Read Medumba 1 Samuél 15 Bible Online

1 Samuél 15 - Medumba bible

1 Samuél 15

¹Samuél tshob Saulo ndù: A b'a me ze Tshùaben na' ntum àm ndù me yo' o fen num ze nzwit mèn Israél là. Ndonni ju' ju ze Tshùaben tshob là.

²Tshùaben tàndà ntsho tshob ndù: Me kwimte ju ze Amalék ghù Israél ndùs'a tum Egipto, mfùn manze yi là.

³Ndonni, nèn nkam ba Amalék, mbagte tshu fa tse bo ghù là ke faṅ sàm ju; kà faṅ sàm ju, zwi bandum fa, bènnzwi, bônke' boa bonfi, nyàmna' boa mbwe, kamél boa nkekwène.

⁴Saulo tsiaṅ ngô, nsiaṅte yub Telaim, ghama' ntsho tum Israél ntsha' nkù bàa, ntum Yuda ntsha' gham.

⁵Saulo tam nze nèn nkum tà tusô Amalék ndem benntùn bwe tômbo'o.

⁶A tshob ben Kén ndù: Bin tum netèt ba Amalék nène, mbwôg ndù kà me biagte zin bin à bo, nummbe bin lo ghù ntù mebwô num bon Israél ndùse bo ke nko' Egipto là. Ben Kén tum netèt ba Amalék.

⁷Saulo tshùa ba Amalék nelo Havila nèn nkum Shur z'a be mbwe Egipto là.

⁸A ghom Agag mfen Amalék ntùnntùn, ntam bu' ntùm ngô, nzwite benntùn fa.

⁹Là Saulo boa ben tse ke zwi Agag, ba mbwe mebwô, ba nyàmna' mebwô boa bon nyàm mebwô, njùmbwe ts'a tshote là, tshu ts'a bwô là; bo ke kô netam bu' bwe. Bo tam bu' nda' num tshu ts'a ke' bwô, njum nà.

¹⁰Tshùaben tshob Samuél ntùm ntshob mi ndù:

¹¹Me fém mba me na' nte Saulo num fen nà, nummb'a num nsô wut num àm, ke be ze ju ze me tshob yi là. Nu tse bag Samuél, a ma' mbu Tshùaben njoṅ yen tèttswe' là fa.

¹²A lo nsi kua' mà nkebnjù nèn mbwe Saulo. A ju' mbe Saulo lo nèn nkum Karmél, kà nkut ta' ntshaṅ bwe. Yen nà lo be tôg a bèn njam, mbe bèn ntshùa tà nesà nswe' nèn Guilgal.

¹³Samuél nèn mbaṅ Saulo, Saulo tshob yi ndù: Samuél, a bwô Tshùaben tam ntse wù! Me lo ze kàn se.

¹⁴Samuél bètte Saulo ndù: Kà tshen mbwe boa nyàmna' me tshwèt nju' bo nkua' là b'a ndùke?

¹⁵Saulo bùnte ndù: A b'a ben tshàm bèn ndo' mfe yi ngô Amalék. Nummbe ngô lo ke zwite ba mbwe mebwô boa nyàmna' mebwô, ndé' yub nese' mfà tshule'te yi Tshùaben Nsi o. Bag lo tam bu' num tshé' i, nzwite fafa.

¹⁶Samuél tshob Saulo ndù: Tsin ndùlala me soṅ o ju ze Tshùaben tshob me yen tèttswe' li là. Saulo tshob ndù: Tshobe.

¹⁷Samuél tshob ndù: Ndùs'o na' nke' a mônke' num miag mu là, o lo ke tù' mfen njoṅ tse nzwit Israél fa ké? Tshùaben lo ke yo' o ngù mfen ba Israél yi ké?

¹⁸Tshùaben lo tum o, ntshob ndù: Nèn ntam bu' num tshen ben kebwô, ba Amalék là. O nsi ma' yub ntsho kà biagte yub fa.

¹⁹Numk'o mbe ke ju' nze Tshùaben à? Numk'o ngwù num ntsha', ngù ju z'a ke' bwô là num miag Tshùaben à?

²⁰Saulo bùnte Samuél ndù: Me lo ju' nze Tshùaben, nzin kua' num manze ze Tshùaben bètte ndù me zin bwe là. Me lo' Agag mfen Amalék mfe yi, ntam bu' num ba Amalék fa, nzwite yube.

²¹Là ngô lo' ba mbwe boa nyàmna' num ntsha', a be mbwe tshu num tse bo tam bu' bwe là, ndùlala ndù bo fà tshule'te yi Tshùaben Nsi Guilgal.

²²Samuél tshob ndù: Tshùaben be nju' mebwô ndùse mèn ju' nz'é là ntshùa neton ba nyàm yi ke nefà tshule'te lo. Neju' ntshu bwô ntshùa jule'te, nefà wut nsi bwô ntshùa nzit ba njùmbwe.

²³Tatu b'a be nevù ntsha mba netshaṅ ka là. Nebe ke ju' ntshu be be mba mfànnu njam neto là. Mb'o ghua' ntshob Tshùaben nà, mba ze tu wut ghua' o, nkwé fen wù.

²⁴Ndùlala Saulo tshob ndù: Me ghù nukebwô; me fàn nu ze Tshùaben tshob là, ngwù num ntag mi. Me lo bwôg ngô tà nju' ntshu i.

²⁵Ndonni, me le't'o ndù o lagte nukebwô àm, bag wù bèn njam, me vù nsi mbwe Tshùaben.

²⁶Samuél kua', ntshob ndù: Nga, be bag wù ke bèn mbèn njam. O lo ghua' ntshob Tshùaben, Tshùaben ghua' o, ke bèn nkô ndù o be mfen ba Israél.

²⁷Mba Samuél ke nkaṅ wul i nèn nà, Saulo tshùb i, num tôg kummbaṅ se a fag.

²⁸Samuél tshob yi ndù: Tshùaben kwé fen Israél wù sènni, mfà mo' mèn z'a tum mènntùn ntshùa o là.

²⁹Ze neta Israél z'a b'a Nsi là ke' be tatte, ke be kaṅ ntù i, nummb'a ke' b'a mènntùn ze b'a nke nkaṅ ntù i là.

³⁰Saulo bèn ntshob ndù: Me ghù nukebwô! Ndonni me le't'o ndù o ghù nku'ni me mbwe ghakwé mbwe ntùm yàm ngô mba mbwe Israél; a bwô bag wù bèn njam me vù nsi mbwe Tshùaben Nsi o.

³¹Samuél bèn njam bo Saulo, Saulo vù nsi mbwe Tshùaben.

³²Samuél tshob ndù: Lo' Agag mfen Amalék nse' yi. Agag kù' nse' mbaṅ i ntùm zwi, nke ntshob ntù i ndù: Mo' ndù zwe vùkob yà tôge.

³³Samuél tshob ndù: Ndaṅndaṅ mba ṅwi ghù bènnzwi tù' mà ke mén nà, mba màan nsi bi ta' nshum i netèt bènnzwi. Samuél tshu'te Agag ṅwi nkamnkam mbwe Tshùaben Guilgal.

³⁴Samuél nèn Rama, Saulo ko' nèn ntùm ndà i Guibéa.

³⁵Samuél ke bèn nèn lôte Saulo tà nkum lé'njù s'a kwù là; nummbe Samuél lo làn num Saulo, mba Tshùaben fém mb'a te i num fen Israél là.