Read Medumba 1 Samuél 27 Bible Online

1 Samuél 27 - Medumba bible

1 Samuél 27

¹David tshob mo' lé'njù ndù: Saulo a' zwi àm mo' lé'njù; ju ntùn z'a bwô me ghù là b'a nekù ndem tu àm ngô Filistia. A nsi tshùa ndùlala Saulo faṅ nediag àm ntùm ngô Israél, tu wul àm bèn ntswe fite ke ke mbwôge.

²David lo nsi boa ben nkù ntôg tse bo be njam i là, nèn la' Akish nshum Maok mfen Gat.

³David boa ben tse tswe la' Akish Gat; mba zit mèn no na' mb'a bo ze tunndà. David b'a boa zwi tse bàa Akinoam ze Yizréel bo Abigail mfôg Nabal ze Karmél.

⁴Saulo ke bèn nediag David ndùs'a ju' mb'a kù nèn Gat là.

⁵David tshob Akish ndù: A be ze me tum mènfen num miag mu là, bo fà dù' me ntùm mo' ta' tusô me tswe bwe. Nummb'a ke' bwô bin ngafa' o tswe ntùm tusô fen.

⁶Be kua' sen lé'njù là Akish fà Tsiklag yi. A ndùlala ze Tsiklag b'a dù' fenfen Yuda tà nse' nkum sènni là.

⁷David lo tswe ntùm ngô Filistia tamngu' ṅwù kuà.

⁸David boa ben tse lo ke nko' nkam ben Gueshur, ben Guirzi boa ben Amalék ntsho; nummbe tshen ngô là lo be yen dù' là tà fe mbwe, nze bag Shur tà nèn nkum ngô Egipto.

⁹David lo ke ndag yen bag ngô là, nke nzwite benntùn, bandum boa bènnzwi; nke ndo' njùmbwe, nyàmna', nkekwène, kamél boa nzwe. Yen nà lo ke mbe tôg a bèn njam mbaṅ Akish.

¹⁰Akish bètt'é ndù: O kam à zit bag sènni à? David bùnte ndù: Nze bag Yuda z'a shù ntèn nà, nze bag Yéraméel z'a shù ntèn nà.

¹¹David lo ke be faṅ mandum ke mènnzwi lo nelo' yub nèn yi Gat. Nummb'a lo ke ntshob ntù i ndù: Be bo tshob kebwô num be ntshob ndù: Tshù mba David ghù li. David lo ke ngù ndùlala njoṅ ngelaṅ fa z'a tswe ngô Filistia là.

¹²Akish so wut num David nke ntshob ndù: Mb'a be mbag num ze nzwit mèn Israél ndù là, a nsi tù' ngafa' àm njoṅ ndù fa.