Read Ngowili Yekpei Numu Kpɛlɛɛ Va MATIU 14 Bible Online

MATIU 14 - Ngowili Yekpei Numu Kpɛlɛɛ Va bible

MATIU 14

¹A watii na, Galili yeemahɛi Hɛlɔd i Yesu malɔwɔ mɛnilɔ.

²I ndeilɔ ngi mableisia ma yɛ, “Jɔn Nguamɔi vulii mia i vulua i hiyea hee hu; na vamia kpayei na i ngi wɛ kabandeisia wieva.”

³Ajifa Hɛlɔd i pieilɔ yese ti Jɔn hou, ti jɔwɔi gula ngi ma, ti ngi wili kpindiwɛlei bu Hɛlɔdias va, ngi ndewei Filipi nyahɛi.

⁴ Ajifa Jɔn i yɛlɔ ndeni Hɛlɔd ma yɛ, “Ii wɔnani bi va Hɛlɔdias jɔva a bi nyaha laa.”

⁵Hɛlɔd longɔ yɛla i Jɔn waa kɛɛ i luwɛilɔ nungeisia ma ajifa ti Jɔn wumbuni a Ngewɔ lutui lɔ.

⁶Kɛɛ kia Hɛlɔd le-volei i hitini ma, Hɛlɔdias nyahaloi i lolilɔ fahii na gulɔ, i nɛɛ waa Hɛlɔd wɛ,

⁷kɛ i Lahei wumbunga ngi gama yɛ, “Ngi jondunga hani gbi veva bi wɛ ba mɔli.”

⁸Kia ndopoi ngi nje i puni la ngi laa, i ndeilɔ Hɛlɔd ma yɛ, “Jɔn Nguamɔi wui ve mbɛ yakpe pletii hu.”

⁹Mahɛi lii i nyanilɔ ji mɛniva kɛɛ Lahei na va i mbumbuni komɛ hubleisia yaama, i ndeilɔ yɛ ndopoi liimɛi i wie.

¹⁰Faale i numu loilɔ ti Jɔn wui lewe nga kpindiwɛlei bu.

¹¹Ti wɛilɔ a yeengui pletii hu ti fe ndopoi wɛ, ta bɛɛ i li la ngi nje wɛ.

¹²Jɔn gaalopoisia ti wɛilɔ ti li a ngi womɛi, ti kpɔwu, ti li ti hugɛ a Yesu.

¹³Kia Yesu i Jɔn haalɛi humɛnini, i gbuailɔ na a ndɛndɛi hu wee, ta yakpe i li mia na yaa louŋ. Kɛɛ kia fahiisia ti mɛnini, ti gbuailɔ ti lɛisia hu ti to ngi ma a gɔwɔma wee.

¹⁴Kia Yesu i gbuani ndɛndɛi hu, i faha lakpa waa lɔilɔ; kɛ ti mamamau i ngi lɔnga, i ti heegbɛblɛisia bawo.

¹⁵Kia kpɔkɔ i wɛlɛni, ngi gaalopoisia ti wɛilɔ ngi gama tɛɛ, “Ndɔgbɔ lambama lɔ a mbei tawao foloi i gulanga na. Gbe fahii jisia ma ti li fuleisia hu ti mɛhɛɛ yeya ti mɛ.”

¹⁶Yesu i ndeilɔ yɛ, “Maa ii houni ti li. Wua vulii a ti gɔ a mɛhɛɛ ti mɛ!”

¹⁷Ti ndeilɔ ngi ma tɛɛ, “Na lekee i mu yeya mbei tamia a bledii gbuha lɔɔlu kɛɛ nyɛɛ fele.”

¹⁸Yesu i ndeilɔ yɛ, “A wa la mbei nya gama.”

¹⁹Kɛ i ndenga yɛ nungeisia ti hei kpiti ya. Kɛ i bledii lɔɔlii kɛɛ nyɛɛ felei wumbunga, i ngeleya gbe, i siɛgbua Ngewɔ ma, i ngaingai, i fe ngi gaalopoisia wɛ, ti kɔlɛkɔlɛ fahiisia ma.

²⁰Numui gbi ti mɛhɛɛ na mɛilɔ ti goo i ve. Kɛ ngi gaalopoisia ti yeengaingaingɔi yeemɔnii lɛnga ma kungɔ a samba puu maahu fele.

²¹Hingei nasia ti mɛhɛɛ na mɛni ti gungɔ yɛla a tauji lɔɔlu, tii nyahangɛisia kɛɛ ndeengɛisia gbawani.

²²Na wooma Yesu i pieilɔ ngi gaalopoisia ti wili ndɛndɛi hu ti li njɛi wooma ngi gulɔ, ta i lo kpɔkɔ veva fahii wɛ.

²³Kia i kpɔyɔni a kpɔkɔ vela fahii wɛ, kɛ ta yakpe i lɛnga ngiye yila hu Ngewɔ vɛliva. Ji kpɔkɔ i wɛlɛni, ta yakpe lɔ i yɛ na;

²⁴tawao a watii na ndɛndɛi maguhangɔ yɛla Popɛi lia, njagateisia ta hɔwɔ ndɛndɛi ma ajifa fɛfɛi wotengɔ yɛla ti maahu.

²⁵A ngewohu gbindi, Yesu i wɛilɔ ngi gaalopoisia gama, a jia njɛi ya.

²⁶Ji ti ngi lɔni a jia njɛi ya, ti luwɛilɔ waa tɛɛ, “Ndɔwumɔi mia!” kɛ ti yelei gulanga.

²⁷Kɛɛ Yesu i yɛpɛilɔ ngaama ti gama yɛ, “A wu lii gba, nya mia. Waa luwa.”

²⁸Kɛ Pita i yɛpɛnga yɛ, “Ndemɔi, ina bia vulii mia, nde nya ma ngi jia njɛi ya ngi wa bi gama.”

²⁹Yesu ndeilɔ ngi ma yɛ, “Wa!” Kɛ Pita i gbuanga ndɛndɛi hu, i tɔto a jialaa njɛi ya a li Yesu gama.

³⁰Kɛɛ kia i fɛfɛi gbayayii lɔni, i luwɛilɔ, kɛ i tɔtonga a lɔmbula. Kɛ i yelei gulanga yɛ, “Ndemɔi, nya bawo!”

³¹Yesu i ngi lokoi lamboilɔ ngaama i ngi hou, yɛ ngi ma, “Bi layii a Ngewɔ i guloni kpa! Gbɛe bi sekani nya hu?”

³²Ti veenjɔ ti wililɔ ndɛndɛi hu kɛ vivii hu i lewea.

³³Kaalopoi nasia ti yɛ ndɛndɛi hu ti mawɛɛlɔ ngi gɔɔbu tɛɛ, “A tɔnya Ngewɔ Hindoloi vulii lɔ a bie!”

³⁴Ti njɛi leweilɔ ti wa Gɛnisalɛt lɔlei hu.

³⁵Kia yeendɔlɛi na hubleisia ti ngi gɔɔni, ti nunga lɔilɔ yeetatei na hu gbi, ti wa a heegbɛblɛisia gbi ngi gama.

³⁶Ti ngi manɛnɛilɔ tɛɛ i luma yeeheegbɛblɛisia ti jaa lekee bɛɛ a ngi bobani yeengoliyɛi; tawao nasia gbi ti jaani la, ti bawoilɔ.