Read Medumba 1 Samuél 17 Bible Online

1 Samuél 17 - Medumba bible

1 Samuél 17

¹Ba Filistia tse'te tshob soyé num nema' ntsho, nkùmte Soko z'a be Yuda là; bo te mbàn netèt Soko bo Azéka Efésô-Dammim.

²Saulo boa ba Israél bèn ntse'te yub; bo kùmte tômbo' térébintô, ntsin nka nema' ba Filistia ntsho.

³Ba Filistia lo be num mbale, mo' yoṅ, ba Israél be num mbale, mo' yoṅ, tômbo' be netèt bo.

⁴Mo' mandum tum mbàn ba Filistia nse' netèt ntshu ntsho bàa. Lén se na' mb'a Goliat. A na' mb'a ze Gat. Goliat sag nèn tù nguan mbu ntat.

⁵Ta' tshe' tùn lo be tu i, nzwe tùn be num i, ndù a lèt nguan kilô ṅam ntôge num ndô nkàb ntsha' tàn.

⁶A lo ghù tshu ntsho tùn num nku mi, ngù ta' kô tùn nkembe' i.

⁷Ze mfànkô lo b'a mba ṅwi bàm ngaba' bàm nà, kô lèt nguan kilô gham. Mèn z'a ke ntshùb tshètntsho yi là nke nzin mbwe i.

⁸Ze Filistia tsin, nkua' neta ntshob ze ntshu ntsho ba Israél z'a tsin nka num ntsho là ndù: Numke bin ntum ntsin nka num ntsho ndù à? Bin ke b'a kuan Saulo, tu wul àm ke be ze Filistia ké? Bin tsho' ta' mèn netèt bin a swe' nse' num àm.

⁹A be z'a lab àm nzwi àm nà, mba bag nsi tù' kuan tsine; là a be ze me lab i nzwi i là, mba bin a' tù' kuan tshage, nke mfa' bag.

¹⁰Ze Filistia bèn ntshob ndù: Me wag ntshu ntsho ba Israél sènni! Bin fà ta' mèn me bag yi ma' ntsho ntu bàa.

¹¹Saulo boa ba Israél fa ju' men ntshob ze Filistia là, wut yub fét, mà bwôg ndùb ghom yube.

¹²David na' mb'a nshum Isaï z'a be Efrata là. Efrata b'a Bétléhém mà Yuda. Isaï lo ghù nshumnshum fome. Saulo lo be jù fen ndù Isaï yà ywèn kua' neshu.

¹³Mbwe nshum tse tse tat lo b'a tshwèt ntsho boa Saulo. Lén ntshùambwe na' mb'a Eliab, mbatte bàa be Abinadab, mbatte tat be Shamma.

¹⁴David na' mb'a ze nke' z'a be netèt bo là. Ndùse ntshùambwe tse tse tat be boa Saulo là,

¹⁵tu wul i David nke nèn Bétléhém, num neke mbéb mbwe tàab.

¹⁶Goliat ze Filistia nke ngwag Israél nkebnjù bo mfetnjù num lé'njù ṅam nkuà.

¹⁷Isaï tshob nshum i David ndù: Lo' bon miag kesoṅ ngefet neka li boa ntu' bàn gham ni, nkù nde nèn mfà fèt tsho tshwèt.

¹⁸Lo' mba mbùn nekut li nke' gham ntsho mfà mfen yub z'a num ntô ben ntsha' mbùm nà. Lôte mbe ze fèt tsho tswe mebwô là o se' mfà tshô me bo ju z'a fe bo là, me lèn ndù o yen yube.

¹⁹Bo b'a boa Saulo mba njoṅ ba Israél fa tômbo' térébintô nke ma' ba Filistia ntsho.

²⁰David lo nsi bam nkebnjù, mfaṅ ba mbwe ta' ngalôte, nket bàm ndo nèn mba Isaï tshob yi là. A be kum mbàn ntshu ntsho nabte wut ntsin nka nema' ntsho, nke mbu' ngoṅ ntsho.

²¹Ba Israél mba ba Filistia nke nabte wut num ntsho, mo' ntshu ntsho nke ndo nsi num mo'.

²²David fà tshu mbu ngalôte tshu, nkù nde nèn ntsho nka ba soyé. Ndùs'a yoṅ ṅwag là, a bètte fèt tse mba bo lo' ntswe yi là.

²³Ndùs'a ke ntshobte boa bo là, Goliat ze Filistia mà Gat tum ntùm nka tse soyé ba Filistia ntsin netèt ntshu ntsho bàa. A bèn ntshob be mb'a na' nto' nke ntshob là, yen nu là tam toṅ David.

²⁴Njoṅ ba Israél fa be yen mèn nà, nkù mbwe i, mà bwôg ndùb ghom yube.

²⁵Mba we lo nke ntshob ndù: Bin yen mba mandum nà tshwèt nkù nse' à? A ke nse' ndùlal'a num nema' wag num Israél! A be ze mèn zwi i là, mba mfen nsi fà tshunkàb yàm yi, fà ngon i ng'é, ng'é bèn ntshu' tunndà tàab ntùm ngô Israél num nu ntshub.

²⁶David tshob ben tse bo be mbaṅ i là ndù: Be bo ghù à ke mèn ze b'a zwi yen ze Filistia li, nsô tuswe tu ba Israél l'à? Kua' yen ze Filistia li, yen kesiket li b'a we kà nke ntute ntshu ntsho Nsi z'a be ntùn n'à?

²⁷Ngô bèn ntshob be tshu ts'a lo nja tshob là, ntshob yi ndù: Mba bo nsi ghù num mèn z'a nsi zwi i l'a kua' ndùlala.

²⁸Eliab ntshùambwe David z'a ju' a tshob tshen ben nà là, ya ntù David kua' kebwô, ntshob yi ndù: Numk'o nswe' nse' nsen ni à? O faṅ metshé' mbwe là z'a tù' l'a wù kônkwa à? Me lèn mb'o be nka'te tsho là, ndèn lamte kebwô z'a ntù o là. O swe' nse' yen à ntsho.

²⁹David bùnte ndù: Kua' ke ze me yôg ngù à? Be me ke tshob ndùlili ké?

³⁰A kaṅ wul i ke bèn ntshobte bo yi, ntù' tshobt'a bo mènghua, mbètte ng'é be tshunu ntshù'. Ngô bèn mbùnte yi be mb'a to' bùnte mbwe yoṅ i là.

³¹Bo ju' ntshob David, nèn nsoṅ Saulo, a tum bo nèn ntsiaṅ i.

³²David tshob Saulo ndù: A ke' bwô ndù sàm mèn bwôg num yen ze Filistia là! Me ngafa' o, m'a' nèn bag yi ma' ntsho.

³³Saulo tshob David ndù: Nga, b'o ke nèn ma' ntsho bin yen ze Filistia là, nummb'o b'a mén, yen mèn nà b'a ngama' ntsho fe ndùs'a be ménnshum nà.

³⁴David tshob Saulo ndù: Me ngafa' o, me lo ke mbéb mbwe tàa. Ndùse ta' ngwayit ke ta' mbù tshwèt lo se' ngom ta' mbwe lo là,

³⁵mba m'a' yab njam i, ndab i à vùvù, nkwé mbwe ntshu i. A be z'a bù' tu i nsi num àm nà, mba m'a' tshùb i ntôntô, ndab i kà nzwi i.

³⁶Tshù mba me ngafa' o na' ma' mbwôg ntshu ngwayit bo mbù tshwèt là; m'a' bèn ngù be ndùlala num ze Filistia, yen kesiket là z'a tshwèt ntute ntshu ntsho Nsi z'a be ntùn nà.

³⁷David bèn ntshob ndù: Tshùaben z'a na' ntshu' àm num nkib ngwayit mba num ku mbù tshwèt là nsi bèn tshu' àm mba bu yen ze Filistia là. Saulo tshob David ndù: Nène, a bwô ndù bin Tshùaben bèn mbe.

³⁸Saulo tshob bo ma' tse nzwe num David, nte tshe' tùn tu i, ma' kum tùn num i.

³⁹David taṅ ṅwi Saulo num nzwe tse, nto' ndiag nezine, nummb'a lo ke yoṅ mfi'te. Là, a tshob Saulo ndù: Be me ke lo' tshàm tshen tshu ntsho li nzin yi nze, nummb'a ke' b'a matnu me ndùlala. A sô tshen tshu là num i.

⁴⁰A lo' kôg se ntshùb bu i, ndo' mfé ndoṅ ntùn mi a béte là ntùm fube, ma' ntùm bàm mbéb mbwe z'a be yi là. A lo' shùmte se ntshùb bu i, nke nswe' nèn num ze Filistia.

⁴¹Ze Filistia na' nke nswe' nse' num David mén nda'nda', mèn z'a ket ze tshètntsho là be mbwe i.

⁴²Ze Filistia lôte, mbe yen David ngwag i, nummb'a lo yen a b'a mén, ndù wul i làn, se i bwô neshu.

⁴³Ze Filistia tshob David ndù: Me b'a mbù ké, k'o nke ndo' ba nkôg nse' yi num àm à? A tshob ndùlala ndo' nsi tse nso ndon yi tu David,

⁴⁴ntshob ndù: Se' me fà mbàb wul o nsaṅ mi a mfe kamànyam nà boa nyàm tshwèt.

⁴⁵David tshob ze Filistia ndù: O tshwèt ndo' ṅwi, kô bo kô nja' nke nse' yi num àm; tu wul àm ke nse' yàm num o à num lén Tshùaben tàndà ntsho. A yi bèn mbe Nsi ntshu ntsho ba Israél z'o tshwèt ntute là.

⁴⁶Tshùaben a' swèn o ntùm mbu màm sènni, me zwi o, nkeb tu o; me nsi fà ba fe ben tse bo be mbàn ba Filistia là sènni nsaṅ mi a mfe kamànyam nà, mba nyàm tse bo be nsitsha' là. Yen ngelaṅ nà nsitsha' fa nsi lèn ndù Israél ghù ta' Nsi.

⁴⁷Yen bwoṅ benntùn ni nsi lèn ndù Tshùaben ke' ke ndo' à ṅwi ke kô lo kà njôg mèn yi. Nummbe neyob ngu' ke mfe à Tshùaben. Mbe ndù a nsi swèn zin num mbu mage.

⁴⁸Ndùse ze Filistia na' njoṅ nkumte wul i nese' num David là, David kù nde nèn num i tshwèt ntsho.

⁴⁹A so bu i ntùm bàm mbéb mbwe z'a ghù là, ndo' shùmte z'a ghù là ma' loṅ s'a sô bàm nà yi. Loṅ nà tam num mbumse ze Filistia ntsho ntùm bwe. Ze Filistia là tsho' ntam nsi se se.

⁵⁰Ndùlala David lo' loṅ bo shùmte nta yi ntshùa ze Filistia; a ma' mbwôg ntshu i, nzwi i, ke be ndù a ghù ṅwi bu i.

⁵¹David kù nde nèn mbaṅ ze Filistia ntsho' ṅwi z'a be yi là mbàn, nzwi i yi, ntsho' tu i. Ba Filistia be yen mba yub sa'nde' kwù là, nto' nekù.

⁵²Ba Israél boa ba Yuda yab njam bo, mbu' ngoṅ, nta' ba Filistia nèn nkum tômbo'o, tà nèn nkum ntshu mbu' Ekron. Ba Filistia tse bo kette mfaṅ ndùbndùb là vùte nsi, nkwùte num manze Shaaraim tà nèn nkum Gat, tà nèn nkum Ekron.

⁵³Bon Israél be lo njam ba Filistia, mbèn njam, ndag ntsha' ntùm yub mbàn.

⁵⁴David lo' tu ze Filistia nèn yi Yérusalém, njab tshu ntsho ze Filistia ntùm ze ntàb.

⁵⁵Ndùse Saulo yen David nke nèn num ze Filistia là, a bètte Abner tàndà ntsho ndù: Yen ménnshum ni b'a nshum we? Abner bùnte ndù: Mfen, me nu ngu wù ndù me ke' lèn tshàm.

⁵⁶Mfen tshob Abner ndù: Bètte ndèn mèn ze ménnshum nà be nshum i là.

⁵⁷Ndùse David fe nezwi ze Filistia là, Abner lo' i nèn yi mbwe Saulo. David be nèn mbwe Saulo ndù a tshùb tu ze Filistia bu i.

⁵⁸Saulo bètte David ndù: O b'a nshum we ménnshum? David bùnte ndù: Me b'a nshum ngafa' o Isaï ze Bétléhém.