Read Medumba 1 Samuél 16 Bible Online

1 Samuél 16 - Medumba bible

1 Samuél 16

¹Tshùaben tshob Samuél ndù: O nsi làn num Saulo tà kum a ndùke? Me lo kwé fen Israél yi. Ghù mo' ndô mfèt bàm o. M'a' tum o Bétléhém la' mo' mandum lén se Isaï, nummbe me fon mo' ta' nshum i, a tum mèn ze ntù àm kô nelo' i ngù mfen yi là.

²Samuél tshob ndù: M'a' nèn a ndùke? Saulo ju' mb'a nsi zwi àm. Tshùaben tshob ndù: O nsi lo' metshab mfô nèn yi, ke tshob ndù: Me se' fà a ta' jule'te Tshùaben.

³O nsi tsiaṅ Isaï nsi ngelaṅ o fà jule'te là. M'a' soṅ o mb'o nsi ghù là, o yo' mèn ze me nsi la'te wù là me.

⁴Samuél ghù ju ze Tshùaben tshob yi là ndo nèn Bétléhém. Ghakwé mbwe tse bo be tusô là kù nde nse' mbwe i ntùm vètte, mbètt'é ndù: O lo' a tshô mebwô nse' yi ké?

⁵A bùnte ndù: Ṅ, me se' fà a jule'te Tshùaben. Bin lànte wut tsin nse' bag bin nèn mfà jule'te. Bo ghù mba Isaï boa tse nshum lànte wut, bo tsiaṅ yub dù' jule'te là. Samuél lo nsi nèn Rama.

⁶Ndùse bo tsho bwe là, Samuél tshob ntù i ndùs'a yen Eliab là ndù: Yen mèn z'a tsin mbwe Tshùaben nà b'a z'a tsho' là kà ke tag.

⁷Tshùaben tshob Samuél ndù: Kà lôt'a ntshù mi bo mb'a sag là, nummbe me ke' lo' i. Tshùaben ke' be yen à mba mènntùn num njen ze là; mènntùn ke njen à z'a bwô num miag là, là Tshùaben nke ndôt'a ntù mèn.

⁸Isaï tsiaṅ nshum i Abinadab, ngù a tshùa mbwe Samuél; Samuél tshob ndù: Tshùaben ke' tsho' tse mba yen mèn ni.

⁹Isaï ghù nshum i Shamma tshùa; Samuél tshob ndù: Tshùaben ke' tsho' mba yen mèn ni.

¹⁰Isaï ghù nshum tse ntu sammbàa tshùa mbwe Samuél; Samuél tshob Isaï ndù: Tshùaben ke' tsho' sàm mèn netèt bo.

¹¹Samuél bètte Isaï ndù: A b'a njoṅ nshum tsho li ké? A bùnte ndù: Mfèt yub ze nke' ke'e, a ke mbéb à mbwe. Ndùlala Samuél tshob Isaï ndù: Tum bo nèn ndiag i, nummb'a be be ke jù ju ke be ndù a yoṅ nse' nsen ni.

¹²Isaï tum bo nèn ndiag i. Tshù, wul i lo làne, a ghù miag mebwô, se i bèn mbwô neshu. Tshùaben tshob Samuél ndù: Lo nsi, njo' i, tshù ng'é là.

¹³Samuél lo' ndô mfèt, njo' i yi netèt fèt tse. Ywèt tsho num David fe num sen lé'njù là, mba ndù mànjam.

¹⁴Ywèt Tshùaben tum num Saulo, ywèt kebwô ts'a fe Tshùaben nà nyi't'é.

¹⁵Ghafa' Saulo tshob yi ndù: Tshù ywèt kebwô là ts'a fe Nsi là tshwèt nyi't'o.

¹⁶A bwô ndù Tshùaben tshobe! Ghafa' tsho b'a mbwe o. Bo a' nèn ndiag mèn z'a lèn nebu' loṅ nà; a nsi bu' loṅ bu i wul o na' mbù'te ndùse ywèt Nsi tse kebwô nsi se' num o là.

¹⁷Saulo bùnte ghafa' tse ndù: Bin fon mèn z'a lèn nebu' loṅ kua' mebwô là nse' mfà me.

¹⁸Mo' ngafa' i tshob ndù: Me yen mo' nshum Isaï ze Bétléhém ndù a lèn nebu' loṅe; a b'a neta mèn, mbe neta nduku, ngama' ntsho, ndù a num ntshob kua' mebwô, se i bèn mbwô neshu, mbe ndù bo Tshùaben bèn mbe.

¹⁹Saulo tshag ba ntum Isaï ntshob yi ndù: Tum nshum o David z'a be boa mbwe là me.

²⁰Isaï lo' ta' kekwène, njab bàn bo ta' ntu' ndu' mba mén mbwe bwe, ntum tshen tshu là nshum i David nèn mfà Saulo.

²¹David kum mbaṅ Saulo, ntsin mbwe i, nu David bwô Saulo neshu, bo tsho' i neke ntshùb tshu ntsho tse.

²²Saulo tum bo tshob Isaï ndù: Me le't'o ndù o faṅ David ntùm yàm ntshufa', nummb'a tum mènfen num miag màm.

²³Ndùse Ywèt kebwô z'a fe Tshùaben be num Saulo là, David lo' loṅ bu i mbu'u; yen ngelaṅ nà Saulo zwiag mebwô, wul i bù'te, Ywèt Nsi tse kebwô tum num i.