Read Medumba Rut 1 Bible Online

Rut 1 - Medumba bible

Rut 1

¹A lo be num tse lé'njù ghatsho'te ntsha, ndùse bo ke nsa' ngô là, mo' nziku' vù ntùm ngô. Ndùlala mo' mandum lo Bétléhém mà Yuda boa nzwi i mba nshumnshum tse bàa nèn ntswe mum bag ngô mbat mà Moab.

²Lén mandum nà na' mb'a Elimélék, lén nzwi i be Naomi, lén bon tse be Maklon mba Kiljon; bo na' mb'a ba Efrata mà Bétléhém ntùm ngô Yuda. Bo zin nkum bag ngô mbat mà Moab, nte bwe.

³Elimélék ndu Naomi kwù, a tù' tù' i boa nshumnshum tse bàa.

⁴Tshen bonnshum ni so ngonngon Moab, lén mo' be Orpa, lén ze mo' be Rut; bo tswe bwe nguan ngu'njù gham.

⁵Maklon mba Kiljon kwù yub, Naomi bi bon tse bàa mba ndu i.

⁶Ndùlala a lo nsi boa zwi bon tse ntum ntùm ngô Moab, nummb'a lo tswe Moab nju' ndù Tshùaben lo nèn ndôte nzwit yub, mfà jujù bo.

⁷A tum dù' z'a ke ntswe là, zwi bon tse bàa tam njam i, bo tam nze, mbèn njam ntùm ngô Yuda.

⁸Ndùlala Naomi tshob zwi bon tse ndù: Bin nène, mba we lo bèn njam ntèt màab! A bwô ndù Tshùaben ghù kondèn num bin, mba bin na' ngù num ben tse bo à kwù mba num tu wul àm nà!

⁹A bwô ndù Tshùaben ghù mba we lo netèt bin fon ze ndu, ntswe nd'é kua' ntùm fite. A ndùlala, ntam ntse njab kàn bo. Ndùlala bo fà nze yub tù, ndàne,

¹⁰ntshob yi ndù: Nga, bag à bin nsi nèn mbaṅ nzwit zin.

¹¹Là Naomi tshob ndù: Ngonngon tshàm, bin bèn njam. Bin yôg ntam njam àm à numke? Bin kwate ndù bon bèn nke' bam àm tse be bo be du tsin nà ké?

¹²Ndùlala me ngonngon tshàm, me tshob bin ndù bin bèn njam, nummbe m'a' ywèn neshu; be me ke bèn mbe nzwi mèn! Me lo ntshob mba ndù me ke' nywinte, nèn mbaṅ mandum yen tèttswe' li ngù bon bandum bag yi,

¹³mb'a be bin béb tà bo ku' ké? Ndù mba bin nsi ghua' wut tsin ndùlala ke bèn ngù ndu ké? Nga me ngonngon tshàm, bin yen ndù zwe num ntù àm num tu bin, ndonni ze Tshùaben bù' bu i nsi num àm nà.

¹⁴Bo bèn mfà nze yub tù, ndàne. Orpa tsiag, tate màndu i, là Rut ṅat num màndu i.

¹⁵Naomi tshob Rut ndù: Tshù, fôg o bèn netèt nzwit yub mba nsi tshobe; a bwô ndù mba wù yu bèn mba fôg o là.

¹⁶Là Rut tshob ndù: A ke' bwô ndù o nànt'àm me faṅ o, nèn ngùanesà mbaṅ o! Me nsi nèn dù' z'o nsi nèn nà, tswe dù' z'o nsi tswe là. Nzwit zin be yàm nzwit; Nsi zin be yàm nsi.

¹⁷Dù' z'o nsi kwù bwe là, me nsi kwù bwe, bo tshoṅ àm bwe. A bwô ndù Tshùaben ghù yantù i num àm, mbèn nso ndon tu àm, a be ze nda' vùkob, vù ke' bèn mfagte be là.

¹⁸Ndùse Naomi yen ndù Rut tshwèt nsaṅlaṅ nenèn bo yi là, a tsin netshob nu yi.

¹⁹Bo zin ntu tshob bàa nèn nkum mà Bétléhém. Ndùse bo tsho mà Bétléhém nà, njoṅ ngô fa nyi'te num bo, bènnzwi nke ntshob ndù: A ke b'a Naomi li ké!

²⁰A tshob bo ndù: Kà bin bèn netsiaṅ àm Naomi. Bin ke ntsiaṅ àm Mara; yen nà bagt'a ndù zwentù. Nummbe Nganeta Ntshùate ghù me dun zwentù.

²¹Me lo be nèn ndù mbu màm dun, ndonni Tshùaben be lo' àm bèn yi njam, me b'a mbu ndaṅe. Be bin bèn ntsiaṅ àm Naomi ndùse Tshùaben tam bu i num àm, Nganeta Ntshùate ghùtni àm n'a ndùke?

²²Tshù mba Naomi bo nzwimén i Rut ngon Moab fe mum bag ngô mbat mà Moab là. Bo kum Bétléhém ndùse bo to' nekeb nsa, netsho' ngefet là.