Read Medumba 1 Samuél 9 Bible Online

1 Samuél 9 - Medumba bible

1 Samuél 9

¹Mo' mandum lo be ntùm nzwit Benjamin lén se Kis. A na' mb'a nshum Abiél, nshum Tseror, nshum Bekorat, nshum Afiak, nshum mèn Benjamin. A na' mb'a neta mèn, mbe neta nduku.

²A lo ghù ta' nshum lén se Saulo, a ke' nguanmèn, mbwô, kà sàm mén Israél ke tum z'a bwô mba Saulo là. A sag ntshùa yub fa tu i.

³Nkekwèn Kis tà Saulo bite. Ndùlala Kis tshob nshum i Saulo ndù: Lo' mo' ta' ngafa' ndo nèn diag nkekwène.

⁴A tshùa num mbat Efraim, ndut ntùm ngô Shaalim, ke yen yub bwe. Bo zinte ntùm ngô Benjamin ke fon yube.

⁵Bo zin nkum ntùm ngô Tsuf, Saulo tshob ngafa' i z'a nèn tshag i là ndù: Be bèn njam mbwôg ndù kà tàa lag nkekwèn ntù' ke nywin à num be.

⁶Ngafa' tshob yi ndù: Mo' mèn Nsi num ntùm tusô li, a b'a nkum mèn. A num ntshob nu a bumte. Ndùlala be nèn njen i, be mo' ndù a la'te be nze ntùn ze be nsi tshùa bwe là.

⁷Saulo tshob ngafa' i ndù: Be yôg nke nèn la' mèn Nsi mba be nsi yab à ke yi à? Tshù, be ke' bèn ngù sàm jujù mbàm, ke ghù lèn nda' netsho mfà mèn Nsi. Ke ze be ghù à?

⁸Ngafa' Saulo bùnte, ntshob yi ndù: Me ghù metsit mfé silba. M'a' tsho mfà mèn Nsi, a la'te ze be nze be.

⁹A lo ke mbe Israél mo' ngelaṅ, bo nke mbe bètte Nsi nu nke ntshob ndù: Bin se' be nèn njen ngayente. Mèn bo num ntsiaṅ i sènni ngatshob ntshob Nsi là, bo na' nke ntsiaṅ i à ngayente.

¹⁰Saulo tshob ngafa' i ndù: O tshob nu ntùn; se' be nène! Bo nèn ntùm tusô dù' ze mèn Nsi be là.

¹¹Mba bo ke nko' nèn tusô là, bo bumte boa tsemo' bonngon ndù bo tum nke nèn tu' ntse. Saulo bo ngafa' i bètte yub ndù: Ngayente num nsen ni ké?

¹²Bo bùnte ntshob ndù: Ṅ, a b'a mbwe o; là nèn ndende nummb'a se' tusô sènni. A nsi fà jule'te mbwe' sènni num tu ngô.

¹³Ndùse bin tsho tusô là, bin nèn njen i k'a nko' nèn mbwe' jù ju; nummb'a be ngô ke yoṅ njù ju ke be ndù a kume. A bwô a naṅ mbotni num jule'te; yen nà nsi be tôg ben bo be nsi là yôg njù jujù. Bin ko' ndonni bin a' yen i.

¹⁴Bo ko' nèn tusô. Bo kum tusô mbumte boa Samuél z'a ke ntum ko' nèn mfe mbwe' là.

¹⁵Nda' ndù a lo be tù' ta' lé'njù Saulo se'e, Tshùaben tshob Samuél ndù:

¹⁶A tshag mbe ndamnjù num yen nyam ni, me tum mo' mènntùn wù, a tum à ntùm ngô Benjamin. O nsi yo' i, ghù mfen yàm nzwit mèn Israél yi. A nsi tshu' yàm nzwit bu ba Filistia; nummbe me te lag num yàm nzwit mèn, nkua' mi ko' ntam toṅ àm.

¹⁷Ndùse Samuél yen Saulo là, Tshùaben tshob yi ndù: Tshù mènntùn ze me na' ntshob wù là. A b'a yi nsi bèn tô yàm nzwit mèn.

¹⁸Saulo ghebte num Samuél ntshu nsém ntshob yi ndù: Me le't'o, la'te tsho ba' ngayente là me.

¹⁹Samuél bùnte Saulo ndù: A b'a me bèn mbe ngayente. Tam mbwe àm be ko' nèn mfe mbwe'. Bag wù nsi jù ju bwe sènni. Me nsi faṅ o nèn à ndamnjù. M'a' soṅ o nu ts'o ghù ntù o là.

²⁰Kà lab wul o num nkekwèn ts'a bi wù a ndonni lé'njù tat là. Nummbe bo yà fon yube. Bo lem mbwô mbwô tshu ts'a Israél l'a we? A ke b'a tsho mba tse tunndà tàan ké?

²¹Saulo bùnte ndù: Me ke b'a mèn Benjamin ké, yag nzwit ke b'a metsili netèt nzwit fa Israél ké? Tunndà ze me tum bwe là b'a metsili netèt tse tunndà nzwit Benjamin. Numk'o nke ntshob lèn tshen nu li me ndùlal'à?

²²Samuél lo' Saulo mba ngafa' i, ngù bo tsho ndà, a te yub dù' ntùn, mbwe ben tse bo be ndà là. Benntùn lo be bwe nguan ṅam ntat.

²³Samuél tshob ngana jujù ndù: Fà ju ze me lo mfà wù ntshob ndù o lem nà.

²⁴Ngana jujù fà bu nyàm mba ju z'a mbaṅ bwe là. A te Saulo, ntshob ndù: Tshù ju ze bo lo ndem nà. Te mbwe o njù. Me lo ndem a wù ndùse me lo ntsiaṅ ngô là. Ndùlala Saulo jù jujù bo Samuél num sen lé'njù là.

²⁵Bo swe' mfe mbwe' nèn tusô, Samuél tshobte bo Saulo num tuba'.

²⁶Bo lo nsi kua' nkebnjù; a yoṅ mbe be mfôgnjù Samuél tsiaṅ Saulo num tuba' bo yi tshobte, a tshob yi ndù: Se' m'a' faṅ o nène. Saulo lo ntum bo Samuél ntu bàa.

²⁷Ndùse bo kum tôg tusô là, Samuél tshob Saulo ndù: Tshob ngafa' o ndù a tshùa mbwe be. Ngafa' nèn mbwe bo. Samuél tshob Saulo ndù: Tsin ndonni me tshob ntshob mi Nsi tshob ndù me tshob wù là.