ghantum ntshob bàa gham, ghantum mén njùmbwe be num bo.

¹⁵Mèn z'a ke ntshob me là lo ghù mfi' nka'nesoṅ gol num nefi' ngô, nzendà tse mba kàbngô i yi.

¹⁶Ngô lo b'a kum kuà, njoṅ kum tse fa b'a be ndaṅndaṅ. A lo' nka'nesoṅ mfi' ngô yi, a tum mfi' ntsha' ntshob bàa gham, njoṅ kum tse fa mba ntse i lo b'a ndaṅndaṅ.

¹⁷A fi' kàbngô, a tum kam mfi' ntshob kuà bon kuà nkù, mfi' mènntùn z'a be mfi' Angél là.

¹⁸Bo lo' Yasbi nkut kàbngô yi; ndo' à gol nelàn z'a fute yente nelàn nà, nkut ngô yi,

¹⁹ndo' ndoṅ tanjoṅ nzenze, nkut tseba' kàbngô yi; ndo' Yasbi, nkut mbwe tseba' yi, ndo' Safir, nkut mbatte bàa yi; ndo' Kalkédon, nkut mbatte tat yi; ndo' Smaragdo, nkut mbatte kuà yi;

²⁰ndo' Sardonik, nkut mbatte tàn yi; ndo' Sardi, nkut mbatte ntôg yi; ndo' Krisôlitô, nkut mbatte sammbàa yi; ndo' Bèritô, nkut mbatte fom yi; ndo' Tôpasô, nkut mbatte bwe'e yi; ndo' Krisôpasô, nkut mbatte gham yi; ndo' Yakintô, nkut mbatte ntshob ntshù' gham yi; ndo' amètistô, nkut mbatte ntshob bàa gham yi.

²¹Nzendà ntshob bàa gham b'a ntôgntse ntshob bàa gham; mba zit nzendà lo b'a ta' ntôgntse ntshù'. Manze ngô be gol nelàn mba yente njam bàa là.

²²Me ke yen ndà Nsi bwe, nummbe Tshùaben Nsi, ngatô njù b'a ndà Nsi ngô, mba mén njùmbwe là.

²³Nka' lagnyam mba nka' maṅwù ke' be ywimte ngô mo' ju, nummbe nkuni Nsi num nké' num i, mén njùmbwe be lambo se.

²⁴Ngôngô nsi zin ntùm nka' i, fenfen nsitsha' se' mfà nkuni mub yi.

²⁵Bo ke nsi fùn nzendà tse mbwôgtshù, nummbe tèttswe' ke nsi bèn be bwe.

²⁶Bo nsi lo' nkuni mba ghamte ngôngô, se' yi bwe.

²⁷Sàm ju nesagte, sàm ngaghù nu ṅu' mba sàm ngatatte ke nsi tsho bwe, nda' ben tse bo kite yub ntùm ṅwa'ni yôg mén njùmbwe là nsi bèn tsho bwe.