Read Medumba Apokalipse 9 Bible Online

Apokalipse 9 - Medumba bible

Apokalipse 9

¹Mbatte Angél tàn tô nta: Me yen mo' sa tum kamànyam, ngwù num nsitsha'a; bo fà fùn ghem mànjam nsi yi.

²A tsho' ghem mànjam nsi. Mo' nzembwôg tum ntùm ghem mba nzembwôg mbwôg ndùb là. Nzembwôg ghem ghù lagnyam mba njù sènte.

³Ba ngamntàn tum ntùm nzembwôge, nsa num nsitsha'a; bo fà ngù' bo, ndaṅndaṅ mba ba nenya'tshum tse bo num nsitsha' ghù ngù' là.

⁴Bo tshob bo ndù kà bo ghù sàm nukebwô num nenà nsitsha'a, ke num sàm ju fi, ke num sàm tù lo, là ndù bo ghù nukebwô nda' num benntùn tse bo ke' ghù sitam Nsi num nkonse yub là.

⁵Bo fà ngù' bo ke b'a ndù bo zwite benntùn, là ndù bo ghùtni yub num maṅwù tàn; ngùtni ze bo ke mfà là be mba ngùtni ze nenya'tshum be mfà ngelaṅ z'a tshôg mèn nà.

⁶Ntùm tshen lé'njù là, benntùn nsi diag vù, ke fon i; bo nsi kù ntù nekwù, vù kù yube.

⁷Tshen ngamntàn nà lo fute ba nyàmdiaṅ tse bo nabte yub num ntsho là; mo' ju be tu bo, mfute tshe' gol, se tshob be mba se benntùn nà,

⁸nyiaṅtu tshob be mba nyiaṅtu bènnzwi là, nsô mub be mba mi ba ngwayit là,

⁹ndàntù yub lo be mba tshètntsho tùn nà, tshu'te mbàb mub be mba tshu'te nkalig ba nyàmdiaṅ tse bo tshwèt nkù nde tshwèt ntsho là,

¹⁰bo lo ghù nkun ts'a fute tse ba nenya'tshum nà, ngù njoṅ, ngù' neghù nukebwô yi num benntùn, num maṅwù tàn, na' mb'a ntùm nkun tshobe.

¹¹Angél ghem mànjam nsi b'a mfen yub; lén se b'a Abadon ntùm ntshob Héber, Apolion ntùm ntshob Grikia.

¹²Mbwe nge' tôg, yen ni be tshùa, tshù, nge' bàa bèn nse'e.

¹³Mbatte Angél ntôg tô nta: Me ju' mo' nze tum num ndô kuà tômbwôg le'te Nsi gol s'a be mbwe Nsi là,

¹⁴nze là tshob mbatte Angél ntôg z'a ghù nta là ndù: Kiagte Angél kuà tse bo kut yub num ntse ndùb Efrat là.

¹⁵Bo kiagte tshen Angél kuà là tse bo ke mbéb nyam, lé'njù, maṅwù mba ngu'njù, ndù bo zwite ta' bag benntùn ntshù' num bag tse tat là.

¹⁶Njoṅ ghama' ntsho tse bo ko' num nyàmdiaṅ nà na' mb'a ntshu' nkù bàa; me lo ju' njoṅ yube.

¹⁷Tshù, me yen ba nyàmdiaṅ ntùm njem, ben tse bo ko' num bo là ghù tshètntsho mbwôge, yakintô mba sôlfa; tu ba nyàmdiaṅ be mba tu ba ngwayit là; mbwôge, nzembwôge, mba sôlfa lo ke ntum ntshu bo.

¹⁸Tshen nge' tat là zwite ta' bag benntùn ntshù' num bag tse tat; tshen ben nà kwù ntùm mbwôge, ntùm nzembwôge, mba ntùm sôlfa ts'a ke ntum ntshu ba nyàmdiaṅ nà.

¹⁹Nummbe ngù' ba nyàmdiaṅ b'a ntùm ntshu yube, mba ntùm nkun yube; nummbe nkun yub lo fute nyu, ndù a ghù tu ze bo num ndo' ngù nukebwô yi là.

²⁰Là benntùn tse bo tù'ù, tse tshen nge' là na' mbe ke zwite yub là, lo ke kaṅ ntù tshob mum mfa' mbu mube, ndù bo gha neghamte ywètkebwô, neto, gol, neto silba, neto tùne, neto loṅ, mba neto tù, tse bo ke' ku'ni neyene, neju'u, mba nezin nà;

²¹tshen ben nà ke kaṅ ntù tshob num nezwite, num ka, num kat, ke num tshô lo.