Read Medumba 1 Samuél 19 Bible Online

1 Samuél 19 - Medumba bible

1 Samuél 19

¹Saulo tshob nshum i Yonatan mba ghafa' tse fa ndù a nsi zwi David. Là Yonatan z'a ke nkô David neshu là,

²soṅ i ntshob yi ndù: Tàa Saulo, tshwèt ndiag nezwi o. Ndonni, a bwô ndù o zete ndamnjù nkebnjù. Tum nèn njamnjam, ndem tu o.

³Me nsi tum se' tsin mbaṅ tàa mà tshwèt dù' z'o nsi be là, tshob nu tàa num o; m'a' yen ju z'a nsi tshob là se' tshob wù.

⁴Yonatan tshob nu tàab mebwô mfà num David, ntshob ndù: A ke' bwô ndù mfen ghù nukebwô num David ngafa' i, nummbe mba tu wul i ke' ghù num o. Mba nu là, a tsha' ngù a mebwô num o.

⁵A lo swèn yôg se, nzwi ze Filistia. Tshùaben lo tshùa njam i ntshu' Israél kua' neshu. Tu wul o b'a nkwénta num yen nu là, ndù o tsiaṅte num bwe. B'a bèn ntshùa à ndùke, k'o ghù nukebwô num mbu' à? B'o zwi David ke ntun ndù à numke?

⁶Saulo ju' ntshu Yonatan, nu ngu ntshob ndù: Num lén Tshùaben z'a be ntùn nà David ke nsi kwù.

⁷Yonatan tsiaṅ David nsoṅ i njoṅ men ntshob là fa; yen nà be tôg a lo' i nèn yi mbaṅ Saulo. David bèn mbe mbwe Saulo à mb'a to' be mbwembwe là.

⁸Ntsho bèn nkam netèt Filistia boa ba Israél. David ma' yub kua' kebwô kà bo lo mbwe i nkù nène.

⁹Ywèt kebwô ts'a fe Tshùaben nà tsho num Saulo mo' lé'njù. A lo be be ndù Saulo b'a ndà i bo kô se bu i.

¹⁰David nke mbu' tshu mbwe Saulo, a nke ndiag nelo' kô mféb David yi mbaṅ ba'. David tum ntshu Saulo, a féb kô se mbaṅ ba'. David kù, ntum tèttswe' nène.

¹¹Saulo tum benntùn num ba' David ndù bo nèn ndôt'é, nzwi i nkebnjù. Là Mikal nzwi David soṅ i, ntshob yi ndù: A be z'o ke' kù yen tèttswe' li là mb'o nsi kwù ndamnjù.

¹²Mikal tshag David tôndà, a swe' nkù nène. Tshù mat David kù yi kà nèn nà.

¹³Yen nà be tôg Mikal lo' neto térafim njab num kune, ndo' ngub mbwe njab tu i, nkabt'é nzwe mfùag.

¹⁴Mikal tshob ndùse Saulo tum bo se' lo' David là ndù: A tshwèt ngone.

¹⁵Saulo bèn nta' yub ntshob bo ndù: Bin lo' i num kun se nse' yi me zwi i.

¹⁶Bo bèn njam, nse' ntèl a neto térafim kune, bo ngub mbwe tu i.

¹⁷Saulo tshob Mikal ndù: Numk'o ntatte ndù mfaṅ ngakeban ntum nkù nèn à? Mikal bùnte Saulo ndù; A lo ntshob me ndù: Faṅ me nène, ntag ndùlala mba m'a' zwi o.

¹⁸Tshù mba David na' ntum nkù nèn nà. A nèn mbaṅ Samuél Rama, nsoṅ tshu fa tse Saulo na' ngù yi là. Yen nà be tôg bo Samuél nèn Najot nke ntswe bwe.

¹⁹Bo soṅ Saulo ntshob ndù: Tshù David là Najot z'a mbaṅ Rama là.

²⁰Saulo tum benntùn ndù bo nèn ndo' David. Bo tèt mo' mbumte ba ghatshob ntshob Nsi bo nke ntshob ntshob Nsi, Samuél bèn mbe tu num bo. Ywèt Nsi tsho num ben tse Saulo tum nà, mba bo yub tamte num ba ghatshob ntshob Nsi, nto' nke ntshob ntshob Nsi boa bo.

²¹Bo soṅ Saulo a bèn ntum tsemo'o, mba bo tshob yub ntshob Nsi. A tum mbatte yoṅ tat, mba bo yub tshob ntshob Nsi be ndaṅndaṅ mba tsemo' là.

²²Be ndùse, Saulo lo, nèn ze tu Rama. Nzin mbe kum mo' ghem s'a be Séku là, mbètte ndù: Samuél bo David b'a yà? Bo bùnte yi ndù: Bo b'a Najot mbaṅ Rama.

²³A lo bwe ntam nze nenèn Najot, Ywèt Nsi tsho num i ze, a tù' ke nzin ntshob be ntshob Nsi tà nkum Najot mbaṅ Rama.

²⁴A sô nzwe tse, ntshob ze ntshob Nsi mbwe Samuél; a vù nsi tunntôg yen mbwôgtshù mba yen tèttswe' là fa. Ndùlala bo nke ntshob ndù: Mba Saulo be z'a be mo' ngatshob ntshob Nsi ké?