Read Ngowili Yekpei Numu Kpɛlɛɛ Va MATIU 12 Bible Online

MATIU 12 - Ngowili Yekpei Numu Kpɛlɛɛ Va bible

MATIU 12

¹ Hu ii guhani na wooma Yesu yɛlɔ jiama a pelei nyɔ-gbalɛisia hu Ndɛvu Volei ma. Ndɔlei yɛlɔ ngi gaalopoisia ma kɛ ti tɔtonga a nyɔi yalilaa ta mɛ.

²Kia Farisiisia ti ji hulɔni, ti ndeilɔ Yesu ma tɛɛ, “Tɔ lɛɛ, bi gaalopoisia lɔ Ndɛvu Volei yeesawei nyanima!”

³ Yesu kpɛmboilɔ yɛ, “Wuii yaa kaani lɛ gbɔɔ Devidi pieni ji ndɔlei i ngi lɔni kɛɛ nasia ti yɛ ngi ma,

⁴ ji i wuaani Ngewɔ Veli bafɛi bu tia ngi mableisia ti bledii na mɛ fengɔ Ngewɔ wɛ, kia bɛɛ sawa nyanila le yɛla ti va yee bledii na mɛva kɛ lekee Saagbuablɛisia?

⁵ ɔɔ wuii yaa kaani Mojisi jawei hu ji Saagbuablɛi nasia ta yɛ Ngewɔ wɛlei bu ta Ndɛvu Volei jawei nyani kɛɛ njia gbii ti ma?

⁶Ngi hugɛ a wue kɛ hani lɔ mbei tewengɔ Ngewɔ wɛlei ma.

⁷ Ngewɔ Gɔlɛi ndeilɔ yɛ, ‘Nya longɔ a kpekpeya wiela lɔ nungaa wekeisia gama, ngii gbeweni tohanii nasia va wa kpua a saa.’ Ina wu yɛ ji yeembui gɔɔlɔ, wuii yɛ nasia lɛɛ njia gbii ti ma.

⁸Ajifa nya Nuuvu Hindoloi a nge nya lɔ Ndemɔ a nge Ndɛvu Volei maahu.”

⁹Yesu i gbuailɔ mia i wuaa ti hɛɛ wɛlei bu.

¹⁰Taamɔ yila yɛlɔ na ngi lokoi haangɔ. Nungaa lɛɛnga ti yɛlɔ na ti longɔ ti njia wɛlɛ Yesu ma, faale ti ngi mɔlilɔ tɛɛ, “Sawa nyanila le numu bawova Ndɛvu Volei ma?”

¹¹Yesu i kpɛmboilɔ yɛ, “Ina mbala yila lɔ wu yilaye yeya, yeembalɛi i gula ndowa hubɔngɔ hu Ndɛvu Volei ma, ɛɛ li aa kpua hu?

¹²Nuuvu jɔngɔ i leweni poloŋ mbala ma. Faale mu jawei lumangɔe mu wɛ kpekpe wieva a nuuvu Ndɛvu Volei ma!”

¹³Kɛ i ndenga taamɔ loko haangɔi ma yɛ, “Bi lokoi lambo.” Kɛ i taambonga mbawongɔ kia yeepekei na.

¹⁴Kɛ Farisiisia ti gbuanga ti wuhitɛ ngi waava.

¹⁵Kia Yesu i kɔɔni kɛ tiaa ngi mavɛɛma, i gbuailɔ yeehindei na tawao faha waa ti toilɔ ngi ma kɛ i nasia kpɛlɛɛ bawonga ti heegbɛngɔ yɛla,

¹⁶i ti laahii yɛ taa ngi hinda hugɛ a numu gbi.

¹⁷I ji wieilɔ aako na la i hou Ngewɔ puni ngi lutui Aisaya laa yɛ:

¹⁸ “Nya bɔilopoi gbelɛ ngi mbumbunga, nya liimamɔi na ngi hinda i nya liilɛlingɔ waa. Nga nya yafei yeilɔ ngi ma, tawao a nya liima hindei hugɛlɔ a nasia Juublaa yaa tie.

¹⁹Ɛɛ ndablaa wie tawao ɛɛ yele gula, tawao ɛɛ njia gboto-gboto le ngeleya pele waawaisia ma.

²⁰Ɛɛ konipɔwa lɛkpɛngɔ yali aa nyimi nasia ma ti mayeingɔ, A nɔɔlɔ ngi yengei ma haaŋ numui gbi ti golo Ngewɔ jaweisia bu;

²¹tawao kɛnyɛi gbi ta lii valalɔ ngi ma ti bawova.”

²²Kɛ nungaa lɛɛnga ti wanga ngi gama a taamɔ yila ngi wumungɔ, tawao ɛɛ gu aa yɛpɛ, ajifa ngafa nyamu i ngi hu. Yesu i ngi bawoilɔ na hii i gu a hinda lɔla, a yɛpɛ.

²³Fahii gbi ti wuhu i wuilɔ, kɛ tia ndema tɛɛ, “Ji lɔ Devidi Hindoloi le baa?”

²⁴Kia Farisiisia ti ji humɛnini, ti ndeilɔ tɛɛ, “Ngafa nyamuisia ti mahɛi Biɛlsibu mia a kpayei na ve ngi wɛ ngafa nyamuisia gbuava nungaa hu.”

²⁵Yesu i kilii na gɔɛilɔ ti yɛ pie, faale i ndeilɔ ti ma yɛ, “Ndɔlɔ gbi yeehubleisia ti blangaa, ta gɔ a ti nyɔunyɔ a nyanilɔ, tawao mbonda gbi ɔɔ taa gbi ti blangaadia, ta gɔ luahu, yeembondei ɔɔ tei na ɛɛ gbekpe.

²⁶Ina Seitana mia i Seitana gbuama nungaa hu, na a kɛlɔ kɛ ngi mableisia ti blangɔe, ta gɔ luahu; ngi mahayɛi a yee na gbekpe?

²⁷Wuaa ndema wɛɛ Biɛlsibu mia a kpayei na ve nya wɛ nga ngafa nyamuisia gbua la nungaa hu. Ye lɔ hɔɔ i kpayei na veni wu gaalopoisia wɛ ta ti gbua la? Faale wu gaalopoisia vulii lɔ ta wu lɛɛ.

²⁸Kɛɛ Ngewɔ Yafei lɔ a kpayei na ve nya wɛ nga ngafa nyamuisia gbua nungaa hu, faale Ngewɔ Mahayɛi i wilanga a walaa wu lia.

²⁹“Numu gbi ɛɛ gu aa wili kpayamɔi wɛlei bu aa ngi haakeisia gapu kɛlee a kpayamɔi yili pɛiŋ; na lɔ a wie i yaa gu i pɛlei bu gapu.

³⁰“Numui na ii nya va i gɔmalɔ a nge; numui na ɛɛ gbɔ nya ma nungaa lɛva ma, a ti vayalɔ.

³¹Sabui ji va lɔ nga nde wu ma ngɛɛ Ngewɔ a manulɔ nungaa ma jumbu gbi va ta pie kɛɛ njia nyamu gbi ta nde, kɛɛ numu gbi lekee a njia nyamu le Ngewɔ Yafei ma, Ngewɔ ɛɛ manu ngi ma gbi.

³²Numu gbi lekee a njia nyamu le Nuuvu Hindoloi ma a manuma jɔlɔ; kɛɛ numu gbi lekee a njia nyamu le Ngewɔ Yafei ma ɛɛ manuma jɔɔ kunafɔ.

³³“Ngulu yekpei a wua a nguluwa yekpe lɔ tawao ngulu nyamui a wua a nguluwa nyamu lɔ. Numu a ngulii gɔɔ ngi wɛi ma lɔ.

³⁴Wu kaalingɛi jisia! Ji wu nyamungɔ, wa yee gu a njɛpɛ yekpe lela? Ajifa na a yɛ numu lii lavengɔ tamia a gbua ngi laa.

³⁵Numu yekpei a hani yekpengaa lɔ gbua hani yekpei nasia lia ta yɛ ngi hu, kɛɛ numu nyamui a hani nyamungaa lɔ gbua hani nyamui nasia lia ta yɛ ngi hu.

³⁶“A lala kɛ kpɛmbo volei ma, baaba yɛpɛ gbi nuuvungaa ti ndenga wɔɔ wa kona wielɔ fa.

³⁷Wu layieisia va lɔ Ngewɔ a wu lemu tawao gbɔma wu laayiɛisia va lɔ Ngewɔ a wu lɛɛ.”

³⁸Na wooma Sawei Yeekaamɔisia lɛɛnga kɛɛ Farisiisia ti ndeilɔ Yesu ma tɛɛ, “Kaamɔ, mu longɔ bi kabande hinda wie mu tɔ.”

³⁹Kɛɛ i poteilɔ ti ma yɛ, “Wu haablaa nyamui jisia tawao wuii lɔnyani a Ngewɔ! Wuaa nya mɔlima kabande hinda va kɛɛ ngɛɛ pie. Kabande hindei na lekee a ve wu wɛ tamia a na wɔɔ i Ngewɔ lutui Jona wieni.

⁴⁰ Kia lekee wɔɔ Jona i yɛ nyɛɛ wai goohu folo sawa kɛɛ kpindi sawa va, hii lɔɔ nya nya Nuuvu Hindoloi a yɛ ndɔwu folo sawa kɛɛ kpindi sawa va.

⁴¹ Kpɛmbo volei ma kɛyila Ninivɛblɛisia ta hiyelɔ ti wu lɛɛ ajifa ti wounveilɔ ti jumbuisia ma ji Jona i Ngewɔ yiɛi lɛni ti ma; tawao gbɛɛ ngi hugɛ a wue, hani lɔ mbei tewengɔ Jona ma.

⁴² Kpɛmbo volei ma kɛyila Siiba yeenyaha-mahɛi a hiyelɔ i wu lɛɛ ajifa i gbuailɔ ngi lɔlei hu, i jia huguhangɔ waa wolovaa nɛmahulewe gaa na ma Mahɛi Sɔlɔmɔn i yɛ kɛ, tawao gbɛɛ ngi hugɛ a wue, hani lɔ mbei tewengɔ Sɔlɔmɔn ma.”

⁴³“Ngafa nyamui i gbuangalɔ numui hu, a lewetewelɔ ndɔlɔ hubengɔi hu a heima gɔkɔli kɛɛ ɛɛ tɔ.

⁴⁴A ndelɔ nɛmahu yɛ, ‘Nga yamalɔ nya wɛlei na bu ngi gbuani na.’ I yamangalɔ, a male popongɔ, na yilangɔ, na gbatɛngɔ pandaa.

⁴⁵A gbualɔ, i li, i wa a ngafa wɔfla wekangaa, ti nyamungɔ tewengɔ ta vulii ma, tia tieni ti hei na. Numui na gɛlɛmɛi a yɛ nyamuni i lewe tɔtomɛi ma. Namia a numu nyamui nasia wie ti na a foloi ji.”

⁴⁶Yesu i loni yɛpɛmaa nungeisia gama kɛ ngi nje kɛɛ ngi ndewehingeisia ti wanga, ti lo ngitii ya, ti longɔ tia tieni ti yɛpɛ.

⁴⁷Faale nungei nasia ti yɛ na yeengila i ndeilɔ ngi ma yɛ, “Kafai lɛ, bi nje tia bi ndewehingeisia lɔ looni ngitii ya ti longɔ wua tieni wu yɛpɛ.”

⁴⁸Kɛɛ Yesu i poteilɔ yeenumui na ma yɛ, “Ye lɔ nya nje le? Yeeni lɔ nya ndewehingeisia a tie?”

⁴⁹Kɛ i loko longa ngi gaalopoisia ma yɛ, “Nya nje gbe kɛɛ nya ndewehingeisia!

⁵⁰Numui na lekee a nya Kɛkɛ na i ngelegoohu ngi liima hindei wie ta lɔ nya ndewehindoi le kɛɛ nya ndewenyahaloi kɛɛ nya nje.”