Read Medumba Apokalipse 22 Bible Online

Apokalipse 22 - Medumba bible

Apokalipse 22

¹A la'te mo' ta'ntse yôg me ndù a be ṅwa'ṅwa' mba Kristal là, men ntse là ke ntum à num ko'fen Nsi mba mén njùmbwe,

²netèt manze ngô; a la'te tù yôg me mba num sit kaṅ ntse lo, ndù a num njam ntàm yoṅ ntshob bàa gham, nke mfà ntàm mba zit maṅwù lo, mba mfu mi num neyate ngôngô yi.

³Neso ndon ke nsi bèn be. Ko'fen Nsi mba mén njùmbwe nsi be ntùm ngô; ghafa' Nsi nsi fa' yi;

⁴bo nsi yen se i, lén se nsi be num nkonse yub.

⁵Tèttswe' ke nsi bèn be, nka' lambo ke nsi ywimte yub mo' ju, nummbe Tshùaben Nsi nsi ké' num bo, bo nsi tô num ngu'ngu'.

⁶A tshob me ndù: Men ntshob là b'a nenùne, mbe ndaṅndaṅ. Tshùaben Nsi z'a num mfà Ywèt ghatshob ntshob Nsi tse là, lo tum Angél i ndù a la'te tshu ts'a bwô ndù a se' ndende là ghafa' tse.

⁷Tshù, me tshwèt nse' ndende. Mènfen b'a mèn z'a lé' ntshob nu ghatshob ntshob Nsi mi a ntùm yen ṅwa'ni li là.

⁸Me Yohané, me na' mbèn nju' mbèn njen tshen tshu li. Ngelaṅ me na' nju'u, mbèn njen nà, me vù nsi num nku Angél z'a ke nda'te tshen tshu li me là, neghamt'é.

⁹A tshob me ndù: Bàm nà, kà ghù. Me b'a nshun fa' o mba ze fèt tsho ghatshob ntshob Nsi mba ben tse bo num ndé' ntshob yen ṅwa'ni li là. Ghamte Nsi!

¹⁰A tshob me ndù: Kà kut ntshob nu ghatshob ntshob Nsi mi a ntùm yen ṅwa'ni li là, nummbe ngelaṅ ghebte.

¹¹A bwô ndù ngaghù nukebwô bèn ngù nukebwô, mèn nesagte bèn nsagte wul i, a bwô ndù mèn netsin bèn ngù nunetsine, mèn nelàn bèn ndànte wul i.

¹²Tshù, me tshwèt nse' ndende, me b'a bag ntsho'fa', m'a' fà mba we lo ndaṅndaṅ mba fa' se be là.

¹³Tu wul àm, me b'a Alfa mba Oméga, mbe mbwe mèn mba ntshèt njam, mbe neto'te mba nemiagte.

¹⁴Ghafen b'a ben tse bo sôg nkum mub là, bo ghù ngù' num tù yôg, nku'ni netshùa num ba nzendà ntsho ntùm ngô.

¹⁵Ba mbù, ghaka, ba kattù, ghazwi benntùn, ghaghamte nsi neto, njoṅ ghakô tatte fa mba njoṅ ghatatte fa nsi tsin à njam ngô.

¹⁶Tu wul àm Yésu, me lo tum à Angél àm ndù a kwé nta tshen tshu là ts'a be num ntse'te benkristô là bin. Me b'a nga nzwit David, sa nelàn se nkebnjù.

¹⁷Ywèt mba ngon tshob ndù: Se'e! A bwô ndù mèn z'a tshwèt nju' là tshob ndù: se'; a bwô ndù mèn ze ntù i kù là se'e; a bwô ndù mèn z'a kô là kwé ntse banban.

¹⁸Tu wul àm me tshob mba we lo z'a ju' ntshob nu ghatshob ntshob Nsi mi a ntùm yen ṅwa'ni li là ndù: A be ze mèn kwi'te ju bwe là, mba Nsi a' kwi'te nge' tse bo kite ntùm ṅwa'ni li là num ng'é.

¹⁹A be ze mèn sébte ju num ntshob mi a ntùm ṅwa'ni yen nu ghatshob ntshob Nsi li là, mba Nsi a' sébte se bag tù yôg mba ze bag ngô nelàne, tse bo kite ntùm yen ṅwa'ni li là.

²⁰Mèn z'a kwé nta tshen tshu li là, tshob ndù: Ṅ, me tshwèt nse' ndende. Amén, Tshùaben Yésu, se'e!

²¹Kondèn Tshùaben Yésu be boa njoṅ benntùn fa.