Read Medumba 1 Samuél 10 Bible Online

1 Samuél 10 - Medumba bible

1 Samuél 10

¹Samuél lo' ndô mfèt naṅ num tu Saulo, ntat'é ntshob ndù: Tshùaben yo' o, ngù mfen yi num ze nzwit mèn Israél, z'a b'a ntsi' mi là.

²Sènni, bin à ben bàa nsi bumte ndùse be nsi fagte là. Bin à bo nsi bumte mbaṅ tufi Rahél, ndùnsi Benjamin. Dù' bin à bo bumte bwe là b'a Tseltsa. Bo a' tshob wù ndù: Bo fon nkekwèn ts'o nèn diag là; ndonni tàan ke tshwèt mbèn ntshàm num nu nkekwène; là a ke ntù' lab wul i a num o, nke mbètte tu wul i mb'a ghù num nu nshum i là.

³O nsi nèn mbwe tà kum num tù gham s'a be Tabor là. Bin a ben tat nsi bumte bwe, tse bo tshwèt nèn fà tshule'te Nsi Bétél là. Mo' ta' i nsi ket bon mbwe tat, mbatte bàa ghù nke' bàn ntat, mbatte tat ghù ta' ntu' ndu'.

⁴Bo nsi tsha't'o, fà bàn wù bàa k'o kwé.

⁵Yen nà nsi be tôg o zin nkum Guibéa-Elohim, dù' ze mo' mbàn bwoṅ soyé ba Filistia be là. O nsi be tsho tusô bumte bin mo' bwoṅ ghatshob ntshob Nsi, tse bo fe mfe mbwe' nke nswe' nse'e, ndù bo tshwèt mbu' loṅe, lammbé, nke ntô mandô, nke mbu' loṅ nse' mbwe bo là. Bo nsi ke tshob ntshob ghatshob ntshob Nsi.

⁶Ywèt Tshùaben nsi tsho num o, bin à bo ke ntshob ntshob ghatshob ntshob Nsi, nummb'o nsi tù' bèn b'a mo' mènghua.

⁷Ndùse tshen keki li bumte num o là, mb'a bwô ndù o ghù mba ke lo z'o yen ndù a bwô neghù là, nummbe bin Nsi bèn mbe.

⁸A bwô ndù o bwôg swe' nèn mà Guilgal; m'a' swe' ntèl o bwe, nton ba nyàm bwe Nsi, mbèn mfà tshule'te tse nefà me bam nema' mbu. O nsi béb lé'njù sammbàa, tà kum ndùse me nsi se' mbaṅ o, tshob ju z'o nsi ghù là wù là.

⁹Ndùse Saulo yoṅ ndo mbaṅ Samuél là, Nsi fà ntù nswe yi. Mba ke lo ze Samuél tshob là bumte sen lé'njù là.

¹⁰Ngelaṅ bo kum Guibéa, mo' bwoṅ ghatshob ntshob Nsi se' mbumte boa bo. Ywèt Nsi tsho num i, a tshob ntshob ngatshob ntshob Nsi netèt bo.

¹¹Ben tse bo lèn i mbwe là yen mb'a tshwèt ntshob boa ngatshob ntshob Nsi là, ngô nke ntshob bo bo ndù: Ke z'a tsho num nshum Kis à? Mba Saulo tù' b'a netèt ba ghatshob ntshob Nsi ké?

¹²Mo' ze Guibéa bùnte ndù: Tà yub b'a we? A ndùlala ze bo ta nkùt ndù: Mba Saulo tù' b'a netèt ba ghatshob ntshob Nsi ké là.

¹³Ndùs'a miagte netshob ntshob ngatshob ntshob Nsi là, a nèn mbwe'.

¹⁴Mo' tà Saulo tshob Saulo bo ngafa' i ndù: Bin na' nèn a ya? Saulo bùnte ndù: Bag nèn diag a nkekwène; là, ntsho ke yen yub kà nèn mbaṅ Samuél.

¹⁵Mo' tà Saulo là bèn ntshob ndù: O soṅ àm ju ze Samuél tshob bin nà.

¹⁶Saulo bùnte tàab là ndù: A lo ntshob bag kua' ndù bo fon nkekwène. Nda' ndù ke tshob nu num mba Samuél tshob yi ndù a' be mfen nà.

¹⁷Samuél tsiaṅ ngô mbwe Tshùaben Mitspa,

¹⁸ntshob bon Israél ndù: Tshù ju ze Tshùaben Nsi Israél tshob li: Me lo ghù bin ko' Egipto me ba Israél, ntshu' zin bu ba Egipto mba bu njoṅ nufen fa ts'a ke ma'ni zin nà.

¹⁹Sènni bin ghua' àm, me Nsi zin ze me na' ntshu' zin ntùm nge' tsin fa boa ntobni tsin fa là, nke ntshob ndù: Ghom mfen netèt bag. Ndonni a bwô bin se' mbwe àm, me Tshùaben, ndaṅndaṅ mba nzwit tsin be là boa mba bin be ntsha'ntsha' là.

²⁰Samuél ghù njoṅ tse nzwit Israél fa ghebte, bo tsho' ze nzwit Benjamin.

²¹A ghù ze nzwit Benjamin se' tunndà tunndà, bo tsho' tunndà Matri. A ghù ze tunndà Matri tôg tunndà tunndà. Yen nà be tôg bo tsho' Saulo nshum Kis. Bo diag i, là ke fon yen i.

²²Bo bèn mbètte Tshùaben nu, ntshob ndù: Mo' mènntùn bèn nse' nsen ni ké? Tshùaben bùnte ndù: Tshù i là z'a lem njam tshu là.

²³Bo kù nde nèn nsô i bwe, a se' netèt ngô. A lo sag ntshùa njoṅ yub fa tu i.

²⁴Samuél tshob ngô fa ndù: Bin yen mèn ze Tshùaben tsho' à? Sàm mèn ke ntùm ngô z'a fut'é là. Ngô fa bu' ngoṅ ntshob ndù: Mfen te ku i num nenàfi!

²⁵Samuél soṅ ngô ju ze mfen ghù ngù là, nkite ntùm ta' bu' ṅwa'ni njab mbwe Tshùaben. A be miagte ndé'te ngô, mba we lo bèn ntùm ze ndà.

²⁶Mba Samuél bèn ndà i Guibéa. Ben nenùn tse Nsi kwag ntù yub là nèn ntshag i.

²⁷Mba tà ndùlala ben kebwô tum nke ntshob ndù: Mbe ke di! Ndù yen mèn ni bèn yôg yag à! Bo wag i, ke lo' lèn nda' nse' mfà yi. Là Saulo ke lo' yen nà mba sàm ju là.