Read Medumba 1 Samuél 2 Bible Online

1 Samuél 2 - Medumba bible

1 Samuél 2

¹Ana le'te Tshùaben ntshob ndù: Ntù àm tshwèt ntsiaṅte num Tshùaben, Tshùaben lo ghù me bù' tu àm tù me lo gha' ntshu àm num ghakeban tshàm, nummbe me tshwèt ntsiaṅte num ywimte Tshùaben.

²Sàm mèn nelàn ke bwe mba Tshùaben nà! Mo' Nsi ke bwe mba yi là. Mo' gholoṅ ke bwe mba Nsi yag là.

³Kà bin bèn ntshob nu ntùm ka'te; kà ko'tewut bèn ntum ntshu bin; nummbe Tshùaben b'a ta' Nsi z'a lèn njoṅ i fa là, a num mfi' njoṅ ngùninu benntùn fa;

⁴ngoṅkét ben neta be', ben nebot ghù neta k'a tù' b'a kob sobe.

⁵Ben tse bo na' njwèt là tshwèt ntshwèt wut tshob num bàn; tse bo na' ntswe nziku' là nke mfite; mba kua' kebwe mènnzwi bwe yoṅ sammbàa. Mènnzwi z'a ghù bon yàm nà ke bèn nebwe.

⁶Tshùaben be nzwi mbèn mfà yôg, a be ngù mèn nèn tà ntùm fi, a bèn nsô i bwe nko' yi,

⁷Tshùaben be ngù ngaju, ngù mbwoṅ, a num nkôg mèn, mbèn mbù' i.

⁸A num nsô mbwoṅ ntùm mbabe, nsô njennge' ntùm bwembwôge, ngù boa ben ndùbndùb tswe nsi; a fà ta' diaṅkwa ghamte bo; nummbe ntom tsha' b'a mbu Tshùaben,

⁹a nsi ke béb nku ben ts'a num nkô yub là, là, a nsi biagte ghatshùagntù ntùm njame. Nummb'a ke b'a neta bèn ghù mènntùn yob ngu'u.

¹⁰Ghakeban Tshùaben nsi vètte; a nsi tsin mfe kamànyam tshag se fambaṅ num bo. Tshùaben nsi tsho'te kam ntôgnjù. A nsi fà ngù' ze mfen, bù'te ze neta mèn z'a yo' là.

¹¹Elkana nèn ndà i Rama, mén ghô num fa' Tshùaben, mbwe ngafà tshule'te Eli.

¹²Tse nshum Eli na' mb'a ben kebwô, ke ke ndèn tshob Tshùaben.

¹³Tshù mba tshen ghafà tshule'te là na' nke ngù mbwe ngô li: Ndùse mèn ke mfà jule'te là, ngafa' ngafà jule'te ṅwag ndùse bo tshwèt na mbàb là, ndù a tshùb du' sob, mi nsô mi be ntat là bu i,

¹⁴nsob ntùm kab mba, ntùm tshaṅ, ntùm kab ke kabtat lo; ndùse du' sob sô mba ke lo ntum yi là, mba ngafà tshule'te nsi lo' a tù' ze. Tshù mba bo ke ngù mbwe njoṅ ba Israél fa tse bo se' Silo là.

¹⁵Mèn z'a lo' jule'te nse' yi là bo ke mbe ton nzit nyàm ndù ngafa' ngafà tshule'te yà se' ntshob ndù: Fà mbàb ze bo nsi ton ngafà tshule'te là, nummb'a ke nsi kô tse mbàb ze bo na là. A kô à mbàb mbag.

¹⁶A be ze mèn z'a lo' jule'te là nse' yi bùnte ndù: Nyà là neton nzit tôge, k'o lo' mba ke lo z'o kô là, mba ngafa' ngafà tshule'te nsi tshob ndù: Nga, fà me ndonni, ntag ndùlala mba m'a' lo' neta.

¹⁷Nukebwô tse nshum Eli lo bag num miag Tshùaben neshu, nummbe bo lo ke ngwag tshu bwôntù bo se' fà Tshùaben nà k'a tshùate.

¹⁸Mba tà ndùlala ménnshum Samuél nke mfa' be se fa' mbwe Tshùaben. Mb'a na' nke' à mônke' là, ndù a taṅ kob nzwe mebwô num ngelaṅ fa' ndà Tshùaben.

¹⁹Màab lo ke ntam kummbaṅ yi mba zit ngu'njù lo, mbe se' num jule'te z'a ke mbe mba zit ngu'njù lo là ndo' nse' mfà yi. Ana bo ndu i na' mbèn nke nko' nse'e.

²⁰Eli nke naṅ mbotni num Elkana bo nzwi i ntshob ndù: A bwô ndù Tshùaben fà bon bin bin yen mènnzwi li, ndo' mbate ze mènnzwi li fà yi mb'a bètt'é là. Bo bèn njam la' bo.

²¹Tshùaben tam ntse Ana, a lét, mbwe nshumnshum tat boa ngonngon bàa. Mbe se' mba Samuél là, a nke nku' z'a mbwe Tshùaben.

²²Eli lo ywèn kua' neshu. A nke nju' mba tse nshum tshwèt ngù num ba Israél là, nke nju' mba bo ke ndo' bènnzwi tse bo ke mfa' nzendà ntàb mbumte là.

²³A tshob bo ndù: Numke bin nke ngù ndùlal'à? Me tshwèt nju' ngô fa nke ntshob nu num mfa' min mi kebwô.

²⁴Nga me bon tshàm, yen tshu'te z'a tshwèt ntôg num bin nà ke' bwô tse mba metsili. Bin tshwèt ngù ben Tshùaben nke ngù nukebwô.

²⁵Mènntùn be ngù nukebwô num mènntùn mba Nsi a' tsho't'é; là a be z'a ghù nukebwô à Tshùaben nà, mba we nsi zin kam num ze nu à? Nda' ndù bo ke ju' ntshu tà yub, nummbe Tshùaben lo jù' nezwi yube.

²⁶Mba Samuél là, a nke nku'u, nu tse nke mbwô Tshùaben mba kua' benntùn.

²⁷Num mo' lé'njù, mo' mèn Nsi se' mbaṅ Eli, ntshob yi ndù: Tshù ju ze Tshùaben tshob li: Me lo ke la'te wul àm tunndà tàan kua' ndaṅndaṅ, ndùse Israél be Egipto ntùm fa' Faraon nà ké?

²⁸Me lo tsho' i netèt njoṅ tse nzwit Israél fa ndù a ke mbe ntùm fa' sàm, nke nko' nèn tômbwôg sàm, nton labinda me bwe, nke nket kum se bo num nkel à ngelaṅ fa' là mbwe àm. Me lo fà tshule'te fa tse bon Israél nsi ke se' yi là tunndà tàan.

²⁹Numke bin nke nyiaṅte tshule'te boa ndu' nema' nsi tse me na' nte ntùm ndà àm n'à? Ndù o lo' tsho nshum tanjoṅ ntshùa àm ké? Bin tshwèt ntshab wut tsin num mbwe tshu ts'a tum ntùm tshu bwôntù tse yàm nzwit mèn Israél se' yi là!

³⁰Ndùlala Tshùaben, Nsi Israél tshob ndù: Me lo tshob mbe tunndà o bo ze tàan nsi fa' me matmat. Là, ndonni yen nu là mi. M'a' ghù nku'ni ben tse bo ghamt'àm nà; ngwag ben tse bo wag àm nà, Tshùaben bèn ntshob ndùlala.

³¹Ngelaṅ tshwèt nse'e, ze me nsi biagt'o bin tunndà tàan nà. Yen ngelaṅ nà bo ke nsi bèn tèt njwèn mèn ntùm yu tunndà.

³²Ndùse Israél nsi b'a ntùm tsiaṅte ke ndù i là, tu wul o nsi b'a ntùm sobni ndà o. Sàm njwèn mèn ke nsi be ntùm yu tunndà.

³³Me nsi faṅ mo' ta' mèn, z'a tum netèt ben tsho là mbaṅ tômbwôg sàm, ndùlala ndù miag mu tam njame, ntù o yube. Là njoṅ benntùn fa ntùm yu tunndà nsi kwù à vù fa ywèn neshu kà kwù.

³⁴Ndùse tsho nshum bàa, Ofni bo Finéas nsi kwù lé'njù ntshù' ntu bàa là, o nsi lèn nenùn nu ze me tshob là.

³⁵M'a' tsho' ta' ngale'te Nsi ze nenùne. A nsi ghù à ju ze ntù àm kô là, ghù à mba ntù àm kô là. Me nsi fà nzwit mèn yi yàme, z'a nsi ke fa' mbwe mfen me nsi yo' là.

³⁶Mba we lo z'a tù' ntùm yu tunndà là nsi vù mbwe i lon nkàb bo mfé bàn, tshob ndù: Yab àm num fa' netèt ghale'te, a tshùa ndùlala me ghù mfé bàn njù.