Read Medumba 1 Samuél 12 Bible Online

1 Samuél 12 - Medumba bible

1 Samuél 12

¹Ndùlala Samuél tshob ba Israél fa ndù: Me lo ju' ntshu zin num mba ke lo ze bin na' ntshob me là. Me lo ghom ta' mfen netèt bin.

²Tshù mfen z'a ghù ntô zin ndonni li. Mba me là, me ywèn kà mfôge, tshàm nshum b'a netèt bin; me lo be tu netèt bin fe ndùse me be ménnshum nà tà nse' nkum sènni.

³Tshù me li! Bin tshob nu num àm mbwe Tshùaben mba mbwe mèn a yo' i là, a be ze bin yen kebwô num àm nà. We ze me na' nkwé nyàmna' i ke kekwèn i à? We ze me na' ma'ni i à? We ze me lo' ntutntut ntsho i yi à? We ze me na' nkwé nda' yi kà nkabt'é à? Ng'é tum me ba' ju ze me kwé yi là.

⁴Bo bùnte ndù: O lo ke to' ma'ni yage, ke to' lo' ntutntut ntsho yag yi, ke to' kwé ju bu mèn.

⁵Samuél bèn ntshob bo ndù: Tshùaben b'a ngakwénta num bin, mèn a yo' i là be nkwénta sènni ndù bin ke' tèt sàm kebwô num àm. Bo bùnte ndù bo b'a ghakwénta.

⁶Samuél tshob ngô ndù: Tshùaben b'a nkwénta, yi z'a na' mbèn ntsho' Mosé bo Aron, ngù tà tsin fe ngô Egipto mbèn njam nà.

⁷Ndonni bin se' mbwe Tshùaben me tsho'te zin num mebwô fa ts'a ghù bin bin à tà tsin nà.

⁸Ndùse Yakob nèn Egipto là, tà tsin tswe bwe nkua' ntsiaṅ Tshùaben, a tum Mosé bo Aron, bo sô tà tsin Egipto, nse' nte yub num yen dù' li.

⁹Là bo lag Tshùaben Nsi yub; a swèn yub mum mbu Sisera, tàndà ntsho Hatsor, ntùm mbu ba Filistia, mba ntùm mbu mfen Moab, a ma' yub ntsho.

¹⁰Bo bèn nkua' ntsiaṅ Tshùaben, ntshob ndù: Bag ghù nukebwô, nummbe bag lo ghua' Tshùaben, nke mfa' ba Baal boa Astarté; tshu' yag ndonni ntùm mbu ghakeban tshage, bag nsi tù' ke fa' a wù.

¹¹Ndùlala Tshùaben tum Yérubbaal bo Bedan, Yefté bo Samuél. A se' ntshu' zin mbu ghakeban tse bo lam zin mbum nà, ngù bin tswe fite.

¹²Là ndùse bin yen Nakash mfen ben Ammon nke nse' num bin nà, bin tshob me ndù: Nga man, a bwô ta' mfen tô yage. Mbe ndù Tshùaben Nsi zin bèn mbe zin mfen.

¹³Ndonni tshù mfen ze bin na' ntsho'o, ze bin na' mbètte li; tshù mfen ze Tshùaben yab netèt bin ni.

¹⁴A be ze bin bwôg Tshùaben, a be ze bin fa' yi, nju' ntshu i, ke be ghatatu num ntshob Tshùaben, mba bin nsi lat num Tshùaben Nsi zin, bin mba mfen z'a nsi tô netèt bin nà.

¹⁵Là, a be ze bin ke' ju' ntshu Tshùaben, mbe ghatatu num ntshob mi là, mba bu Tshùaben a' lo nsi num bin, mb'a na' ndo nsi num tà tsin nà.

¹⁶Bin bèn mbéb nsen ni, njen nu netshàm ze Tshùaben a' ghù num miag min nà.

¹⁷Ndonni ke b'a ndù netsho' ngefet ké? M'a' tsiaṅ lén Tshùaben, a tum mfambaṅ bo mbaṅ. Ndùlala, a bwô bin lèn ndù bin fàn à nu mbwe Tshùaben, mba bin bètt'é ta' mfen nà.

¹⁸Samuél tsiaṅ lén Tshùaben, a tum mfambaṅ be kua' sen lé'njù là. Ngô fa bwôg Tshùaben bo Samuél neshu.

¹⁹Ngô fa tshob Samuél ndù: Le'te Tshùaben Nsi o num tu ghafa' tsho, ndùlala ndù kà bag kwù. Nummbe bag lo kwi'te nukebwô tshage, mfàn nu mba bag bètte ta' mfen netèt bag là.

²⁰Samuél tshob ngô ndù: Kà bin bwôg! Bin lo ghù yen kebwô là; là kà bin sô wut zin num Tshùaben. Bin ke mfa' Tshùaben njoṅ ntù zin fa.

²¹Kà bin sô wut num i nèn nke mfa' tshu banban, tse bo ke' be tshu' mèn ke yôg i là, nummbe tshen tshu là b'a tse banban.

²²Tshùaben ke nsi ghua' ze nzwit mèn, num nu lèn se se ndùb, nummbe Tshùaben jù' nelo' zin ngù ze nzwit mèn yi.

²³A ke' bwô mba yàm tu wut ghù nukebwô num Tshùaben, ke tsin nele'te num tu bin! M'a' tswite zin manze ntùn bo ze manze ndaṅndaṅ.

²⁴Bin bwôg nda' Tshùaben, bin ke mfa' yi ntù ntshù', kua' ngô ntù zin fa. A bwô bin yen lèn neta z'a tshwèt nda'te netèt bin nà.

²⁵Là, a be ze bin ghù nukebwô là, mba bin nsi kwùte fa, bin mba mfen zin.