Read Medumba 1 Samuél 4 Bible Online

1 Samuél 4 - Medumba bible

1 Samuél 4

¹Samuél lo ghù mba' num njoṅ ba Israél fa. Ba Israél tum nèn nema' ba Filistia ntsho. Bo te yub mbàn mbaṅ Eben-Ezer. Ba Filistia te yub Afék.

²Ba Filistia kam ba Israél ntsho be ndende, mfa'te yube. Ba Filistia tshùa ba Israél ntsho, nzwite benntùn tshwèt ntsho nguan ntu ntsha' kuà.

³Ngô bèn njam ntùm mbàn, tse ghakwé mbwe Israél tshob ndù: Numke Tshùaben mfaṅ ba Filistia ntshùa be ntsho sènni à? Bag bin nèn nket Koṅ Kàn Tshùaben Silo; a bwô ndù a be netèt be, kà ntshu' be mbu tse be ghakeban.

⁴Ngô tum benntùn Silo bo nèn nket Koṅ Kàn Tshùaben tàndà ntsho z'a tswe netèt ba kérubim nà. Tse nshum Eli bàa Ofni bo Finéas lo be bwe, boa Koṅ kàn Tshùaben Nsi.

⁵Ndùse Koṅ Kàn Tshùaben tsho mbàn nà, njoṅ ba Israél fa tshag nze yub tù ntùm tsiaṅte, kà yen tsiaṅte ndùb là nyi'te tsha'a.

⁶Ba Filistia ju' yen tshu'te là, ntshob ndù: Yen tshu'te li ntùm mbàn ba Héber bagt'a ndùke? Bo soṅ yub ndù Koṅ Kàn Tshùaben bèn nzin nkum ntùm mbàn.

⁷Bwôg ghom yub bo tshob ndù: Nsi tsho ntùm mbàn yub. Be b'a ghayennge', nummbe mo' nu z'a fute yen ni là ke' yoṅ nto' be.

⁸Be b'a ghayennge'! We z'a nsi tshu' be mum mbu tshen neta nsi l'à? A tshen nsi là na' mbèn ndo' nzenze nge' ntsho ba Egipto yi num kônkwa.

⁹Bin fèn ntù me ba Filistia, bin be benntùn, mbwôg ndù kà be tù' kuan ba Héber mba bo be tse be kuan nà, bin be benntùn, ma' ntsho mebwô.

¹⁰Ba Filistia ma' ba Israél ntsho ntshùa yube. Mba zit ze Israél lo kù mbèn ntùm ze ntàb. Yen nevù ntsho li zi neshu, bo zwite soyé netèt ba Israél ntsha' ṅam ntat.

¹¹Ba Filistia lo' Koṅ Kàn Nsi, tse nshum Eli bàa kwù. A na' mb'a Ofni bo Finéas.

¹²Mo' mèn ntùm nzwit Benjamin tum ntùm ndoṅ ntsho, nkù nèn Silo be kua' sen lé'njù là. Nzwe tse fagte mb'a mfémfé, mbab ṅab tu i fafa.

¹³Ngelaṅ z'a ke ṅwag là, ndù Eli tswe num diaṅ nkaṅ manze, nke nzwi'te tshô, ntù i nke ntame, ke tsho ndà num nu Koṅ Kàn Nsi. Mènntùn nà yoṅ ntsho tusô mfà tshô, njoṅ benntùn fa tusô tshèn ngoṅ.

¹⁴Eli ju' ngoṅ ntshob ndù: Yen tshu'te li bagt'a ndùke? Be ndùse mèn nà lo' tshô nse' nsoṅ Eli yi.

¹⁵Eli lo ywène, ngù ngu'njù ntshob fom ṅam bwe'e. Miag mi ke be kaṅte, a ke ke njene.

¹⁶Mènntùn nà tshob Eli ndù: Me tum ndù à tshwèt ntsho. Me kù à kua' tshwèt ntsho sènni kà nse'e. Eli tshob ndù: Nshum àm, a tôg à ndùke?

¹⁷Mèn z'a lo' tshô nse' yi là bùnte ndù: Israél kù mbwe ba Filistia, ngô vù ntsho kua' kebwô neshu; mba tsho nshum bàa, Ofni bo Finéas kwù, Koṅ Kàn Nsi b'a ntùm mbu ba Filistia.

¹⁸Ndùs'a yoṅ ntsi lén Koṅ Kàn Nsi là, Eli tum num diaṅ se ngwù nsi njamnjam mbaṅ nzendà; a lab kekol i nsi nkwù, nummb'a lo ywène, ndèt neshu. A lo be ngatsho'te netèt ba Israél ngu'njù ṅam nkuà.

¹⁹Nzwimén i, nzwi Finéas lo be jùm kà ntù' à nebwe. Ndùs'a ju' mba bo kwé Koṅ Kàn Nsi, nju' mba tà ndu i kwù, nju' mba ndu i kwù là, tum ntam nsi, ngelaṅ nedùbte ku' yi, a bwe mén mandum.

²⁰Mb'a ke ntù' nekwù là, bènnzwi tse bo be mbaṅ i là tshob yi ndù: Kà bwôg, o bwe à ta' ménnshum! Là, a ke bùnte, ntswe ke tshob nu.

²¹A tswi lén mén ndù Ikabod, ntshob ndù: Nkuni Nsi mi ntùm ngô Israél! Yen nà na' mb'a nummbe bo kwé Koṅ Kàn Nsi bo mba tà ndu i mba ndu i kwù là.

²²A tshob ndù: Nkuni Nsi mi ntùm ngô Israél, nummbe bo kwé Koṅ Kàn Nsi.