Read Medumba 1 Samuél 29 Bible Online

1 Samuél 29 - Medumba bible

1 Samuél 29

¹Ba Filistia tse'te njoṅ tshob soyé fa Afék, Israél te ze mbàn mbaṅ ntshu ntse Yizréel.

²Fenfen Filistia tsinte mbwe ben tse ntu nkù boa tse ntu ntsha' mbùm, David boa tse ben nke nzin njam boa Akish.

³Fenfen Filistia tshob ndù: Tshen ba Héber li ghù à ke nsen ni à? Akish bùnte fenfen Filistia ndù: A ke b'a David ngafa' Saulo mfen Israél ké? A tswe yàm mba bag yi be là. Me ke' fon sàm lo' z'a be me tshùa bwe ntswit nkùn num i là. A be ndùlal'a fe lé'njù s'a kum nsen ni là tà nse' nkum sènni.

⁴Là fenfen Filistia ya ntù Akish, ntshob yi ndù: Ta' mandum nà a bèn njam dù' z'o na' nte i là; k'a swe' nèn bag à bo tshwèt ntsho, ndùlala ndù k'a tù' ngakeban yag ndùse ntsho a' te nsi là. Be yen mèn nà ke bèn njam mbaṅ tàfa' i kà ke be ndù a lo' à tu tse be ben njun tu i yi.

⁵A b'a David ze bo ke njob kwi tu i ntshob ndù: Saulo lo zwi ben ntsha' mbùm, David zwi ben ntsha' gham nà.

⁶Akish tsiaṅ David ntshob yi ndù: Tshùaben b'a ntùn! O b'a mèn ndaṅndaṅ, mbe ndù me num nkô o, neyen mba bag wù tshwèt nèn nke mbèn ntùm mbàn nà; nummbe me ke' fon sàm kebwô num o fe lé'njù s'o kum mbaṅ àm nà tà nse' nkum sènni; nda' ndù nu tsho ke' bwô tshàm fenfen.

⁷Ndùlala bèn njam ntùm fite ndù k'o ghù nu z'a ke' bwô là num miag fenfen Filistia.

⁸David tshob Akish ndù: Kua' ke ze me ghù, ke z'o fon num ngafa' o fe mba me be mbaṅ o tà nse' nkum sènni, kà me mbe ke nèn lé' ghakeban le' tshùaben mfen àm ntsho à?

⁹Akish bùnte David ndù: Me lène, nummb'o be num miag màm à mba ta' Angél Nsi là; nda' ndù fenfen Filistia tshwèt ntshob ndù: Be bag bo ke ko' nèn tshwèt ntsho.

¹⁰Ndùlala, lo nsi kua' nkebnjù bin à ghafa' tàfa' o Saulo tse bin à bo se' là, bin lo ntum kua' nkebnjù ndùse njù nsi foṅ nà nène.

¹¹David boa ben tse lo nsi kua' mà nkebnjù, num netam nze mfôgnjù mbèn ntùm ngô ba Filistia. Ba Filistia ko' nèn Yizréel.