Read Medumba 1 Samuél 13 Bible Online

1 Samuél 13 - Medumba bible

1 Samuél 13

¹Saulo lo ghù ngu'njù ndùs'a tù' mfen nà, ntô Israél num ngu'njù bàa.

²Saulo tsho' ben ntsha' tat netèt bon Israél: Boa tse ntsha' bàa na' mb'a Mikmash mba num mbat Bétél. Tse ntsha' mbùm be boa Yonatan Guibéa, ngô Benjamin. A lé'te tshé' benntùn, mba we lo bèn ze ndà.

³Yonatan zwi tàndà ntsho ba Filistia z'a be Guéba là, ba Filistia ju' yen nu là. Saulo ghù bo tô nta ntùm ngô fa, ntshob ndù: Ba Héber ju' njoṅ yub fa.

⁴Njoṅ ba Israél fa nke nju' yub à mbe Saulo bèn nzwi tàndà ntsho ba Filistia. Ba Israél be tshùagkèt benntùn num miag ba Filistia. Ndùlala ngô tèt Saulo Guilgal mb'a tsiaṅ yub là.

⁵Ba Filistia tse'te num nema' Israél ntsho. Bo lo ghù nkalig ntsha' ṅam ntat, ngù ghako' nyàm ntsha' ntôge, ngù soyé bo yàm mba nkwango' mi a kaṅ dibantse là. Bo nèn nkum Bét-Avèn nze ntumnyam, nte yub mbàn bwe.

⁶Ba Israél be yen mba bo fùage, ndù bo mem yub bag bag là, nkù ntshote ba ngabndoṅ, ntùm ba tswe' nenà, ntùm ba ngondoṅ, ntùm ba nsam boa ntôntse.

⁷Tsemo' ba Héber dut Yordan nèn ntùm ngô Gad bo Galad. Saulo na' nke' à be Guilgal, benntùn tse bo be mbaṅ i là nke mbwôge, mvètte.

⁸Saulo béb lé'njù sammbàa, njoṅ ngelaṅ ze Samuél yab là; là Samuél ke yoṅ nkum Guilgal, ngô to' nke nsate.

⁹Ndùlala Saulo tshob ndù: Bin lo' nyàm be ton na boa tshule'te tse nefà me bam nse' mfà me. A ton nyàm.

¹⁰Ndùs'a ke miagte neton nyàm nà, Samuél ṅwag. Saulo tum nèn mbwe i tsha't'é.

¹¹Là Samuél tshob ndù: Ke z'o ghù ndù à? Saulo bùnte ndù: Me lo njen ngô nke nsate, nke ntshob mb'o ke' se' lé'njù s'o yab là, ba Filistia kùmte Mikmash, ndùlala me tshob ndù:

¹²Ba Filistia a' kab mbu num àm Guilgal, ke be ndù me ghù ju z'a bwô Tshùaben nà. Ndùlala me tshob ndù a bwô tu wul àm ton nyàm Tshùaben yàm tu wut.

¹³Samuél tshob Saulo ndù: O ghù à mba mbabun nà. O ke' ze ntshù' Tshùaben Nsi o na' mfà wù là. Ndùlala be Tshùaben ke bèn ngù yu nufen ghum mum ngô Israél.

¹⁴Ndonni yu nufen ke nsi ghubte. Tshùaben tsho' mo' mèn ze ntù i kô là. A lo' i ngù mfen yi num ze nzwit mèn, nummb'o ke' ju' ntshu Tshùaben num tshu ts'a tshob wù là.

¹⁵Samuél lo Guilgal nèn tse Guibéa z'a be ntùm ngô Benjamin nà. Saulo tsha' tshé' benntùn tse boa bo tù' là. Bo tum nguan benntùn nkù ntôge.

¹⁶Saulo, nshum i Yonatan boa benntùn tse boa bo be là tsinte njam Guibéa z'a be ngô Benjamin nà. A lo be be ndù ba Filistia te mbàn Mikmash.

¹⁷Mo' bwoṅ fimntshu tum mbàn ba Filistia, ngabte nkam ntat. Mo' kam i lo' nze Ofra, nze bag ngô Shual;

¹⁸mo' lo' nze Bét-Horon; mbatte tat lo' nze ndùnsi z'a tshwèt ndôte tômbo' Tséboim nà. A b'a nze bag kônkwa.

¹⁹Sàm tàlàm lo ke bèn mbe ntùm ngô Israél fa; nummbe ba Filistia lo tshob ndù: Be tshètte ba Héber kà bo bèn netswe ba ṅwi ke nkô lo.

²⁰Kà mba zit ze Israél lo nke nswe' nèn à Filistia kà nkùa ze sofa', ze nsà sofa', ze njàm bo ze nsà sofa'.

²¹Nkàbfa' num ba nsà sofa' bo njàm na' mb'a bontsit mfé silba bàa, nkàbfa' nsà ntshu sofa' nsô ntat be metsit mfé silba.

²²A lo be kum lé'njù ntsho, sàm ṅwi ke kô lo ke bèn mbe bu ngô z'a be njam Saulo bo Yonatan nà. A na' mb'a nda' mbaṅ Saulo bo nshum i Yonatan.

²³Mo' ntshu ntsho te ze mbàn nze bo be ntsho yi Mikmash là.