Read Ngowili Yekpei Numu Kpɛlɛɛ Va MATIU 10 Bible Online

MATIU 10 - Ngowili Yekpei Numu Kpɛlɛɛ Va bible

MATIU 10

¹Yesu i ngi gaalopo puu maahu feleisia lolilɔ i kpaya ve ti wɛ ngafa nyamuisia gbuava nungaa hu kɛɛ heegbɛ laasi gbi bawova.

²Jisia lɔ nuu puu mahu feleisia le Yesu i ti looni: haalayei, Saimɔn na ta toli a Pita kɛɛ ngi ndewei Andru kɛɛ Jemisi, Sɛbidi loi, kɛɛ ngi ndewei Jɔn;

³Filipi kɛɛ Batɔlɔmiu kɛɛ Tɔmɔsi kɛɛ Matiu kɔnjɔ wɔyɔmɔi kɛɛ Jemisi, Afiɔs loi, kɛɛ Tadiu, kɛɛ

⁴Saimɔn na ti yɛ toli a ndɔlɔ hinda madi houmɔi, kɛɛ Judasi, na i Yesu veni kɛlɛmɛi.

⁵Yesu i numu puu maahu felei jisia lɔ loni, i vɛli ti ma yɛ, “Waa li nungei nasia gama tii yɛni a Juungaa tawao waa li Samelia yeetaa gbi hu.

⁶A li Isrɛlblei nasia gama ti wiengɔ kia mbalangɛi nasia ta lohu.

⁷A li wu Ngewɔ yiɛi le wɛɛ, ‘Ngelegoohu Mahayɛi lɔ na kpla.’

⁸A heegbɛbleisia bawo, wu pomɛisia wu hee hu, wu nasia bawo nduwuma-heegbɛisia ti ti ma, wu ngafa nyamuisia gbua nungaa hu. Wu kpayei jisia majɔngalɔ gbama, faale a ngengei jisia wie la gbama.

⁹Waa li a kanigbɔlu ɔɔ kanigole ɔɔ navoo gbi; wu pɔkiti hu;

¹⁰waa li a fɛliwua bɛki ɔɔ ndoma fele ɔɔ tikpɔ. Gbamaile mahoungɔe ngengemɔi i hani na gbi majɔɔ a gbewe fa.

¹¹“Wu wuaangaa taa gbi hu ɔɔ fuula, a numu gɔli na a loko hei wu bu, wu lo ngi gama haaŋ wu gbua yeetei na hu.

¹²Wu wuaangaa pɛlɛ gbi bu, a va yeenungaa ma wɛɛ, ‘Ndiilɛli i yɛ wu ma.’

¹³Nasia ti yeepɛlei na bu ti loko heingaa wu bu, wu liilɛli i lo ti ma; kɛɛ tii loko heilɔ wu bu, kɛ wu liilɛlii i yaama wu ma.

¹⁴Pɛlɛ ɔɔ taa tii loko heilɔ wu bu ɔɔ tii woloilɔ wu ma, wu yaa gbuama na a fufulei na gbukpulɛ a yɛ wu gɔwɔma.

¹⁵ “Ngi hugɛ a wue a tɔnya kɛ kpɛmbo-volei ma kuna, Ngewɔ a manulɔ Sɔdɔmblɛisia ma kɛɛ Gomɔrablɛisia i lewe tɛɛ na ma.

¹⁶“A wolo! Nyaa wu loma tawao wu wiengɔe kia mbalangɛi nasia ta wili fula haningaa lia. Faale wu nɛmahu i lewe kia kaalingaa, wu yaa i haa kia mbomu kulongaa.

¹⁷A wu mahugbe a nuuvuisia; ajifa ta wu houlɔ ti wu ve kootiisia wɛ, tawao ta wu lewelɔ ti hɛɛ wɛleisia bu.

¹⁸Ta wu gɛndɛlɔ ti li a wue tokulɔngaa kɛɛ mahangaa gulɔ nya va, aako wu Ngowili Yekpei le ti ma kɛɛ nungaa wekei nasia Juungaa yaa a tie.

¹⁹Ti lingaa a wue Kotii gulɔ, wu lii aa hɛlɛ waa yee yɛpɛ ɔɔ gbɔɔ wa nde; watii i hitingaa, na mahoungɔ wu nde a velɔ wu wɛ ngaamɛi na;

²⁰ajifa wua ii le waa yɛ yɛpɛma, wu Kɛkɛ Ngewɔ ngi Yafei mia a yɛpɛ wu hu.

²¹“Hingeisia lɛɛnga ta ti gbɔugbɔu ndewehingeisia velɔ ti waava, tawao kɛkɛisia lɛɛngaa ta nyɔkɔ wielɔ a ti leengeisia; ndeengɛisia lɛɛngaa ta wotelɔ ti lebleisia maahu ti pie ti ti waa.

²²Numui gbi ta lololɔ a wue nya va. Kɛɛ numui na a liilo i to kɛlɛmɛi a bawolɔ.

²³Ti juuya hitɛngaa wu woma taa yila hu, a wila wu li peka hu. Gbɛɛ ngi nde wu ma a tɔnya, wɛɛ wu yengei gbɔyɔ Isrɛl yeetei kpɛlɛɛ hu pɛiŋ Nuuvu Hindoloi i ya wa.

²⁴“Kaalopo gbi ii leweni ngi Kaamɔ ma, tawao nduwɔ gbi ii leweni ngi luwɔkɛi ma.

²⁵Faale mahoungɔ kaalopoi lii i lɛli ji a hiti ngi Kaamɔ hu, nduwɛi bɛɛ ji a hiti ngi luwɔkɛi hu. Ina nungaa ti ndei yeekulɔmɔi lolinga a Biɛlsibu, ta yeendei hubleisia lolilɔ a mbiyɛ nyamungaa tewengɔ na ma.

²⁶“Faale waa luwa nungei nasia ma ti lolongɔ a wue; gbamaile na lekee gbi mawɛɛngɔ maa a gɛlɔ, tawao na gbi ndɔwungɔ a gbualɔ foofo ya.

²⁷Na nga nde wu ma kpindi hu, a nde foofo hu leeŋ, tawao na wa mɛni ndondoyia hu, a nde leeŋ kpawama.

²⁸Waa luwa nungei nasia ma ta wu gbuhɛi waa kɛɛ tɛɛ gu taa wu yafei waa; kɛ a luwa Ngewɔ ta ngi ma ajifa ta lɔ kpaya i ngi wɛ numu gbuhɛi kɛɛ ngi yafei nyanivaa jahamɛi hu.

²⁹Numu a sokele fele yeyalɔ a sɛnti yila, na hu gbi sokele yila bɛɛ ɛɛ haa ina wu Kɛkɛ ii lumani ma.

³⁰Wu wundie vulii gbawangɔe Ngewɔ yeya.

³¹Faale waa luwa; baa lɔ wu ma kaka i lewe sokele gboto ma.

³²“Numui na lekee gbi a nde kpawama yɛ i nya va lɔ, hii nga pie a ngie nya Kɛkɛ na gama i ngelegoohu.

³³Kɛɛ numu gbi lekee a gbele nya ma kpawama, nya bɛɛ nga gbelelɔ ngi ma nya Kɛkɛ na gama i ngelegoohu.

³⁴“Waa gili la kɛ ngi wanga ndiilɛli lɔ veva dunyei ji hu; ngii wani ndiilɛli veva kɛ kɔbowa.

³⁵ Ajifa, ngi waalɔ hingaleengeisia wilivaa ti kɛkɛ-ni ma, ngi nyaha-lengeisia wili ti njeni ma, ngi ndo-nyahangeisia wili ti yemɔisia ma;

³⁶numu juwu yeekpekpeisia ta yɛ a ngi heiblɛisia lɔ.

³⁷“Numui na a lo a ngi kɛkɛ ɔɔ ngi nje i lewe nya ma ɛɛ gu i yɛ a nya woomamɔ; tawao numui na a lo a ngi hindoloi ɔɔ ngi nyahaloi i lewe nya ma ɛɛ gu i yɛ a nya Woomamɔ.

³⁸Numui na ɛɛ ngi krɔsii la gbakima aa to nya wooma ɛɛ gu i yɛ a nya Woomamɔ.

³⁹Numu gbi lekee a lapi dunya lɛɛvui ngi ndɛi mabawova, a baalɔ la, kɛɛ numui na a baa a dunyama lɛɛvui ngi ndɛi nya wooma, a ndɛvui yeetɔnyangɔi majɔlɔ.

⁴⁰“Numui na a loko hei wu bu, i loko heini nya lɔ bu; tawao numui na a loko hei nya bu, i loko heini nya loomɔi lɔ bu.

⁴¹Numui na a loko hei Ngewɔ lutui bu jifa Ngewɔ lutui a ngie, a Ngewɔ lutui yeepawei lɔ majɔɔ, tawao numui na a loko hei pɔɔnamɔ bu ajifa pɔɔnamɔ a ngie, a pɔɔnamɔ pawa lɔ majɔɔ.

⁴²A la la kɛ numu gbi lekee a nja gɔlɛi vulii ve nya gaalopoi jisia yeekulohii bɛɛ wɛ kpɔleva jifa nya woomamɔ a ngie, ɛɛ baa kulo bɛɛ a ngi mawaa.”