Read Medumba 1 Samuél 3 Bible Online

1 Samuél 3 - Medumba bible

1 Samuél 3

¹Samuél lo ke mfa' Tshùaben mbwe Eli. Tshùaben lo ke bèn netshob ntshob mi benntùn yen ngelaṅ nà. Ba njem lo ke bèn njàm yen ngelaṅ nà.

²A be num mo' tèttswe' Eli nô ze dù' nke nzi. A lo be be ndù miag mi a to' nke nsènte, k'a nke njen à ntatntat.

³Lambo Nsi lo ke nke' nkù, Samuél nke nzi ndà Tshùaben, dù' ze Koṅ Nsi be là.

⁴Tshùaben tsiaṅ Samuél, a bùnte ndù: Tshù me li.

⁵A kù nde nèn mbaṅ Eli ntshob ndù: Tshù me li mb'o tsiaṅ àm nà. Eli bùnte ndù: Me ke' tsiaṅ o tshàm, nèn nô nsi. Samuél nèn mbèn nô nsi.

⁶Tshùaben bèn ntsiaṅ Samuél. A lo nèn mbaṅ Eli ntshob ndù: Tshù me li mb'o tsiaṅ àm nà. Eli tshob Samuél ndù: Nshum àm, nèn nô nsi, me ke' tsiaṅ o tshàm.

⁷Samuél lo ke yoṅ ndèn Tshùaben, nummbe Tshùaben lo ke yoṅ ntshob nu yi.

⁸Num mbatte yoṅ tat Tshùaben tsiaṅ Samuél, a lo nèn mbaṅ Eli ntshob ndù: Tshù me li mb'o tsiaṅ àm nà. Ndùlala Eli lèn ndù a b'a Tshùaben bèn nke ntsiaṅ mén.

⁹A tshob Samuél ndù: Nèn nô nsi, a be ze mèn bèn ntsiaṅ o là, o bùnte ndù: Tshùaben, tshobe, ngafa' o tshwèt nju'u. Samuél bèn njam nô nsi.

¹⁰Ndùlala Tshùaben se' ntsin mbaṅ Samuél ntsiaṅ i mba tsemo' yoṅ tse là ndù: Samuél! Samuél! Samuél bùnte ndù: Tshobe, ngafa' o tshwèt nju'u.

¹¹Tshùaben tshob Samuél ndù: M'a' ghù mo' ju ntùm ngô Israél. Mba we lo z'a nsi ju' là ntoṅ mi nsi vù mbu'u.

¹²Num sen lé'njù là m'a' ghù njoṅ tshu fa me tshob num tunndà Eli là bumte, neto'te kà nèn miagte.

¹³Me lo tshob yi mbe me naṅ ntsha tu tunndà i, num nukebwô tse tu wul i lèn mbe tse nshum ghù là. Nummb'a lo ke to' tshèt yub mba lé'njù ntshù'.

¹⁴Ndùlala me lo tshob nsaṅlaṅ bwe tunndà Eli mbe be sàm tamte fa ke be num nukebwô i, ke njam ta' jule'te, ke njam nema' ndu' nsi lo.

¹⁵Samuél nô be nsi tà nkum nkebnjù; njù làn a lo nsi ntsho' nzendà ndà Tshùaben. Samuél bwôg nesoṅ Eli yen njem nà.

¹⁶Là Eli tsiaṅ i ndù: Mén àm Samuél! Samuél bùnte ndù: Tshù me li.

¹⁷Eli dù: Tshùaben tshob wù à mbe ke? Kà lem àm sàm nu. A bwô ndù Nsi yab nge' num o kua' kebwô, a be z'o lem àm nu num mba ke lo z'a tshob wù là.

¹⁸Ndùlala Samuél soṅ i mba ke lo, ke lem sàm i mba ntshù'. Eli tshob ndù: A b'a Tshùaben, a ghù mba ke lo z'a bwô i là.

¹⁹Samuél nke nku'u, Tshùaben nke mbe bo yi. A ke be wag sàm ntshob mi mba ntshù'.

²⁰Njoṅ ba Israél fa, nelo mo' taṅ ngô nèn nkum num mo' taṅ ngô lèn ndù Samuél b'a ngatshob ntshob Tshùaben.

²¹Tshùaben nke nde' nda'te wul i Silo; nummbe Tshùaben lo ke nda'te wul i Samuél bwe, ntshob ntshob mi yi.