Read Medumba Apokalipse 5 Bible Online

Apokalipse 5 - Medumba bible

Apokalipse 5

¹Tshù, mèn z'a tswe num ko'fen nà lo ghù mo' ṅwa'ni ntùm bu i ze zwim, ndù bo kite ntùm bwe mba num bwe, njab sitam num i sammbàa.

²Tshù, mo' Angél neta kua' nze neta, ntshob ndù: We z'a ku'ni negha' ṅwa'ni, nké'te ba mfèl à?

³Sàm mèn mfe kamànyam, ke num nsitsha'a, ke mànjam nsi lo, lo ke ku'ni negha' ṅwa'ni, ke nelôt'é lo.

⁴Me lo kua' neshu, nummbe bo lo ke fon sàm mèn z'a ku'ni negha' ṅwa'ni ke nelôt'é lo là.

⁵Mo' mèn netèt ywèn benntùn tshob me ndù: kà kua'! Tshù ngwayit nzwit Yuda, nga David, tshùa ntsho, a nsi gha' ṅwa'ni ze bo yab sitam num i sammbàa là.

⁶Tshù, me yen mén njùmbwe, a tswe mba bo se tô i là, ndù a ghù ndô mi sammbàa mba miag sammbàa, tshen ni b'a Ywèt Nsi sammbàa tse bo tum yub num nsitsha' fa là; men njùmbwe là tsin netèt ko'fen se tshu ntùn kuà diaṅ i mbum nà, mba netèt ywèn benntùn.

⁷A kù'te nse' mbaṅ mèn z'a tswe num ko'fen nà, nkwé ṅwa'ni bu i ze zwim.

⁸Ngelaṅ z'a kwé ṅwa'ni là, tshu ntùn mba ywèn benntùn ntshob kuà ṅam mbàa vù mbwe mén njùmbwe, ndù mba zit lo tshùb loṅe, mba ntu' gol ts'a dun labinda là, tshen ni b'a le'te Nsi ben nelàne;

⁹bo yob kwi nswe ntshob ndù: o ku'ni nekwé ṅwa'ni, mbétte sitam tse, nummbe bo lo se tô o, o tshùa njam lem tsho, ntshu' benntùn ntùm njoṅ tunndà fa, njoṅ ntshob fa, njoṅ ngô fa, njoṅ nzwit fa, mfà yub Nsi,

¹⁰ngù bo tù' nufen, ntù' ghale'te Nsi num Nsi yag, bo nsi tô nsitsha'a.

¹¹Tshù, me ju' nze mo' bwoṅ Angél yàm tse bo diaṅ ko'fen mbum boa tshu ntùn kuà mba ywèn benntùn nà, bo na' mb'a ntshu'ntshu', bo na' mb'a ntsha'ntsha'.

¹²Bo tshob kua' nze neta ndù: Mén njùmbwe ze bo na' nse tô i là ku'ni nekwé ngù', fu', zenu, neta, ghamte, nkuni mba nyàmte.

¹³Me ju' njoṅ tshu fa tse Nsi nabte là, tse bo mfe kamànyam nà, tse bo num nsitsha' là, tse bo mànjam nsi là, tse bo ntùm dibantse là, njoṅ njù fa mba tshu ts'a ntùm bwe là, nke ntshob ndù: Nyàmte, ghamte, nkuni, mba netô ngu'ngu' be mèn z'a tswe num ko'fen nà, mba mén njùmbwe.

¹⁴Tshu ntùn kuà nke ntshob ndù: Amén. Ywèn benntùn vù nsi, ngamte.